“መስከረም በአታ የሃያ ሺህ ሰዎች ምሥረታ” በሚል የታዕካ ነገሥት በአታ ለማርያም ገዳም የአብነት ትምህርት ቤት ሕንጻ ግንባታ ድጋፍ ማስጀመሪያ ጋዜጣዊ መግለጫ ብፁዕ አቡነ ቀውስጦስ በተገኙበት ተሰጠ።

ታሪካዊና ጥንታዊው የታዕካ ነገሥት በአታ ለማርያም ገዳም፣ የቤተ ክርስቲያናችንን የትምህርትና የመንፈሳዊ ሀብት መሠረት የሆነውን የአብነት ትምህርት ቤት ዘመናዊ ሕንጻ ለመገንባት የሚያስችል ታላቅ ሀገራዊና መንፈሳዊ ጥሪ አቅርቧል።

ገዳሙ “መስከረም በአታ የሃያ ሺህ ሰዎች ምሥረታ” በሚል መሪ ቃል ባዘጋጀው መርሐ ግብር፣ የመሠረት ድንጋይ ለማኖር የሚሆንና ግንባታውን ለማስጀመር የሚያስችል የ5,000 ብር ቻሌንጅ ማስጀመሩን አስመልክቶ ዛሬ ለጋዜጠኞችና ለመገናኛ ብዙኃን ጋዜጣዊ መግለጫ ሰጥቷል።

በመርሐ ግብሩ ላይ ብፁዕ አቡነ ቀውስጦስ የሰሜን ሸዋ ሰላሌ ሀገረ ስብከት ሊቀ ጳጳስ በንግግራቸው በአታ ለማርያም ገዳም ዛሬ ትልቅ ሥራ ለመስራት ጽንስ ላይ ነችና ቅዱስ እግዚአብሔር በሰላም ይገላግላት ዘንድ ልንማጸን እና ልንረዳ ይገባል በማለት መልእክታቸውን አስተላልፈዋል።

ሊቀ ሊቃውንት ቆሞስ አባ ተክለ ሃይማኖት ወልዱ የታዕካ ነገሥት በአታ ለማርያም ገዳም ዋና አስተዳዳሪ ”ግንባታ” ለበአታ 20 ሺህ ሰዎች ድጋፍን ተከትሎ በመስከረም 3 ቀን 2019 ዓ.ም በበአታ ለማርያም ዕለት የግንባታው የመሠረት ድንጋይ የሚቀመጥ መሆኑን ገልፀዋል ።

በመርሐ ግብሩም ጥንታዊውንና ታሪካዊውን የአብነት ትምህርት ቤት ደረጃውን የጠበቀ ሕንጻ በመገንባት ለተተኪ ትውልድ ሊቃውንት ምቹ የመማርያና የመኖሪያ ቦታ ማዘጋጀት ፤ 20,000 (ሃያ ሺህ) በጎ ፈቃደኛ ምእመናንን እያንዳንዳቸው 5,000 ብር በቻሌንጅ በማሳተፍ ለቦታው የመሠረት ድንጋይ ማኖሪያና ለግንባታ ማስጀመሪያ የሚሆን በቂ ገቢ መሰብሰብን ግብ አድርጎ መነሳቱ ተጥቅሷል።

ይህ ጥንታዊ እና ታሪካዊ ጥሪ የሁላችንንም ተሳትፎ የሚጠይቅ በመሆኑ፣ ቅድስት ቤተ ክርስቲያንንና ቅርሶቿን የምንወድ፣ የሃይማኖታችንና የታሪካችን ጥበቃ የሚያስጨንቀን ምእመናን በሙሉ በዚህ በጎ ሥራ ላይ በቻሌንጁ በመሳተፍ የበረከቱ ተካፋይ እንዲሆኑ ጥሪ አቅርበዋል።

የመሠረት ድንጋይ ማኖር ሥነ ሥርዓትም መስከረም 03 ቀን 2019 ዓ/ም እንደሆነም ተገልጿል። ይህ ታሪካዊ ገዳም የዳግማዊ አጼ ምኒልክ፣ የእቴጌ ጣይቱ እና የንግሥት ዘውዲቱ መካነ መቃብር የሚገኝበትና በርካታ ጥንታዊ ቅርሶችን የያዘ መሆኑ፣ ይታወቃል ።

ግንባታው 4 መሠረታዊ ሕንጻዎችን የያዘ መሆኑም፣ የግንባታ ፍቃድ መውሰዱም እና 2.5 ቢሊዮን ብር የሚፈጅ መሆኑን በተጨማሪም ግንባታው ሲጠናቀቅ 1500 የአብነት ተማሪዎችን እንደሚቀበል ተብራርቷል።

በዕለቱም ብፁዕ አቡነ ቀውስጦስ የሰሜን ሸዋ ሰላሌ ሀገረ ስብከት ሊቀጳጳስ ፤ አባ ተክለ ሃይማኖት የታዕካ ነገሥት በአታ ለማርያም ገዳም ዋና አስተዳዳሪ ፣ ሊቃውንተ ቤተክርስቲያን ጥሪ የተደረገላቸው እንግዶች ተገኝተዋል ።

እያንዳንዱ የ5,000 ብር አስተዋጽኦ የአብነት ትምህርቱንና የታሪካችንን መሠረት ያጠናክራል።

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/