የ2019 ዓ/ም የመስቀል ደመራ በዓል ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት፣

ብፁዕ ወቅዱስ አቡነ ባስልዮስ ማርቶማ ማቲዮስ 3ኛ የህንድ ማላንካራ ኦርቶዶክስ ቤተ ክርስቲያን ፓትርያርያርክ፣

ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ፣የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ

ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ፣

ክብርት ከንቲባ አዳነች አቤቤ የአዲስ አበባ አስተዳደር ከንቲባ፣ክብርት ወ/ሮ ሸዊት ሻንካ የወጣቶችና ስፖርት ሚኒስቴር ሚኒስትር፣ብፁዓን አበው ሊቃነ ጳጳሳት፣የጠቅላይ ቤተ ክህነት የመምሪያና የድርጅት ኃላፊዎች፣አምባሳደሮች፣ የአዲስ አበባ ከተማ አስተዳደር የሥራ ኃላፊዎች በተገኙበት በታላቅና ደማቅ ሃይማኖታዊ ሥነሥርዓት ተከብሮ ውሏል።

በዓሉ በተዋበና በደመቀ መልኩ ተከብሮ መዋል ይችል ዘንድ ሕዝበ ክርስቲያኑ ዝናብና ቁር ሳይበግረው በጽናትና ፍጹም በሆነ መንፈሳዊነት በዓሉን ማክበሩ እጆግ የሚያስደንቅ ሲሆን መርሐ ግብሩ በተቀመጠለት ጊዜ ገደብ መጠናቀቅ እንዲችል ተረኛው ደብር፣ወጣት የሰንበት ትምህርት ቤት ልጆቻችንና በበዓሉ ላይ ልዩልዩ መንፈሳዊ ትርኢት ስታቀርቡ የነበራችሁ በሙሉ ላሳያችሁት ጨዋነት የተሞላው መታዘዝ ቅድስት ቤተኮርስቲያናችን ልባዊ ምስጋናዋን ታቀርባለች።

ሕዝበ ክርስቲያንኑ በዓሉ ወደ ሚከበርበት መስቀል አደባባይ በሚጓዝበት ወቅት ፍጹም ጨዋነትና መንፈሳዊነትን በተላበሰ መልኩ ለመንግስት የጸጥታ አካላት ትብብር በማድረግ፣ራሱም ጸጥታ አስከባሪና ተባባሪ በመሆን ያሳየው ድንቅ ትብብርም የሚደነቅ ሲሆን በዓሉን ከሚያውኩ ተግባራት በማራቅም ቤተክርስቲያን ከበዓሉ አስቀድማ ያስተላለፈቻቸውን የጥንቃቄ መልዕክታት በሚገባ በመፈጸም ታዛዥነቱን በማስመስከሩ ቅድስት ቤተ ክርስቲያን የተሰማትን ደስታ ትገልጻለች።

በሌላ በኩል በዓላችን ያለ አንዳች የጸጥታ ችግር ተከብሮ መዋል ይችል ዘንድ የፌዴራልና የክልል የደህንነትና የጸጥታ አካላት፣የአዲስ አበባ ሰላም ጸጥታ ቢሮና የአዲስ አበባ ፓሊስ ኮሚሽን እንዲሁም ሌሎች የጸጥታ አካላት ሙያዊ ግዴታችሁን በሚገባ በመወጣት ያደረጋችሁት አስተዋጽኦ ከፍተኛ ነውና ቅድስት ኦርቶዶክሳዊት ተዋሕዶ ቤተክርስቲያናችን ልባዊ ምስጋናዋን ስታቀርብላችሁ በከፍተኛ ደስታ ነው።

የአዲስ አበባ ከተማ አስተዳደርም በዓሉ እጅግ ደማቅ በሆነ መልኩ እንዲከበር የሚያስፈልጉ ግብዓቶችን ማለትም የስቴጅ፣የክብር እንግዶች ወንበር፣አካባቢውን የማስዋብ ሥራና የድምጽ ማጉያዎችን ወጪ በመሸፈን እንዲሁም ለከተማ አስተዳደሩ ያቀረበቻቸው ጥያቄዎች ሁሉ በፍጥነትና በቅንነት ምላሽ በመስጠት ላደረገልን ትብብር እያመሰገነች በተለይም ክብርት ከንቲባ አዳነች አቤቤ ቀልጣፋ አመራር በመስጠት ላበረከቱት አስተዋጽኦ ልባዊ ምስጋናዋን ታቀርባለች ።ይህ አይነቱ መተጋገዝና የጋራ በሚያደርጉን ጉዳዮች ዙሪያ በጋራ የመስራት ልምዳችንም የበለጠ ተጠናክሮ መቀጠል የሚገባው መሆኑንም በዚህ አጋጣሚ ለመግለጽ ትወዳለች።

በሌላ በኩል በዓሉ ባማረና በደመቀ መልኩ ተከብሮ መዋል ይችል ዘንድ በጠቅላይ ቤተክህነትና በአዲስ አበባ ሀገረ ስብከት ሥር የተደራጁት ዐበይትና ንዑሳን ኮሚቴዎችም ከአዲስ አበባ ከተማ አስተዳደር፣ከፌዴራልና ከክልል የጸጥታ ተቋማት ጋር በጥምረት የሰራችሁት ስራዎች እጅግ ውጤታማና ስኬታማ በመሆናቸው እንኳን ደስ አላችሁ ለማለት ትወዳለች።

በአጠቃላይ የዘንድሮው የመስቀል ደመራ በዓላችን በተዋበ፣በተሳካና በደመቀ መልኩ ተከብሮ መዋል ይችል ዘንድ አስፈላጊውን ድጋፍና ትብብር ላደረጋችሁልን ተቋማት በሙሉ በተለይም በዓላችን ፍጹም መንፈሳዊ በዓል መሆኑን በዓለም መድረክ በማሳየት ደረጃ ዝናብና ቁር ሳይበግራችሁ በጽናት በመቆም በዓላችሁን በሚገባ ላከበራችሁ ኦርቶዶክሳዊያን ልጆቻችን በሙሉ እንኳን ደስ አላችሁ፣ እንኳን አደረሳች፤ በዓለ መስቀሉ የሰላም፣የደስታና የፍቅር በዓል ይሁንላችሁ በማለት ቅድስት ቤተክርስቲያናችን መልካም ምኞቷን ትገልጻለች።

የኢትዮጵያ ኦርቶዶክስ ተዋሕዶ ቤተክርስቲያን

ሕዝብ ግንኙነት መምሪያ

መስከረም ፲፯ ቀን ፳፻ ፲ወ፱ ዓ.ም

አዲስአበባ -ኢትዮጵያ

«ወአብጽሖሙ ክልኤሆሙ በአሐዱ ሥጋሁ ለኀበ እግዚአብሔር በመስቀሉ ወለጽልእ ቀተሎ ቦቱ ጥልንም በመስቀሉ ገድሎ በእርሱ ሁለታቸውን በአንድ አካል ከእግዚአብሔር ጋር ያስታርቅ ዘንድ ነው» (ኤፌ. 2፡16)

በመላዋ ኢትዮጵያና በዓለም ሁሉ የምትገኙ የኢትዮጵያ ኦርቶዶክስ ተዋሕዶ ቤተ ክርስቲያን ልጆች፣ እንኳን ለ2019 ዓ.ም. ዘመነ ሉቃስ በዓለ መስቀል አደረሳችሁ፡፡

መስቀል የሰላም፣ የፍቅርና የዕርቅ ምልክት ነው፡፡ የአዳም ልጆች ሁሉ ከጠላት ዲያብሎስ ወጥመድና ከጠላት ቀስት ያመለጡበት ምልክት መስቀል ነው፡፡ በቀደመ በደሉ ከእግዚአብሔር ርቆ የነበረ ሁሉ በመስቀል ተስቦ ወደ ክርስቶስ ቀርቧል፡፡

ብርሃነ ዓለም ቅዱስ ጳውሎስ ለኤፌሶን ክርስቲያኖች በጻፈው መልእክቱ «ጥልንም በመስቀሉ ገድሎ በእርሱ ሁለታቸውን በአንድ አካል ከእግዚአብሔር ጋር ያስታርቅ ዘንድ ነው» ብሎ እንደተናገረው፣ መስቀል የመለያየትና የጥል ግንብ የፈረሰበት፣ የእውነተኛ ዕርቅና የሰላም መድረክ ነው።

ነገረ መስቀል በቤተ ክርስቲያናችን አስተምህሮ ውስጥ የማዕዘን ድንጋይ ነው። በኃጢአት ምክንያት በሰውና በእግዚአብሔር፣ በሰውና በመላእክት፣ እንዲሁም በሕዝብና በአሕዛብ መካከል ተፈጥሮ የነበረው የመለያየትና የጥል ግንብ በክርስቶስ መስቀል ፈርሷል።

በመስቀሉ የተቀዳጀነው ይህ ድል በሕይወታችን የሚገጥሙንን ፈተናዎችና መከራዎች በጽናት አልፈን ወደ መንፈሳዊ ከፍታ እንድንደርስ ኃይል የሚሆነን ነው፡፡

በበዓሉ ፍቅር ይገለጽበታል፣ መከባበርም ይታይበታል፡፡ ቅድስት ቤተ ክርስቲያን የሥርዓት ምንጭ እንደመሆኗ በዓሉን በሥርዓት ስናከብር በሚገለጠው ውበት ኦርቶዶክሳዊ ማንነታችን ይገለጻል፡፡ በተለይ የዚህ ዓመት በዓለ መስቀል የሕንድ ማላንካራ ኦርቶዶክስ ቤተ ክርስቲያን ፓትርያርክ ብፁዕ ወቅዱስ ባስልዮስ ማርቶማ ማቴዎስ ሣልሳዊ ከብፁዓን ሊቃነ ጳጳሳት ጋር ወደ ኢትዮጵያ መጥተው በዓሉን የሚያከብሩ መሆኑ ለበዓሉ የተለየ ድምቀት ይሰጣል፡፡ ከዚህም በላይ በዓሉ ዓለም አቀፋዊ ትኩረት እንዲያገኝ ያደርጋል፡፡ ስለዚህ አለባበሳችን፣ ዝማሬያችንና አጠቃላይ እንቅስቃሴያችን ሁሉ በሥርዓት የሚከናወንና ሰላምን የሚሰብክ ሊሆን ይገባል፡፡

የኢትዮጵያ ኦርቶዶክስ ተዋሕዶ ቤተ ክርስቲያን ልጆች ይህን የመሰሉ የአደባባይ በዓላትን በምናከብርባቸው ጊዜያት ሁሉ ተለይተን የምንታወቅባቸው አለባበሶች አሉን፡፡ እነዚህም ከቤተ ክርስቲያናችን ሥርዓትና ከኢትዮጵያዊ ባህላችን ጋር የተስማሙ ናቸው፡፡ ነጭ ልብስ ለብሶ ሰላምን መስበክ ከጥንት አባቶቻችን ጀምሮ በበዓላት የሚከናወን ሥርዓት ነውና ይህንኑ ልንከተል ይገባል፡፡ ከዚህ ሥርዓት የወጡና በተለያየ መንገድ በሚዘጋጁ አልባሳት ልዩነትን የሚፈጥሩ አለባበሶችንና ሌሎች ምክንያቶችን ሁሉ ማስወገድ ይገባል፡፡

የበዓሉን ሰላም ለማስጠበቅና በዓሉ በሰላም ተከብሮ መዋል እንዲችል ወደ ሁሉም የመስቀል ደመራ ማክበሪያ ሥፍራዎች ምዕመናን በምትሄዱበት ጊዜ በጸጥታ አካላት ፍተሻ ስለሚደረግ ለፍተሻ ሙሉ ፈቃደኛ በመሆን ለበዓሉ በሰላም መከበር የበኩላችሁን ክርስቲናዊ አስተዋጽኦ እንድታደርጉ እንጠይቃለን፡፡

ይህን ታላቅ መንፈሳዊና ባህላዊ መገለጫ የሆነ በዓለ መስቀል ይዘቱና መንፈሳዊ ቅድስናው ሳይበላሽ ለቀጣዩ ትውልድ ማስተላለፍም በዓሉን ከማክበር ጋር እያንዳንዳችን ልናስበው የሚገባ አደራ ነው። በደመራው ጢስ መሪነት የተቀበረው መስቀል እንደተገኘ ሁሉ፣ ዛሬም በችግርና በልዩነት ሥር የተሸፈኑ መልካም ነገሮቻችንን በመስቀሉ ብርሃንነት አውጥተን አዲስ ተስፋን ልንተክል ይገባል።

እግዚአብሔር አምላካችን በዓሉን የሰላም፣ የፍቅርና የበረከት ያድርግልን፡፡

መልካም የመስቀል ደመራ በዓል!

ወስብሐት ለእግዚአብሔር።

አባ ሳዊሮስ

የኢትዮጵያ ኦርቶዶክስ ተዋሕዶ ቤተክርስቲያን ዋና ሥራ አስኪያጅ፣

የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ

የምሥራቅ ካቶሊኮስ እና የማላንካራ ሜትሮፖሊታን የሆኑት የሕንድ ማላንካራ ኦርቶዶክስ ቤተክርስቲያን ፓትርያርክ ብፁዕ ወቅዱስ አቡነ ባስልዮስ ማርቶማ ማቴዎስ ፫ኛ በሕንድ ማላንካራ ኦርቶዶክስ ቤተ ክርስቲያን እና በኢትዮጵያ ኦርቶዶክስ ተዋሕዶ ቤተ ክርስቲያን መካከል ያለውን ታሪካዊ ግንኙነት ለማጠናከር ከመስከረም 14–18 ቀን 2019 ዓ.ም በኢትዮጵያ ይፋዊ ሐዋርያዊ ጉብኝት በማድረግ ላይ ይገኛሉ።

​በኢትዮጵያ ኦርቶዶክስ ተዋሕዶ ቤተ ክርስቲያን ግብዣ መሠረት ቅዱስነታቸው በታላቁ የቤተክርስቲያንናችን የመስቀል ደመራ በዓል በመገኘት ከብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ጋር በመሆን ቃለ ምዕዳንና ቡራኬ ያስተላልፋሉ ።

ብፁዕ ወቅዱስ አቡነ ባስልዮስ ማርቶማ ማቴዎስ ፫ኛ ወደ ኢትዮጵያ በመጡበት በዚህ ጉብኝት በመንበረ ጸባዖት ቅድስት ሥላሴ ካቴድራል አቀባበል ተደተደርጎላቸዋል። በዚሁ ካቴድራል ሥርዓተ ጸሎት አድርሰዋል ። ቅዱስነታቸው በአቀባበል ሥነ ሥርዓቱ መልዕክት አስተላልፈዋል ።

​ይህ ሐዋርያዊ ጉብኝት በሕንድ እና በኢትዮጵያ አብያተ ክርስቲያናት መካከል ያለውን መንፈሳዊ አንድነት በጎላ ሁኔታ የሚያሳይ ነው። ሁለቱም የእህትማች አብያተ ክርስቲያናት የኦሬንታል ኦርቶዶክስ ቤተሰብ አባላት እንደመሆናቸው መጠን፣ በተመሳሳይ ዶግማ እና ምስጢራተ ቤተ ክርስቲያን አንድ ሆነው በባህላቸው እና ቋንቋቸው የተለያዩ ናቸው።

​የሁለቱ አብያተክርስቲያናት ግንኙነት ታሪካዊ መሠረት አለው። ከዚህ ታሪካዊ ግንኙነት በይፋዊቱ የሚጠቀሰው በ1965 (እ.ኤ.አ) ካቶሊኮስ ባስሊዮስ ኦገን ፩ኛ በአዲስ አበባ በተካሄደው ታሪካዊ የኦሬንታል ኦርቶዶክስ አብያተ ክርስቲያናት መሪዎች ጉባኤ ላይ ተሳታፊ ነበሩ። በ2013 (እ.ኤ.አ) ካቶሊኮስ ባስልዮስ ማርቶማ ጳውሎስ ፪ኛ ለብፁዕ ወቅዱስ አቡነ ማትያስ ፩ኛ የፓትርያርክነት በዓለ ሢመት ወደ ኢትዮጵያ መጥተው ነበር። በ2016 (እ.ኤ.አ) ደግሞ ብፁዕ ወቅዱስ አቡነ ማትያስ ፓትርያርክ በሁለቱ አብያተ ክርስቲያናት መካከል ያለውን ግንኙነት የበለጠ ለማጠናከር ወደ ሕንደኬ ኬርላ ተጉዘው ሐዋርያዊ ጉብኝት አድርገዋል።

​የብፁዕ ወቅዱስ ማርቶማ ማቴዎስ ፫ኛ ጉብኝት ይህንን ርቀት ያልገደበው የወንድማማችነት እና የእህትማችነት ግንኙነት ያስቀጥላል።

የሕንድ ኦርቶዶክስ ቤተክርስቲያን እና የኢትዮጵያ ኦርቶዶክስ ተዋሕዶ ቤተ ክርስቲያን በቋንቋ ባህል እና ትውፊት ቢለያዩም በዶግማ ባላቸው አንድነት በአንድ መንበር ቀድሰው ምስጢረ ቁርባንን የሚካፈሉ እምነት አንድ ያደረጋቸው አብያተክርስቲያናት ናቸው።

የሕንድ ማላንካራ ኦርቶዶክስ ቤተክርስቲያን ፓትርያርክ ብፁዕ

ወቅዱስ አቡነ ባስልዮስ ማርቶማ ማቴዎስ ፫ኛ በመንበረ ጸባዖት ቅድስት ሥላሴ ካቴድራል ጸሎት ሲያደርጉ የመጀመሪያቸው አይደለም። ከዚህ ዓለም ድካም ባረፉት በቀድሞው የቤተክርስቲያናችን ፓትርያርክ በብፁዕ ወቅዱስ አቡነ ጳውሎስ የቀብር ሥነ ሥርዓት ወቅት ተገኝተው ጸሎተ ፍትሐት ማድረጋቸው ይታወሳል።

ወቅዱስ አቡነ ባስልዮስ ማርቶማ ማቴዎስ ፫ኛ ” በዓለም ዙሪያ ባደረግኳቸው ሐዋርያዊ ጉዞዎች ሁሉ እንደ ኢትዮጵያ ኦርቶዶክስ ተዋሕዶ ቤተ ክርስቲያን ሞቅ ያለና ልብን የሚነካ አቀባበል ያደረገልኝ የለም። ዛሬም በካቴድራሉ የተደረገልኝ አቀባበል፣ የቀረበው ዝማሬና ክብር ልባችንን በጥልቅ ነክቶታል” ሲሉ በመንበረ ጸባዖት ቅድስት ሥላሴ ካቴድራል በተደረገላቸው አቀባበል ላይ ተናግረዋል ።

በየራሳቸው ትውፊት እና ሥርዓተ ቅዳሴ ያላቸው የሕንድ እና የኢትዮጵያ አብያተ ክርስቲያናት ቅዱሳን አባቶች በቦሌ ደብረ ሣሌም መድኃኔዓለም ካቴድራል በአንድ መንበር፣ በአንድ የኦርቶዶክስ እምነት፣ በአንድ ሥርዓተ ቁርባን በሁለት ቋንቋዎች ቀድሰው ከቅዱሱ መለኮታዊ ምስጢር በአንድነት ይካፈላሉ። ይህም ግንኙነቱ ከተቋማዊነት አልፎ በመንፈስ ቅዱስ የተቃኘ ፍፁም መንፈሳዊ አንድነታቸውን ያሳያል።

​ይህ የቅዱስነታቸው ሐዋርያዊ ጉብኝት በሁለቱ እህትማማች አብያተ ክርስቲያኖቻችን መካከል ያለውን ጥብቅ ግንኙነት ያሳድጋል ።

የኢትዮጵያ የሥነ መለኮት ተማሪዎች በሕንድ ሴሚናሪየሞች ከፍተኛ ትምሕርታቸውን እንዲከታተሉ ዕድል የሰጠው የኢትዮጵያ እና የሕንድ ኦርቶዶክስ አብያተክርስቲያናት ግንኙነት ፤ በኢትዮጵያ መንፈሳዊ ኮሌጆችና በዩኒቨርስቲዎች የሕንድ የሥነ መለኮት ሊቃውንት በመምህርነት እንዲያገለግሉ ዕድል ይሰጣል። ይህም በከፍተኛ ሁኔታ እየተስፋፉ ለመጡት የኢትዮጵያ ቤተክርስቲያን ሴሚናሪ እና ኮሌጆች መልካም ዜና ከመሆኑም በላይ የጠቅላላውን የኦሬንታል ኦርቶዶክስ ቤተሰብ አንድነት እና የጋራ ግንኙነት ያጠናክራል ።

በብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ግብዣ ወደ ሀገራችን የመጡት የሕንድ ማላንካራ ኦርቶዶክስ ቤተክርስቲያን ፓትርያርክ ብፁዕ ወቅዱስ አቡነ ባስልዮስ ማርቶማ ማቴዎስ ፫ኛ የተመራው ልዑክ በርዕሰ አድባራት በእንጦጦ ማርያም፣ በምስካየ ኅዙናን መድኃኔዓለም ገዳም እና በሰበታ ቤተ ደናግል ጠባባት ገዳም ሐዋርያዊ ጉብኝት ያከናውናል ተብሎ ይጠበቃል። ልዑኩ ከኢትዮጵያ ቤተክርስቲያን አቻው ጋር በተለያዩ ጉዳዮች ዙሪያ ውይይት ያደርጋል ።

የቅዱሳን ፓትርያርኮቻችን የብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት እና የብፁዕ ወቅዱስ አቡነ ባስልዮስ ማርቶማ ማቴዎስ ፫ኛ ቡራኬ አይለየን።©Eotc tv

የኢ.ኦ.ተ.ቤ ሕዝብግኑኝነት

​በኢትዮጵያ ኦርቶዶክስ ተዋሕዶ ቤተክርስቲያን በደማቅ ሁኔታ የሚከበረውን እና በዓለም አቀፍ ደረጃ በማይዳሰስ ቅርስነት የተመዘገበው፣ቱሪስቶች፣ ተመራማሪዎች የሚገኙበትን የመስቀል ደመራ በዓልን አስመልክቶ የሰንበት ትምህርት ቤት ወጣቶች ሲያደርጉት የነበረውን የቅድመ ዝግጅት መርሐ ግብር በብፁዓን አባቶች ተጎበኘ።

​የመንበረ ፓትርያርክ ጠቅላይ ቤተክህነት የሰንበት ትምህርት ቤቶች ማደራጃ መምሪያ የ2019 ዓ.ም. በዓል ደመራ በዓልን ከቀድሞው በተሻለ መልኩ ለማጠናከር ከፍተኛ ዝግጅት ሲያደርግ ቆይቷል። በዚህም መሠረት የቤተክርስቲያንን ዶግማ፣ ቀኖና እና ትውፊት የጠበቀ ዝማሬ በበዓሉ ላይ ለማቅረብ ይቻል ዘንድ ከነሐሴ 25 ቀን 2018 ዓ.ም. ጀምሮ በመንበረ ጸባዖት ቅድስት ሥላሴ ካቴድራል፣ በታህካ ነገሥት ባታ ለማርያም፣ በመካነ ሕያዋን ጎፋ ቅዱስ ገብርኤል፣ በደብረ ገሊላ ቅዱስ አማኑኤል እና በጃቴ ቅድስት ኪዳነ ምሕረት አብያተ ክርስቲያናት ከ 800 እስከ 850 የሚደርሱ ወጣት ሰንበት ተማሪዎች ሥልጠና በማካሔድ ላይ ይገኛሉ።

​ይኸው የስልጠና መርሐ ግብር የደረሰበትን ደረጂጃ ለመመልከትም በዛሬው ዕለት ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋ፣ ሸገር ከተማ አህጉረ ስብከትና የምስካየ ኅዙናን መድኃኔዓለም ገዳም የበላይ ኃላፊ ሊቀ ጳጳስና ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ በመንበረ

ጸባዖት ቅድስት ሥላሴ ካቴድራል በመገኘት በሥልጠና ላይ ለሚገኙት ሰንበት ተማሪያን ትምህርተ ወንጌልና ቃለ ቡራኬ ሰጥተዋል።

​በዚሁ ጊዜ ብፁዕ አቡነ ሳዊሮስ በሰጡት አባታዊ ቡራኬ «መስቀልና ክርስቲያን ተለያይተው አያውቁም፤ ሰንበት ትምህርት ቤት ልጆቻችን የቤተክርስቲያን የጀርባ አጥንት ስለሆናችሁ በርቱ፣ እኛም በጸሎትና በአባትነት ከጎናችሁ ነን፤ የነገዋ ቤተክርስቲያን ተረካቢዎችም እናንተ ናችሁ» ሲሉ አባታዊ ቃለ ምዕዳን አስተላልፈዋል። አያይዘውም በዓሉ ዓለም አቀፋዊ ግርማ ሞገስ ያለው በመሆኑ፣ ተጀምሮ እስኪፈጸም ድረስ ሁላችሁም በፍቅር፣ በአንድነት እና ለዓለም አርአያ ሊሆን በሚችል መልኩ ሰላምን በመስበክ የቤተክርስቲያንን ሰላማዊነት እንድትገልጹ እናሳስባችኋለን ብለዋል።

​በመቀጠልም ብፁዕ አቡነ ዲዮስቆሮስ ሰንበት ተማሪዎችን አበረታተው፣ ከዝማሬ አገልግሎት ጎን ለጎን የዕለት ተዕለት የመጽሐፍ ቅዱስ ንባብ ማጠናከር እንደሚገባቸው ገልጸው

​ይህንን ታላቅ መንፈሳዊ አገልግሎት ያማረ የሰመረ እንዲሆን ከጅምሩ ሲያስተባብሩና ሲያበረታቱ የቆዩት የመንበረ ፓትርያርክ ጠቅላይ ቤተክህነት የሰንበት ትምህርት ቤት ማደራጃ መምሪያ ኃላፊ መጋቤ ሐዲስ ኃይለኛ እግዚዕ አሰፋ እና የጠቅላይ ቤተክህነት መዝሙር ክፍል ኃላፊ መጋቤ ሐዲስ ሐረገወይን

ገነትን አመስግነው የዕለቱ መርሐ ግብር በብፁዓን አባቶች

ጸሎትና ቡራኬ በሰላም ተጠናቋል።

መስከረም ፯ ቀን ፳፻፲፱ ዓ/ም ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት በኢትዮጵያ የእስራኤል ኤምባሲ ምክትል አምባሳደር (Deputy Ambassador of the State of Israel) ሲቫን ኖይማርክ ዙሪኤል (Sivan Noymark Zuriel) በጽሕፈት ቤታቸው ተቀብለው አነጋገሩ።

ምክትል አምባሳደሯ ሲቫን ኖይማርክ ዙሪኤል እንደተናገሩት “ሁለቱ ሀገራት እስራኤልና ኢትዮጵያ የረጅም ዓመታት የታሪክ፣ የባህልና የሃይማኖት ትስስር ያላቸው ሀገራት ናቸው፡፡ በተለይም ደግሞ ከቅድስት ቤተክርስቲያን ጋር ያለው የሁለትዮሽ ግንኙነት ጠንካራ በመሆኑ ይበልጥ ማጠናከር የሚቻል በሚቻልበት ሁኔታ ላይ መሥራት እንደሚገባ” ተወይይተናል ብለዋል፡፡ አክለውም “ለቅድስት ቤተክርስቲያን ለአገልግሎት በራችን ክፍት ነው፤ አገልግሎቷንም ለማጠናከር አብረን እንሠራለን” ብለዋል፡፡

የኤምባሲው ቆንስላ ሀዳስ ቫሮና (Hadas Varona Counsul) የቅዱስነታቸው አቀባበል ልዩ ነው በጣም ነው ደስ ያለን ብለዋል አያይዘውም የሁለቱ ሀገሮች ጥብቅ ግንኙነት ቀላል አይደለም፤ በተለይ የኢትዮጵያ ኦርቶዶክስ ተዋሕዶ ቤተክርስቲያን በእስራኤል ካላት ይዞታ፣ቤተክርስቲያን፣ ካህናት ገዳማት ያሉበትን ሁኔታ በተመለከተ ተወያይተናል ሲሉ ገልጸዋል፡፡

በመጨረሻም ቅዱስነታቸው “እንኳን ደህና መጣችሁ” ብለው የኢትዮጵያ ኦርቶዶክስ ተዋሕዶ ቤተክርስቲያን ለእስራኤል እንደምትጸልይ” ገልጸዋል፡፡ “ወደፊትም አሁን ያለውን ግንኙነት በበለጠ በማጠናከር እንደሚሠሩ ገልጸው” አባታዊ መልእክታቸውን አስተላልፈዋል፡፡