የመስቀል ደመራ በዓል በሰሜን ወሎ ሀገረ ስብከት ወልድያ ከተማ በድምቀት ተከብሯል።
መስከረም 16 ቀን 2017 ዓ.ም
ዘዕጣን አንፀረ ሰገደ ጢስ በጎልጎታ ዘደፈኑ አይሁድ ዮም ተረከበ እፀ መስቀል ክቡር፡፡ (በእጣን የተቃጠለው ጢስ ወደሰማይ ወጥቶ መስቀሉ ወደተቀበረበት ቦታ ሰገደ በዚህም አይሁድ የቀበሩት ዕፀ መስቀል ዛሬ ተገኘ)፡፡
መስከረም 16/2017 ዓ/ም
በሲዳማ ሀገረ ስብከት በሀዋሳ ከተማ የመስቀል ደመራ በዓል በታላቅ ድምቀት ተከበረ።
መስከረም 16/2017 ዓ/ም
“ወወሀብኮሙ ትእምርተ ለእለ ይፈርሁከ ከመ ያምስጡ እምገጸ ቀስት – ከቀስት ፊት ያመልጡ ዘንድ ፥ ለሚፈሩህ ምልክትን ሰጠሃቸው”
በስመአብ ወወልድ ወመንፈስ ቅዱስ_አሐዱ አምላክ አሜን!!!
እጅግ የምንወዳችሁ እና የምናከብራችሁ በሀገረ ስብከታችን ፣ በመላው ዓለም የምትገኙ ክርስቶሳውያን ውድ የመንፈስ ቅዱስ ልጆቻችን እንኳን ለ2017 ዓ.ም የቅዱስ መስቀል የደመራ በዓል በሰላም እና በጤና አደረሳችሁ!
“ወወሀብኮሙ ትእምርተ ለእለ ይፈርሁከ ከመ ያምስጡ እምገጸ ቀስት – ከቀስት ፊት ያመልጡ ዘንድ ፥ ለሚፈሩህ ምልክትን ሰጠሃቸው”
መዝ 59፥4
ቅድስት ቤተ ክርስቲያናችን ከምታከብራቸው ከዘጠኙ ንዑሳን በዓላት አንዱ ይህ የቅዱስ መስቀል የደመራ በዓል ነው። ደመራ የሚለው ቃል ደመረ፣ ጨመረ፣ አንድ አደረገ፤ ከሚለው የግእዝ ቃል የመጣ ሲሆን የሚገልጸው ደግሞ መቀላቀልን፣ መገናኘትን፣ መሰብሰብን፣ መጣመርን፣ መዋሐድን በአጠቃላይ ሱታፌን፣ አንድነትን እና ኅብረትን ነው። ቅዱስ መስቀሉ የተገኘበት በዓልም ስለሆነም ደመራ እንጨቶች የሚደመሩበት የበዓለ መስቀል ዋዜማ ነው።
ይህን በዓል የምናከብርበት ምክንያት አይሁድ ጌታችን መድኃኒታችን ኢየሱስ ክርስቶስ የተሰቀለበት መስቀል የተለያዩ ገቢረ ተዓምራትን ሲያደርግ በመመልከታቸው በቅናት ተነሳስተው ቀብረውታል ቦታውንም የቆሻሻ መጣያ አድርገው ቆይተዋል። ኋላም የንጉሥ ቆስጠንጢኖስ እናት በሆነችው ንግሥት ኅሌኒ አማካኝነት የጌታችን የመድኃኒታችን የኢየሱስ ክርስቶስ ቅዱስ መስቀል ከተቀበረበት እንደወጣ ከመጽሐፈ ስንክሳራችን እንረዳለን።
መስቀል የሰላማችንና የድኅነታችን የመቀደሳችን ዓርማ፣ ኢየሱስ ክርስቶስ የሰውን ልጆች ለማዳን፥ የዘላለም ሕይወትን ለመስጠት መስዋዕትነት የከፈለበት ቅዱስ ሥጋውን ክቡር ደሙን ያፈሰሰበት መንበር፥ ሲሆን አምላካችንን የምንመለከትበት መስታወት ነው።
የተወደዳችሁ የመንፈስ ቅዱስ ልጆቻችን
ኢትዮጵያዊው ሊቅ ቅዱስ ያሬድ “መስቀሉ ለወልድ ለነፍስየ ፀወና – የወልድ መስቀል የነፍሴ መጠጊያዋ ነው” ይላል። ይህ ማለት ጌታችን ኢየሱስ ክርስቶስ በቅዱስ መስቀሉ ስላደረገልን የማዳን ሥራ ሲያስረዳን ነው።
ለእኛ ለክርስቲያኖች ቅዱስ መስቀል ኃይላችን ፣ ቤዛችን ፣ ምልክታችን ፣ መጠጊያችን. . ነው። ስለዚህ ይህንን የቅዱስ መስቀል በዓል ስናከብር ታላቅ መንፈሳዊነት በተመላ መልኩ ሊሆን ይገባል። በቅዱስ መስቀሉ የተደረገልን ዕርቅ ፣ ሰላም ፣ ድኅነት ፣ ዕድገት… ነው። እኛም ይህንን በዓል ስናከብር አምላካችን ያደረገልንን ማዳን እያሰብን ፣ በአፋችን የሰላምን መዝሙር እየዘመርን ፣ ይቅር እየተባባልን ፣ የተቸገሩትን እየረዳን መልካም ነገሮችን በሙሉ በማድረግ በመንፈሳዊ ስርዓት ልናከብር ይገባል።
ወቅታትን ፣ ዓመታትን ፣ አዝማናትን እንደየስርዓቱ የሚያፈራርቅ ፥ ፍጥረታትን የሚመግብ የቸርነት እና የይቅርታ ባለቤት አዲሱን ዓመት የተባረከ ዘመን ያድርግን። ከቅዱስ መስቀሉ ረድዔት በረከት ያሳትፈን።
እግዚአብሔር ሀገራችንን ይባርክልን
አባ ገሪማ
የጌዴኦ ኮሬ ቡርጂ ሀገረ ስብከት ጳጳስና የቅዱስ ሲኖዶስ አባል
መልእክተ ብፁዕ ወቅዱስ ፓትርያርክ
በስመ አብ ወወልድ ወመንፈስ ቅዱስ አሐዱ አምላክ አሜን!
“እስመ ነገረ መስቀሉሰ ዕበድ ውእቱ በኀበ ኅጉላን ወበኀቤነሰ ለእለ ድኅነ ኃይለ እግዚአብሔር ውእቱ፤ የመስቀሉ ቃል ለሚጠፉት ሞኝነት ነው፤ ለኛ ለምንድን ግን የእግዚአብሔር ኃይል ነው”(1ቆሮ. 1÷08)፤
በመስቀሉ ኃይል ከፍዳ ኃጢአት ያዳነን ጌታችን አምላካችንና መድኃኒታችን ኢየሱስ ክርስቶስ እንኳን ለሁለት ሺሕ ዐሥራ ሰባት ዓመተ ምሕረት በዓለ ቅዱስ መስቀል በሰላም አደረሰን አደረሳችሁ!
ጌታችን በዚህ ዓለም በተገለጸበት ዘመን የግሪካውያን ፍልስፍና ሰፊ ስፍራ አግኝቶ በመካከለኛው ምሥራቅ በሰሜን አፍሪካና በአውሮፓ የተስፋፋበት ዘመን ነበር፤ የግሪካውያን ባህልና ፍልስፍና የተመሠረተው በግዙፉ ቁስ ላይ እንደመሆኑ በግዙፉ መሳሪያ ላይ የሚተማመን ነበረ፤ ይህ ዓይነት አስተሳሰብ ሥር ሰዶ በነበረበት ጊዜ ወልደ እግዚአብሔር ኢየሱስ ክርስቶስ በመንፈሳዊ ኃይል በዚህ ዓለም ተገለጠ፤ ጌታችን በሰው መካከል ተገኝቶ አጋንንትን ወደ ጥልቁ ሲያሰምጥ፣ ልዩ ልዩ በሽታና ደዌ ያላቸውን ሲያድን፣ ሙታንን ሲያነሣ፣ ብዙ ተአምራትንና አስደናቂ ነገሮችን ሲያሳይ በመንፈሳዊ ኃይል እንጂ በቁሳዊ ኃይል አልነበረም፤ በመሆኑም በወቅቱ በዓለም ውስጥ ቁሳዊ ኃይልና መንፈሳዊ ኃይል ተብለው የሚታወቁ እነዚህ ሁለት ኃይላት እርስ በርስ ይጋጩ ነበር፤ ዓለም በቁሳዊ ኃይል ተማምኖ በጉልበት የሚያደቀውን በመሳሪያ የሚቀጠቅጠውን ሲሻ፣ መንፈሳዊው ኃይል ደግሞ ከቊሳዊ ኃይል በላይ የሆነውን መለኮታዊ ኃይል በመጠቀም የሰውን ሁለንተና ሕይወት ለማዳን ይሰራ ነበር፤
እነዚህ ኃይሎች ከሥር መሠረቱ አነሣሣቸው፣ አመጣጣቸውና የኋላ ጀርባቸው የተለያየ በመሆኑ የሚጣጣሙ አልነበሩም፤ በዚህ ዓለም ጥበብ ወይም ፍልስፍና የሚተማመኑቱ ግሪካውያን የመስቀሉን ቃል ሲሰሙ እንደ ሞኝነትም እንደ ድክመትም አድርገው ይመለከቱ ነበር፤ ወልደ እግዚአብሔር በሥጋ በዚህ ዓለም ተገለጠ፤ በለበሰው ሥጋም በኛ ፈንታ ቤዛ ሆኖ በመስቀል ላይ ሞተ፤ በሞቱም እኛን ከረቂቁ ፍዳ ኃጢአት አዳነን የሚለውን የመስቀሉ ቃል ወይም አስተምህሮ ቁሳውያን እንደሞኝነትም እንደ ደካማነትም በመመልከታቸው ለጊዜውም ቢሆን የመስቀሉ ቃል ጠጥሮአቸዋል፡፡
ይህም በመሆኑ ሐዋርያው ቅዱስ ጳውሎስ የመስቀሉ ቃል ሞኝነት መስሎ ለሚታያቸው የመጨረሻ ዕድላቸው መጥፋት ነው፤ በሌላ በኩል ደግሞ የመስቀሉ ቃል ሰውን ለማዳን የተደረገ የእግዚብሔር ኃይል እንደሆነ አምነው ለሚቀበሉና ለሚኖሩበት የመጨረሻ ዕድላቸው መዳን ነው በማለት የሁለቱም ዕድል አነጻጽሮ ይገልጻል፤ የቊሳውያን ግንዛቤ በቊሳዊው ዓለም የተገደበ ስለሆነ ስለ መንፈሳዊው ዓለም የሚያውቁት ባለመኖሩና ለማወቅም ተነሳሽነቱ በማነሱ፣ በሌላም በኩል መንፈሳውያኑ ደግሞ ከቊሳዊው ዓለም ባለፈ መንፈሳዊው ዓለም መኖሩና ዘላቂና ወሳኝ ኃይልም ያለው መንፈሳዊው ዘንድ ነው ስለሆነም ሰው በቊሳዊ ኃይል ሳይሆን በመንፈሳዊ ኃይል ዘላቂ ድኅነትን ያገኛል ብለው በማስተማራቸው ልዩነቱ ተፈጥሮአል፤ ከዚህ አንጻር የችግሩ ዋና ማጠንጠኛ የመንፈሳዊው ኃይል መኖርና አለመኖር ማወቅ ወይም ማመንና አለማመን ነበረ፤ ይህ እሳቤ ዛሬም ሳይቀር የዓለምን እሳቤ እንደሰነጠቀ ነው፤
ይሁን እንጂ በንጹህ ኅሊና በቅን ሰብእና እንደዚሁም በጥልቅ አእምሮ ለሚያስተውለው ሰው፣ ሓቁ ብዙም የራቀና የረቀቀ አይደለም፤ ምክንያቱም ዓለም እየተመራ ያለው በሚታየው ግዙፍና ደካማ ቊስ ሳይሆን በማይታየውና በረቂቁ መንፈሳዊ ኃይል እንደሆነ ሥነ ፍጥረት ይመሰክራልና ነው፤ በዓለማችን ለሚከናወኑት ቊሳዊና መንፈሳዊ እንቅስቃሴዎች ሁሉ ሙሉ መልስ ያለው መንፈሳዊው ኃይል እንጂ ቊሳዊው ኃይል አይደለም፤ እንዳልሆነም ኅሊናችን ይመሰክርልናል፡፡ ዛሬ በከፍተኛ ሃይማኖታዊ ሥነ በዓል የምናከብረው የቅዱስ መስቀል በዓልም ከዚህ በላይ የጠቀስነው የሁለቱ አካላት ግጭት የፈጠረው ክሥተት ነው፤ መንፈሳዊው ሰው ከመስቀሉ በቀር ከፍዳ ኃጢአት እድንበታለሁ የምለው ሌላ ትምክህት የለኝም ብሎ የመስቀሉን ዘላቂ አዳኝነትን ከፍ አድርጎ ሲዘምር፣ ቊሳዊው ኃይል አልተመቸውም፤ ዝም ብሎ ማየትም ምርጫው አልነበረም፤ ስለሆነም ባለው ዓቅም ሁሉ ተንቀሳቅሶ መስቀሉን ከገጸ ምድር በማስወገድ በእሱ ላይ የተመሠረተውን አስተምህሮና እምነት እንዳይነሣም እንዳይወሳም በማሰብ መስቀሉን ቀበረ፤ ቊሳውያን መስቀሉን ቢቀብሩትም የመስቀሉን ቃል ሊቀብሩ አልቻሉም፤
ምክንያቱም የመስቀሉ ቃል ቊሳዊ ሳይሆን መንፈሳዊ፣ ውጫዊ ሳይሆን ውስጣዊ፣ ምድራዊ ሳይሆን ሰማያዊ፣ ሰብአዊ ሳይሆን መለኮታዊ፣ ጊዜያዊ ሳይሆን ዘላለማዊ ነውና፤ ይህም በመሆኑ ቊሳዊ የሆነው ዕፀ መስቀል ቢቀበርም እሱ የተሸከመው ቃለ ድኅነት በረቂቁ የሰው አእምሮ ተቀርጾና ተዘግቦ ስለሚኖር ተቀብሮ ሊቀር አልቻለም፤ በሂደትም ያልተቀበረው የመስቀሉ ቃለ ድኅነት በንግሥት ዕሌኒ አእምሮ ውስጥ የእምነት ኃይል አቀጣጥሎ የተቀበረውን ዕፀ መስቀል በዛሬው ዕለት ከጥልቅ ጉድጓድ አውጥቶአል፤ በዚህም አሸናፊነቱን አረጋግጦአል፤ ዛሬ የምናከብረው በዓልም ይኸው ኃይለ እግዚአብሔር ለማሰብና በሱ ያለንን እምነት ለማስጠበቅና ቃለ ድኅነቱን ለማሥረጽ ነው፤ መስቀል ኃያልና አሸናፊ ቢሆንም ረቂቁንም ሆነ ግዙፉን ጠላት የሚያሸንፈው በሐቅና በሰላም፣ ኅሊናን በመርታትና በማሳመን እንጂ እንደ ቊሳዊ ኃይል አይደለምና እነሆ ዕፀ መስቀሉ በዛሬው ዕለት በኃይለ እግዚአብሔር በታጀበ ጢሰ-ዕጣን ከተቀበረበት ጉድጓድ በሰላም ሊወጣ ችሎአል፡፡
የመስቀሉ ቃል ዛሬም ተቃራኒ ኃይል አላጣም፤ ዛሬም ለመስቀሉ ቃል ጀርባቸውን የሚሰጡ ሰዎች ብዙ ናቸው፤ ከዚህም የተነሣ ስጋቱ ጭንቀቱ ግጭቱ አለመተማመኑ በዓለማችን ከምን ጊዜውም በላይ ተንሰራፍቶአል፤ ሀገራችንም ከዚህ የተለየች ልትሆን አልቻለችም፤ በዓለ መስቀሉን ከማንኛውም ክፍለ ዓለም በተለየ ሥነ ሥርዓት ብናከብርም የመስቀሉ ሰላም ግን በሀገራችንና በሕዝባችን እየተነበበ አይደለም፤ ይህንን ለማስገንዘብ የሚተላለፈው መልእክትም እየተደመጠ አይመስልም፤ የመስቀሉ ቃል ማለት ሰዎች በነፍሳቸውም ሆነ በሥጋቸው የተሟላ ደኅንነት ያግኙ ማለት ነው፤ የመስቀሉ ቃል ማለት የሰዎች ሃይማኖታዊ ነጻነት ይከበር፤ በሕይወት የመኖር ሰብአዊ መብታቸውም ይጠበቅ ማለት ነው፤ የመስቀሉ ቃል ማለት ሰዎች በዚች ምድር በእኩልነት በአንድነት በመተጋገዝ በመረዳዳት በፍትሐዊ የሀብት ክፍፍል በሰላም በፍቅር በስምምነት በመተባበር ይኑሩ ማለት ነው፤
የመስቀሉ ቃል ማለት የሰው ሕይወት በዚህ ዓለም የተገደበ አይደለም ዘላለማዊ በሆነው መንፈሳዊ ዓለምም ሕይወት በቀዋሚነት ይቀጥላልና እግዚአብሔርን ፍሩ፤ ለእርሱም ታዘዙና ተገዙ ማለት ነው፤ የመስቀሉ ቃል ማለት በኢየሱስ ክርስቶስ መስቀል በፈሰሰው ደም የመዳን ዕድል ተከፍቶላችኋልና በደሙ ታጥባችሁ ወደ እግዚብሔር መንግሥት ግቡ ማለት ነው፤ ይህንን የመስቀል ቃል ዓለም ብትቀበለው ኖሮ በየጊዜው እያንዣበባት ያለው ስጋት ሁሉ ቦታ አይኖረውም ነበር፤ አሁንም በመስቀሉ ስም ለዓለም ሕዝብም ሆነ ለሀገራችን ዜጎች ሁሉ የምናስተላልፈው ዓቢይ መልእክት የመስቀሉ ቃል ሁላችንንም በእኩልነትና በፍቅር የሚያስተናግድ ነውና እሱን እንቀበል፤ የዓለም ስጋቶች በሙሉ ሊቀረፉ የሚችሉ በመስቀሉ ቃል ብቻ ነውና የሚል ነው፡፡
እግዚአብሔር የተባረከና የተቀደሰ በዓል ያድርግልን፡፡
እግዚአብሔር አምላክ ኢትዮጵያንና ሕዝቦቿን ይባርክ!
ወስብሐት ለእግዚአብሔር!! አሜን::
አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስምወዕጨጌ ዘመንበረ
ተክለ ሃይማኖት
መስከረም 16 ቀን 2017ዓ.ም.
አዲስ አበባ፣ ኢትዮጵያ
“የመስቀል እንቅፋት ተወግዶአል” ገላትያ ፭፥፲፩
በስመ አብ ወወልድ ወመንፈስ ቅዱስ አሃዱ አምላክ አሜን !!
“የመስቀል እንቅፋት ተወግዶአል” ገላትያ ፭፥፲፩
በሀገር ውስጥ እና በውጭ ዓለም የምትኖሩ የተከበራችሁ የእግዚአብሔር ቤተሰቦች ምዕመናን እና ምዕመናት!!
በቅድሚያ እንኳን እግዚአብሔር ለ ፳፻፲፯ ዓ/ም በዓለ መስቀል በሰላም እና በጤና አደረሳችሁ አደረሰን!!
የእግዚአብሔር ቤተሰቦች ጥላቻ የክርስቲያኖች መገለጫ ባሕርይ አይደለም፤ እና ጌታ ሰላምን እና ዕርቅን ያደርግ ዘንድ ጥልን በመስቀሉ ገደለ።ኤፌ ፪ ፥፲፭-፲፮።
በዚህም ጌታ በመስቀል ላይ ተሰቅሎ ባሳየን የፍቅር ጥግ ባደረገልንም ዕርቅ እና ሰላም ምክንያት መስቀሉ፦
– የሰላም
– የፍቅር
– የዕርቅ ምልክት ሆነ።
በዚህም የሰላም ምልክት ቅዱስ መስቀል ታዲያ ብዙዎቹ ከሕመማቸው እየተፈወሱ ሰላምን ያገኙ ነበር። ነገር ግን ይህ የጌታችን እና የመድኃኒታችን የኢየሱስ ክርስቶስ ቅዱስ መስቀል፦
– ሙታንን እያስነሣ
– ለምጻሙን እያነጻ
– ጎባጣውን እያቀና
– ሕሙማንን እየፈወሰ
ተአምራትን ሲሰራ ይህ እውነት ያልተዋጠላቸው አይሁድ በመስቀሉ ላይ የተገለጠውን የእግዚአብሔርን መለኮታዊ ሥራ ቀብረው ለመደበቅ ሰይጣናዊ ሐሳብ በልባቸው ገባ ስለዚህ መስቀሉን ቀብረው ከ፫፻ ዓመታት በላይ ተራራ ሆኖ ገዝፎ አስኪታይ ድረስ ከአካባቢያቸው ያለውን ቆሻሻ እና የቤታቸው ጥራጊ ወስደው ደፉበት፤ ዛሬም በዚህ መንገድ እውነትን በማይሹ ወገኖች ለሀገር በረከት የሆኑ በርካታ እውነቶች እንዲህ ይቀበራሉ። ነገር ግን እግዚአብሔር ሥራውን የሚሰራበት የእግዚአብሔር የሥራ ጊዜ የሚሠራበት የእግዚአብሔር የሥራ ጊዜ ሲደርስ እነ ኪራኮስ እውነት ያለችበትን ስፍራ መደበቅ አይችሉም። ምክንያቱም ለሀገር እና ለወገን የሚጠቅሙ በርካታ የተደበቁ እውነቶችን ፈልፍለው የሚያወጡ እነ እሌኒን እግዚአብሔር በጊዜው ጊዜ ይቀሰቅሳልና።ቅዱስ መስቀል ከተቀበረበት ሥፍራ የተገኘበትን በዓል ስናከብርም እውነቱ ሁሉ ይህ ነው።
እግዚአብሔር አምላክም መስቀሉን ከተቀበረበት ስፍራ እንድታወጣ ለዚህ ታሪካዊ እና መንፈሳዊ ዓላማ ያዘጋጃት ንግሥት እሌኒ በሰጠችው መመሪያ መሠረት ደመራ ተደምሮ በእሳት ተለኩሶ ሰንድሮስ የተባለ ብዙ ዕጣን ተጨምሮበት የዕጣኑ ጢስ የጌታ መስቀል ከተቀበረበት ስፍራ ጎልጎታ ላይ አረፈ። ሰገደ ጢስ በጎልጎታ እንዳለ ሊቁ።
ደመራው ተለኩሶ የዕጣኑ ጢስ ካረፈበት ቦታ ላይ መስቀሉ ያለበት ሥፍራ ተገኝቷልና መስከረም ፲፯ ቀን ቁፋሮ ተጀምሮ መጋቢት ፲ ቀን ቅዱስ መስቀል እንደ ፀሐይ እያበራ ከተቀበረበት ሥፍራ ወጣ። ቀደዌ እስራት የነበሩ በርካታ ሕሙማንም በመስቀሉ ላይ በተገለጠው የሆነኘ በእግዚአብሔር መለኮታዊ ኃይል ከሕመማቸው ተፈወሱ። እንዲህ የሚፈውሰውን ቅዱሱን መስቀል ለፈውስ ያልታደለው የአይሁድ ሕዝብ ተባብሮ ቀበረው። ነገር ግን በእግዚአብሔር ድንቅ ጥበብ የመስቀሉ እንቅፋት ተወገደ፤ መስቀሉ ወደ አደባባይ ወጣ። ወደ ኢትዮጵያም መጣ። እኛም ዛሬ ለዓላማችና ለአንድነታችን እንቅፋት የሆኑብንን የየጀሮች የሆኑብንን ነገሮች እግዚአብሔር እንዲያስወግዶን እውነት ተባብረው የሚቀብሩ አይሁድን ሳይሆን ትውልድ የሚፈወስበትን እውነትን ቆፍረው የሚያወጡ እነ እሌኒን ልንሆን ይገባል።
የተወደዳችሁ ክርስቲያኖች !!
የመስቀሉ ቃል ለሚጠፉት ሞኝነት ለእኛ ለምንድን የእግዚአብሔር ኃይል ነው። ፩ኛ ቆሮንቶስ ፩፥ ፲፰
በአሉን ስናከብር ኃይልን በሚሰጠን በክርስቶስ
– የታረዙትን በማልበስ
– የተራቡትን በማጉረስ
– የተጠሙትን በማርካት እና የተቸገሩትን በመርዳት መሆን እንዳለበት በእግዚአብሔር ልዩ ፍቅር ልናሳስባችሁ እንወዳለን። መስቀሉ ክርስቶስ ፍቅሩን ለእኛ ያሳየበት የፍቅር ምልክት ነውና በዓሉን ስናከብር በፍቅር ሊሆን ይገባል። መስቀሉ ክርስቶስ ሰላምን ለሰው ልጆች የሰጠበት የሰላም አርማ ክርስቶስ እኛን ከራሱ ጋር ያስታረቀበት የዕርቅ ምልክት ነውና የተጣላን ታርቀን በወንድማማች መዋደድ በዓሉን ልናከብር ይገባል።
በማጠቃለያም እንደ ምሥራቅ ሐረርጌ እና እንደ ሐረር ከተማ የሚመለከታችሁ የመንግስት አካላት ብሎም በሌላ የእምነት ተቋም ውስጥ ያላችሁ የተከበራችሁ ወገኖቻችን ይህ የመስቀል ደመራ በዓል ከሃይማኖታዊ ይዘቱም ባሻገር በዓለም አቀፍ ደረጃ በተባበሩት መንግስታት በትምህርት በሳይንስ እና ባሕል ድርጅት (ዩኔስኮ)ከማይዳሰሱ ቅርሶች መካከል እንደመመዝገቡ መጠን የጋራ በዓላችን፤የጋራ ታሪካችን፤የጋራ ቅርሳችን፤የጋራ ውበት እና ድምቀታችን እንዲሁም የአንድነታችን መገለጫ እንደመሆኑ መጠን ለበዓሉ ድምቀት የበኩላችሁን ሚና እንድትወጡ በእግዚአብሔር ስም እያሳሰብን በዓሉ የሰላም በዓል እንዲያደርግልን እንመኛለን።
ልዑል እግዚአብሔር ለሀገራችን ለኢትዮጵያ ሰላሙን ለሕዝቦቿ ፍቅር እና አንድነትን ይስጥልን!!
አባ ኒቆዲሞስ
የምሥራቅ ሐረርጌ ሀ/ስብከት ጳጳስ
እና የቅዱስ ሲኖዶስ አባል
መስከረም ፲፭ ፳፻፲፯ ዓ/ም
ብፁዕ ጠቅላይ ሥራ አስኪያጁ የመስቀል ደመራ በዓል ፍፁም መንፈሳዊ በሆነ መልኩ ተከብሮ መዋል ይችል ዘንድ ሁሉም ባለድርሻ አካል የሚጠበቅበትን ሁሉ እንዲያደርግ ጥሪ አቀረቡ።
መስከረም ፲፬ ቀን ፳፻ ፲ወ፯ ዓ.ም
“”””””””””””””””””””””””””””””””””””””””””””
አዲስአበባ -ኢትዮጵያ
የጉባላፍቶ ወረዳ ቤተክህነት የሰበካ መንፈሳዊ ጉባኤውን አካሒዷል
በ2016 የአገልግሎት ዓመት ወረዳ ቤተክህነቱን ጨምሮ በገዳማት፣ አድባራትና አጥቢያ አብያተ ክርስቲያናት የተከናወኑ የተግባራት አፈጻጸም ሪፖርትና የሀገረ ስብከቱን ዓመታዊ እቅድ መነሻ በማድረግ የተዘጋጀውን የወረዳ ቤተክህነት የ2017 ዓ.ም ዓመታዊ እቅድ ቀርቦ ውይይት ተደርጎበታል።
ብፁዕ ጠቅላይ ሥራ አስኪያጁ የመስቀል ደመራ በዓል ፍጹም ደማቅ እና ሰላማዊ ሆኖ እንዲከበር የከተማ አስተዳደሩ እያደረገ ላለው ስራ ምስጋና አቅርበዋል።
መስከረም ፲፫ ቀን ፳፻ ፲ወ፯ ዓ.ም
“””””””””””””””””””””””””””””””””””””””””””””
አዲስአበባ -ኢትዮጵያ