ብፁዕ ወቅዱስነታቸውም “ዘመነ ማርቆስ ከነበርካታ ችግሮቹ በማለፉ እግዚአብሔርን እናመሰግናለን፤ የጀመርነውን ዘመነ ሉቃስ መልካም ዓመት ያድርግልን፤ እናንተም ይህንኑ አስባችሁ እንኳን አደረስዎ ለማለት በመቅረባችሁ አመሰግናለሁ፤ የብፁዕ ወቅዱስ ፓትርያርክ ልዩ ጽ/ቤትና የውጭ ጉዳይ መምሪያ ሰላም፣ ፍቅር፣ መተሳሰብና መከባበር የሰፈነበት መሆኑ የሚያስደስት ሲሆን በአዲሱ ዘመንም ይህንኑ የሥራ መንፈስ አጠናክራችሁ በመቀጠል፤ የተሰጣችሁን ታላቅ የቤተክርስቲያን ሓላፊነት በሐቀኝነት፣ በቅንነትና በታማኝነት እየተናበባችሁ ልትወጡ ይገባል…” ሲሉ የሥራ መመሪያ ሰጥተዋል።

የብፁዕ ወቅዱስ ፓትርያርክ ልዩ ጽ/ቤት እና የውጭ ጉዳይ መምሪያ ሀገር አቀፍ እና ዓለም አቀፍ ዐበይት ተግባራት የሚከናወኑባቸው ታላላቅ የቅድስት ቤተክርስቲያናችን ተቋማት መሆናቸው ይታወቃል።©EOTCTV

የአዲስ አበባ ሀገረ ስብከት ዋና ክፍል ኃላፊዎችና ሠራተኞች በብፁዕ አቡነ ሳዊሮስ ቢሮ በመገኘት እንኳን ከዘመነ ማርቆስ ወደ ዘመነ ሉቃስ አደረሳችሁ በማለት ለብፁዕነታቸው መልካም የሥራ ዘመን እንዲሆንላቸው ተመኝተዋል።

በመርሐ ግብሩ ሥራ አስኪያጁን ጨምሮ ዐራት የሥራ ሐላፊዎች መልአከ ምሕረት ዘካርያስ ሐዲስ ፣ መልአከ ገነት ልሳነ ወርቅ ተስፋ ና መልአከ ፀሐይ አባ ኃይለ መለኮት ይኄይስ ጉባኤውን በመወከል የመልካም ምኞት መግለጫ መልእክት ለብፁዕነታቸው ገልጸዋል።

በመልእክታቸውን ላይ ብፁነታቸው መልአከ ብርሃን ሰሎሞን በቀለን ለሀገረ ስብከቱ ዋና ሥራ አስኪያጅ አድርገው ስለሾሙ በእጅጉ እናመሰግናለን በቀጣይ የሥራ ውጤቱ እንዳለ ሆኖ እስካሁን ከተመደቡበት ጊዜ ጀምሮ ላሳዩት መልካም አፈጻጸምና ቁርጠኝነት በእጅጉ ኮርተናል ብለዋል።

ከዘመነ ማርቆስ ወደ ዘመነ ሉቃስ በሰላምና በጤና እንኳን አሸጋገረዎ በማለት ለብፁዕ ጠቅላይ ሥራ አስኪያጅ ደስታቸውን የገለጹት የሀገረ ስብከቱ ኃላፊዎች፣ በዚህ ማዕበል በበዛበትና በተለያዩ ፈተናዎች በተሞላው ዘመን ቤተ ክርስቲያንን ሥርዓቷን በማስከበር በተሻለ ሁኔታ እየመሩ በመገኘታቸው ምስጋና አቅርበዋል።

በተለይም ከዚህ ቀደም ከቤተ ክርስቲያን እጅ ወጥተው በልዩ ልዩ አካላት ተይዘው የቆዩ የቤተ ክርስቲያን ርስቶችና ቦታዎች በሰላማዊ መንገድ ወደ ባለቤታቸው እንዲመለሱ መደረጉ ታላቅ ድል መሆኑን ገልጸዋል።

በዘመነ ማርቆስ በአንድ ዓመት ውስጥ ያሳዩትን ለውጥ በማድነቅ፣ ዘመነ ሉቃስም በሰላምና በጤና እንዲጠብቃቸውና የቤተ ክርስቲያናችን ኩራትና ክብር የሆነ ሥራ እንዲያሳዩ ልባዊ ምኞታቸውን ገልጸዋል።

የአዲስ አበባ ሀገረ ስብከት ሥራ አስኪያጅ መልአከ ብርሃን ሰሎሞን በቀለ በበኩላቸው ብፁዕነታቸውን ከዘመነ ማርቆስ ወደ ዘመነ ሉቃስ በሰላምና በጤና አደረስዎ በማለት መልካም ምኞታቸውን ገልጸዋል።

መልአከ ብርሃን ሰሎሞን በቀለ በመልእክታቸው በዘመነ ማርቆስ ብፁዕ አቡነ ሳዊሮስ በጸሎትና በአመራር በኢትዮጵያ ኦርቶዶክስ ተዋሕዶ ቤተ ክርስቲያን ለውጦችን ያሳዩበትና ቤተ ክርስቲያኗም ታላቅነቷን የምታሳይበት ደረጃ ላይ እንድትደርስ ያደረጉት ጥረት የሚደነቅ መሆኑን ገልጸዋል።

በዘመነ ሉቃስም ከዚህ በበለጠ አርአያና አቅጣጫ የሚሰጥ ለውጥ እንደሚያመጡ ተስፋ እንደሚያደርጉ ጠቁመዋል። በአዲስ አበባ ሀገረ ስብከትም እየታዩ ያሉትን ችግሮች በቅርብ በመሆን፣ አመራርና መመሪያ በመስጠት ለውጥ ለማምጣት ቀንና ሌሊት እየሠሩት ላለው ሥራ ከልብ ምስጋና አቅርበዋል።

የአዲስ አበባ ሀገረ ስብከትም በጠቅላይ ቤተ ክህነቱና በብፁዕነታቸው መመሪያና አቅጣጫ ሰጪነት በልማት ሥራዎች ላይ በመሥራት፣ ስብከተ ወንጌልን በማስፋፋትና ከተገፉ ሊቃውንት ጎን በመቆም ለመሥራት እየተዘጋጁ እንደሚገኙም ገልጸዋል።

የጠቅላይ ቤተ ክህነት ዋና ሥራ አስኪያጅ ብፁዕ አቡነ ሳዊሮስ በበኩላቸው ለመጀመሪያ ጊዜ የአሁኑ የአዲስ አበባ ሀገረ ስብከት የሥራ ሐላፊዎች ላደረገላቸው የአዲስ ዓመት መልካም ምኞት ምስጋና አቅርበው፣ በአዲሱ ዓመት ቤተ ክርስቲያንን በእግዚአብሔር በተሰጠን ሐላፊነት በሥርዐት በመመራት፣ በጋራ ቁርጠኝነትና በትብብር ማስተዳደር እንደሚገባ አሳስበዋል።

ቤተ ክርስቲያንን ስናስተዳድር ከሙስናና ከዘረኝነት ነፃ ሆነን፣ በታማኝነት፣ በፍትሐዊነትና በኃላፊነት መምራት ከቻልን ውጤታማ ሥራ መሥራት እንደምንችል ጠቁመዋል። እንዲሁም በየዘመኑ የሚያጋጥሙ ፈተናዎችን በንቃት መከታተልና የሚነሱ ችግሮችን በጋራ መፍታት እንደሚገባ የቤተ ክርስቲያንን ችግሮች ሌላ አካል መጥቶ እንዲፈታልን ከመጠበቅ ይልቅ በጋራ ኃላፊነት መፍትሔ ማምጣት እንዳለብን አሳስበዋል።

አክለውም አሠራሮችን በየጊዜው በመፈተሽ፣ ስህተቶችን በማረም አዳዲስ የሚመጡ አመራሮችን በምክርና በትብብር በማገዝ የቤተ ክርስቲያንን ሥራ ወደ ተሻለ ውጤት ማሸጋገር እንደሚቻልም ገልጸዋል።

በመጨረሻም አዲሱ ዓመት እግዚአብሔር አምላካችን ሀገራችንንና ቤተ ክርስቲያናችንን እንዲጠብቅልን፣ ዘመኑንም የሠላም፣ የፍቅር ፣ የሥራ፣ የስኬት፣ የበረከትና የጤና ዘመን ያድርግልን በማለት አባታዊ መልካም ምኞታቸውን አስተላልፈዋል።

ዘጋቢ ጽናት አስቻለው

ነቢዩ ሚክያስ

ክቡር አቶ አየለ ተሾመ የዳሽን ባንክ የስትራቴጂ ምክትል ፕሬዚዳንት እንደተናገሩት “ዳሽን ባንክን በመወከል እንኳን ለ፳፻፲፱ ዓ.ም አዲስ ዓመት በሰላም አደረሳችሁ፣ አደረሰን ለማለት እወዳለሁ፤ ዳሽን ባንክ ከተቋቋመበት አንዱ ዕሴቱ መካከል ኅብረተሰቡን በተገኘው አጋጣሚ ሁሉ ማገዝ ነው” ብለዋል፡፡

ምክትል ፕሬዚዳንቱ አክለውም “ለአዲስ ዓመት በኑሮ አነስተኛ ደረጃ ላሉ የኅብረተሰብ ወገኖቻችን የተለያዩ ድጋፎችን ስናደርግ ቆይተናል፤ ዛሬም እዚህ የተገኘነው በመንበረ ፓትርያርክ ለሚገኙ ወገኖቻችን ለበዓል እንኳን አደረሳችሁ ለማለትና መጠነኛ ስጦታ ለማበርከት ነው” ሲሉ ገልጸዋል፡፡ ወደፊትም ይኸው ድጋፍ የሚቀጥል መሆኑን የገለጹት ምክትል ፕሬዚዳንቱ ከኢትዮጵያ ኦርቶዶክስ ተዋሕዶ ቤተክርስቲያኗ ጎን ሆነን በሚያስፈልገው ሁሉ ለማገዝ ዝግጁ ነን” ሲሉም ገልጸዋል፡፡

ብፁዕ አቡነ ሳዊሮስ የመንበረ ፓትርያርክ ጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር አህጉረ ስብከት ሊቀ ጳጳስ “እንኳን ለ፳፻፲፱ ዓ.ም አዲሱ ዘመን በሰላምና በጤና አደረሰን፣ አደረሳችሁ፤ ዳሽን ባንክ ለወገኖቻችን መደገፍ አለብን ብላችሁ ስለመጣችሁ እናመሰግናለን” ብለዋል፡፡ብፁዕነታቸውም አያይዘውም “ለወገኖቻችን ያደረጋችሁት ድጋፍ ቤተክርስቲያን ታመሰግናችኋለች እግዚአብሔር አምላክ ሥራችሁን ያቃናላችሁ፤ ከዚህ በበለጠ እንድታገለግሉ ያድርግልን፤ ዘመኑንም የሰላም፣ የበረከት፣ የአንድነት ያድርግልን” ሲሉ አባታዊ መልእክታቸውን አስተላልፈዋል፡፡

“ዳሽን ባንክ በሁሉም ሥፍራዎች ድጋፍ እያደረገ ይገኛል፤ ዛሬ እዚህ ስንመጣ ደስ ብሎናል” ያሉት ምክትል ፕሬዚዳንቱ ክቡር አቶ አየለ ተሾመ “በግቢው ውስጥ እየተከናወኑ ያሉ የልማት ሥራዎችን አይተናል፡፡ የኢትዮጵያ ኦርቶዶክስ ተዋሕዶ ቤተክርስቲያን ጥንታዊት፣ ታሪካዊት ብቻ ሳትሆን በጣም ብዙ የልማት ሥራዎችንም እንደምትሠራ፣ ኅብረተሰቡንም በብዙ ነገሮች እያገለገለች እንደሆነ እናውቃለን፡፡ ይህን የልማት ሥራ ደግሞ ከፍ አድርጎ ለመሥራት ድጋፍ ያስፈልጋል፤ ዳሽን ባንክ በማንኛውም የባንክ አገልግሎት ለማገዝ ዝግጁ ነው” ሲሉ ገልጸዋል፡፡

በመጨረሻም ብፁዕነታቸውም “መንበረ ፓትርያርክ ጠቅላይ ቤተክህነት የኢትዮጵያ ኦርቶዶክስ ተዋሕዶ ቤተክርስቲያን ራስ ዋናው መሥሪያ ቤት መቀመጫ ግቢውን እያስዋብን የተለያዩ የልማት ሥራዎች እየሠራን እንገኛለን፤ ይህን ስንሠራ እንደናንተ ያሉ ሌሎችም እየረዱን፣ እያገዙን ነው፡፡ በተለይም የአዲስ አበባ ከተማ ከንቲባ ክብርት ወይዘሮ አዳነች አቤቤ ከኮሪደር ልማት ጋር ተያይዞ የመንበረ ፓትርያርክ ቅድስተ ቅዱሳን ገዳም ቤተክርስቲን አጥር ሠርተውልናል፣ በመንበረ ፓትርያርክ ቅጽር ግቢ ለ50 ዓመታት በሌሎች ተይዞ የነበረውን ቦታ አስመልሰውልናል፤ የኮሪደር ልማት በሚሠራባቸው አብያተ ክርስቲያናት አካባቢም ርዳታ እያደረጉልን በመሆኑ ምስጋናችንን እናቀርባለን፡፡” ብለዋል፡፡

በቅርቡም አዲሱ አዳራሽ ይመረቃል፤ በቀጣይ የተለያዩ የልማት ሥራዎችን ከዚህ በበለጠ ስለምንሠራ እንድታግዙን፤ ዛሬ በዚህ ተገኝታችሁ ላደረጋችሁልን ድጋፍ እናመሰግናለን ሲሉ አባታዊ መልእክታቸውን አስተላልፈዋል፡፡

ከሀገር ውጭ በተለያዩ አህጉር የምትገኙ፣

የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፣

በሕመም ምክንያት በየፀበሉና በየሆስፒታሉ ያላችሁ፣

እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያት በሙሉ፣

በየዓመቱ የይቅርታ እጁን እየዘረጋ የሚመግበን እግዚአብሔር አምላካችን እንኳን ከዘመነ ማርቆስ ሁለት ሺሕ ዓሥራ ስምንት ዓመተ ምሕረት ወደ ዘመነ ሉቃስ ሁለት ሺሕ ዓሥራ ዘጠኝ ዓመተ ምሕረት በሰላም አደረሰን አደረሳችሁ!

“ወይእዜኒ ነስሑ ወተጠመቁ፤ ወይደመሰስ ለክሙ ኃጢኣትክሙ፤ ወይመጽእ ለክሙ መዋዕለ ሣህል እምቅድመ ገጹ ለእግዚአብሔር፤ከጌታ ፊት የመጽናናት ዘመን እንዲመጣላችሁ፣ ኃጢአታችሁም እንዲደመሰስ አሁንም ንስሐ ግቡ ተመለሱም” (የሐ.ሥራ ፫፡፲፱)

የሰው ልጅ በስሑት ስራውና አእምሮው ምክንያት የኃጢአት ማዕበል በሚያናውጠው ባሕረ ዓለም እንደሚኖር ይታወቃል፤ የዓለሙ ባሕር በማዕበሉ በተናጠ ቁጥር በመርከቡ ተሳፍረው የሚጓዙ ሁሉ ጭንቀት ላይ መውደቃቸው የማይቀር ነው፤ በዚህ ጊዜ የሚያጽናና የቊርጥ ቀን ረዳትና ኃይል ያስፈልጋቸዋል፤ ሆኖም ረዳት በፍጥነት እንዲደርስላቸው መጮኽና መጣራት ከነሱ ያስፈልጋል፤ የምንኖርባት ዓለም ወይም ፕላኔት የክፋትና የጭካኔ ማዕበል በእጅጉ እየበረታባት መጥቶአል፤ ዓለማችን በስጋትና በፍርሓት፣ በራስ ወዳድነትና ባለመተማመን ተከባለች፣ በመሆኑም ዓለማችን ከምን ጊዜውም በላይ የመጽናናት ዘመን እንዲመጣላት ትሻለች፤ እግዚአብሔር ለፍጥረቱ የሚያስፈልገውን ሁሉ አሟልቶ የሰጠ አምላክ እንደሆነ በግልጽ የሚታይ ነው፤ ይሁንና እግዚአብሔር ከኛ የሚፈልጋቸው ብዙ ነገሮች እንዳሉ በማያሻማ ሁኔታ አሳውቆአል፤ ከእነሱም መካከል በእውነተኛው መንፈስ ንስሐ መግባት፤ መጸጸትና መመለስ ናቸው፤ የዓለምን ሕዝብ በወሳኝነት ማጽናናት የሚችል እግዚአብሔር ብቻ ነው፤ እኛ ራሳችንን በራሳችን ለማጽናናት እንኳ በቂና ዘላቂ ዓቅም የሌለን ውሱኖች ነን፤ ይህንን እውነት ዓውቀን የእርሱን ርዳታ እንድንሻ እግዚአብሔር ይፈልጋል፤ ይህንንም ከልብ በመጸጸትና ከቀደመው ስሑት ተግባራችን በመመለስ በፊቱ ተንበርክከን መታዘዛችንን በተጨባጭ እንድናሳይ ይፈልጋል፡፡

እግዚአብሔር ከታላቅ ቸርነቱ የተነሣ የመታደስ ዘመንን በየዓመቱ ከመስጠት አልተቈጠበም፤ እንደ ሁሉጊዜ አሁንም አዲሱን ዘመን ባርኮ ሰጥቶናል፤ ሆኖም አዲሱ ዘመን የመጽናናት ዓመት እንዲሆንልን የእኛ ተሳትፎ ወሳኝ ሚና እንዳለው መዘንጋት የለብንም፤ ከሁሉ በፊት ያለፈውን ዓመት እንደ ግልም፣ እንደ ማኅበረ ሰብም፣ እንደ ሃገርም፤ እንደ ሃይማኖትም በኅሊናችን ልናስበውና ልንገመግመው ይገባል፤ ያለፈውን ዓመት በንጹህ ኅሊናችን በጥልቀት ስንገመግመው፤ የመጣንበትና ያለፍንበት ስለሆነ ኮለል ብሎ በፊታችን ይታያል፤ ጥቅሙም ሆነ ጉዳቱ በሙሉ ከኛ የራቀ ስለማይሆን ዳኝነት ለመስጠትና ውሳኔ ለመወሰን አንቸገርም፤ በመሆኑም ለፈጸምነው ስሕተት ይቅርታን ከመጠየቅ ባሻገር ድጋሚ ላንደግመው መወሰንና ለተግባራዊነቱ በጽናት መቆም አለብን፤ እኛ በዚህ ደረጃ ከቀደመው ስሕተታችን ተጸጽተን ንስሐ ከገባን እግዚአብሔር ከኛ የሚፈልገውን አግኝቶአል ማለት ነው፤ በመካከላችንም ትክክለኛ መግባባት ተፈጥሮአል ማለት ነው፤ በዚህ ጊዜ እሱም ዘላቂ የሆነ የመጽናናት ዘመን ለኛ ይሰጣል፡፡

በዓለሙ እንዳለው ሁሉ እኛም ወዲያና ወዲህ ከሚያወዛውዝ ፈተና አላመለጥንም ያለፈውን ዓመት በንጹሁ አእምሮአችን ስንመዝነው፤ ጥሩ የሚባል አልነበረም፤ በየአካባቢው ግጭቶች የቀጠሉበት፣ የሰው ደም የፈሰሰበት፣ ዕገታዎች የተፈጸሙበት፣ ገዳማትና አብያተ ክርስቲያናት የተቃጠሉበት፣ ምእመናን የተገደሉበትና የተፈናቀሉበት፣ ስጋት ያየለበት፣ ኑሮም የተወደደበት፣ ሌላም ሌላም ለሰው ልጅ የማይበጁ ነገሮች የተከሠቱበት ዓመት አሳልፈናል፤ ታዲያ አዲሱን ዘመን ስንቀበል እነዚህን ሁሉ እንዳሉ ይዘናቸው እንቀጥል ይሆን? ይህስ ከሆነ ‹‹እንኳን ለአዲሱ ዘመን አደረሳችሁ›› መባባሉ ትርጉም ይኖረው ይሆን? እንዲህስ ልንሆን ፈጽሞ አይገባም፤ ይልቁንም ባለፈው ዓመት የሆኑትን ሁሉ ላንደግማቸው ሁላችንም እንወስን፤ እነሱንም ማስቀረት እንችላለን፤ ምክንያቱም ችግሮቻችን በሙሉ ሰው ሰራሽ እንጂ የተፈጥሮ አይደሉም፤ ሰው ሰራሽ ችግሮች ደግሞ በሰው እንደመጡ ሁሉ በሰው ሊቀሩ የሚችሉ ናቸውና እናስቀራቸው፤ ጦርነቱን፣ ዕገታውን፣ ጥላቻውን፣ ፉክክሩን፣ እልከኝነቱን፣ ጭካኔውን ራስ ወዳድነቱን ግድያውን፣ አብያተ ሃይማኖት ማቃጠሉንና ማፍረሱን እኛው እንዳመጣነው እኛው ማስቀረት እንችላለን፤ ስንተወው እኮ ይቀራል፡፡

ስለሆነም ከልኂቅ እስከ ደቂቅ ያላችሁ ኢትዮጵያውያን ልጆቻችን ሁሉ ኢትዮጵያን እንዳለች የጋራ ዕድልና ሃብት አድርጋችሁ ተቀበሉ፤ ሌላውን ረጅም ጊዜ ሰጥታችሁም ቢሆን በውይይትና በመግባባት እየፈታችሁ በአንድነት ቀጥሉ፤ በይቅርታመንፈስ በአንድነት ተቃቅፎ ከመቀጠል ውጭ ሌላ የተሻለ ዕድል እንደሌለ በውል ተገንዘቡ፤ ለዚህ ሁላችሁም የበኩላችሁን ልባዊ ጥረት ከማድረግ አትቈጠቡ ብለን ከልብ እንመክራለን፡፡

ለሁሉም መድኃኒቱ ቀና አእምሮ ነውና በአዲሱ ዓመት እግዚአብሔር ቅንና በጎ አሳቢ አእምሮ እንዲሰጠን በሱም ያሉብንን ጉድለቶች አርመንና አስተካክለን ሰላም የሰፈነበትን የመጽናናት ዘመን ማየት እንችል ዘንድ እግዚአብሔር አምላካችንን እንለምን፤ እኛም በንስሐ እንመለስ እያልን በድጋሚ እንኳን ለአዲሱ ዘመን በሰላም አደረሳችሁ በማለት አባታዊ መልእክታችንን በእግዚአብሔር ስም እናስተላልፋለን ፡፡

እግዚአብሔር መልካም አዲስ ዘመን ያድርግልን፡፡

እግዚአብሔር ኣምላካችን ኢትዮጵያንና ሕዝቦችዋን ይባርክ!

ወስብሐት ለእግዚአብሔር ኣሜን!!ፎቶ Eotc tv

አባ ማትያስ ቀዳማዊ

ፓትርያርክ ርእሰ ሊቃነ ጳጰሳት ዘኢትዮጵያ ሊቀ ጳጳስ

ዘአኲስም ወዕጨጌ ዘመንበረ ተክለሃይማኖት፣

መስከረም ፩ ቀን ፳፻፲፱ ዓ.ም

አዲስ አበባ – ኢትዮጵያ