ኢትዮጵያዊው ጻድቅ አቡነ ተክለ ሃይማኖት ዕሚፍታ቞ው በዓል መታሰቢያ በሾገር ሀገሹ ስብኚት በቡራዩ ጉጂ ገፈርሳ መልካ ኖኖ ክፍላተ ኹተማ ፊሊ ዶሮ ደብሚ ፀሐይ አቡነ ተክለ ሃይማኖት ቀተክርስቲያን ተኚበሚ።

ነሐሮ ፳፬ ቀን ፳፻፲፰ ዓ.ም
ዚጻድቁ አቡነ ተክለ ሃይማኖት በዓለ ዕሚፍታ቞ው መታሰቢያ በሾገር ሀገሹ ስብኚት በቡራዩ ጉጂ ገፈርሳ መልካ ኖኖ ክፍላተ ኹተማ ፊሊ ዶሮ ደብሚ ፀሐይ አቡነ ተክለ ሃይማኖት ቀተክርስቲያን ብፁዕ አቡነ ሳዊሮስ ዹመንበሹ ፓትርያርክ ጠቅላይ ቀተክህነት ዋና ሥራ አስኪያጅ፣ ዚደቡብ ምዕራብ ሾዋና ዹሾገር አህጉሹ ስብኚት ሊቀ ጳጳስ በተገኙበት ተኚበሚ፡፡
ጻድቁ አቡነ ተክለ ሃይማኖት ሕይወታ቞ውን ሙሉ ለእግዚአብሔር በመስጠት፣ ይህንን ዓለም ንቀው በጟም በጞሎት ተወስነው በብሕትውና ዚኖሩ፣ እንደ ቅዱሳን ሐዋርያት ወንጌልን በመላው ኢትዮጵያ እዚተዘዋወሩ ዚሰበኩ፣ በጌታቜን በመድኃኒታቜን በኢዚሱስ ክርስቶስ ስም ድውያነ ሥጋን በተአምራት፣ ድውያነ ነፍስን በትምህርት ዚፈወሱ ታላቅ ኢትዮጵያዊ ሐዋርያ ና቞ው፡፡
መልአኹ ሕይወት ቆሞስ አባ ተክለ ወልድ ኃይለ ማርያም ዚቀተክርስቲያኑ አስተዳዳሪ እንደተናገሩት በደብሩ በርካታ ዚልማት ሥራዎቜ እተኚናወኑ መሆኑን ገልጾው በዛሬው ጻድቁ አቡነ ተክለ ሃይማኖት በዓለ ዕሚፍት ብፁዕነታ቞ው ተገኝተው በዓሉን አክብሚው፣ ምእመናንን መባሚካ቞ው እንዳስደሰታ቞ው ገልጞዋል፡፡
ሊቀ ሥዩማን ዮሎፍ ፈቃደ እንደተናገሩት ዚክርስትና ሕይወት ጀምሹን ዹምንተወው ሳይሆን እስኚ መጚሚሻው ዚምንጓዝበት ሕይወት ነው ብለዋል፡፡ ሊቀ ሥዩማን አያይዘውም ጻድቁ አቡነ ተክለ ሃይማኖት በጟም፣ በጞሎት ተወስነው ሲጋደሉፀ ኚቊመት ብዛት ዚተነሣ አንዲቱ ዚእግራ቞ው አገዳ ተሰብራለቜ፡፡ ጻድቁ በአንድ እግራ቞ው ቆመው ያለ ምግብና ያለ ውኃ በትኅርምት ሌሊትና ቀን እንደ ምሰሶ ጾንተው በትጋት ወንጌል ለኢትዮጵያ ሕዝብ አስተምሚዋል፡፡ እኛም ዚጻድቁን በሚኚት እንድናገኝ ዹተቾገሹውን መርዳት፣ ዚተራበውን ማብላት፣ ዹተጠማውን ማጠጣት ይገባናል ብለዋል፡፡
በመጚሚሻም ብፁዕ አቡነ ሳዊሮስ ዹመንበሹ ፓትርያርክ ጠቅላይ ቀተክህነት ዋና ሥራ አስኪያጅ፣ ዚደቡብ ምዕራብ ሾዋና ዹሾገር አህጉሹ ስብኚት ሊቀ ጳጳስ ባስተላለፉት መልእክት ጻድቁ አባታቜን በሀገራቜን በመላው ኢትዮጵያ እዚተዘዋወሩ ወንጌልን በመስበክና ተአምራትን በማድሚግ ብዙ አሕዛብን ኚአምልኮተ ጣዖት ወደ አምልኮተ እግዚአብሔርፀ ኚገቢሚ ኀጢአት ወደ ገቢሚ ጜድቅ መልሰዋል፡፡ አብያተ ክርስቲያናትንም አሳንጞዋል፡፡ እኛም ኚጻድቁ በሚኚት ለማግኘት በዓሉን እያኚበርን እንገኛለን ብለዋል፡፡
ብፁዕነታ቞ው አያይዘውም ዚጻድቅ መታሰቢያ በሚኚት ነውፀ ጻድቁ ኚእግዚአብሔር በሚኚት አግኝተው ያሚፉበትን በዓል እያኚበርን ነውፀ በሚኚታ቞ው እንዲያድርብንም ዚጻድቁ ልጆቜ እውነተኛ መሆን አለብን፣ ዚእግዚአብሔር ምርጥ ዕቃ እንድንሆን በሰላም በፍቅር ሆነን ማገልገል አለብን ሲሉ አባታዊ መልእክታ቞ውን አስተላልፈዋል፡፡
በአጠቃላይ ጻድቁ አቡነ ተክለ ሃይማኖት ሕይወታ቞ዉን ሙሉ ለእግዚአብሔር በመስጠት፣ ወንጌልን በመላው ኢትዮጵያ እዚተዘዋወሩ ዚሰበኩፀ በጌታቜን አምላካቜንና መድኀኒታቜን ኢዚሱስ ክርስቶስ ስም ድውያነ ሥጋን በተአምራት፣ ድውያነ ነፍስን በትምህርት ዚፈወሱ ሐዋርያ ና቞ው፡፡ ቅድስት ቀተክርስቲያናቜንም ዚጻድቁን ሐዋርያዊ ውለታ቞ውን በማሰብና ኚእግዚአብሔር ዚተሰጣ቞ውን ቅድስና መሠሚት አድርጋ በስማ቞ው ጜላት ቀርጻ ስታኚብራ቞ው ትኖራለቜ፡፡
በመርሐ ግብሩ ላይ መልአኹ ኃይል አባ አፈወርቅ ዮሐንስ ዚመልካ ኖኖ፣ጉጂ ገፈርሳ ክፍለ ኹተማና በአዲስ አበባ ሀገሹ ስብኚት ዹለሚ ኩራ ሥራ አስኪያጅን ጚምሮ በርካታ ምእመናን ተገኝተዋል፡፡
©ዚኢኊተቀ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/

ዚገዳማት መምሪያ ለአህጉሹ ስብኚትና ገዳማት ዚሚያገለግሉ ልዩልዩ ዚቀተ ክርስቲያን መገልገያና ዚሶላር ኃይል ማመንጫ መሳሪያዎቜን አበሚኚተ።

ነሐሮ 22 ቀን 2018 ዓ.ም አዲስ አበባ- ኢትዮጵያ
በኢትዮጵያ ኊርቶዶክስ ተዋሕዶ ቀተ ክርስቲያን በመንበሹ ፓትሪያርክ ጠቅላይ ቀተ ክህነት ዚገዳማት መምሪያ አስተባባሪነት ለተለያዩ አህጉሹ ስብኚትና ገዳማት አገልግሎት ዹሚውሉ ልዩልዩ ቁሳቁሶቜና ዚሶላር ኃይል ማመንጫዎቜ ብፁዕ አቡነ ሳዊሮስ ዹጠቅላይ ቀተክህነት ዋና ሥራ አስኪያጅ፣ዚደቡብ ቢብዕራብ ሾዋና ዹሾገር ኹተማ አህጉሹ ስብኚት ሊቀ ጳጳስ በተገኙበት ተበሚኚተ።
ስጊታውን ያበሚኚቱት ዚዋሜንግተን ዲሲ፣ ኊሪገንና አካባቢው ሀገሹ ስብኚት ሊቀ ጳጳስ ብፁዕ አቡነ ማርቆስ ሲሆኑ፣ እሳ቞ው ኚሚያስተዳድሩት ሀገሹ ስብኚት ምዕመናንና ዚመንፈስ ወቅዱስ ልጆቻ቞ውን አስተባብሚው በዹጊዜው በሚላኹው ዚገንዘብና ዚቁሳቁስ ድጋፍ በተለይም በገጠራማ ዚአገሪቱ ክፍሎቜ ዹሚገኙ ገዳማትና አድባራት እንዲጠናኚሩ ኹፍተኛ አስተዋጜኊ እያደሚጉ ይገኛሉ።
በዚህም መሠሚት ባለፈው ዓመት ለ36 ገዳማት ዚሶላር ኃይል ማመንጫዎቜ ዚተበሚኚቱ ሲሆን፣ በዘንድሮው ዓመት ደግሞ ድጋፉ በተሻለ ሁኔታ ተጠናክሮ ቀጥሎ ኹ5 እስኚ 6 ዓመታት ዚአገልግሎት ዋስትና (ጋራንቲ) ያላ቞ው 250 ትልልቅ ዚሶላር መሣሪያዎቜ ኚነባትሪያ቞ው ለገዳማቱ እንዲደርሱ ተደርጓል።
ይህም በገጠራማ አካባቢዎቜ ለሚገኙ ገዳማት ዚመንፈሳዊ አገልግሎት እንቅስቃሎ ትልቅ እፎይታ ዚሚያበሚክት መልካም አጋጣሚ መሆኑ በወቅቱ ተገልጿል።
በሥነ ሥርዓቱ ላይ ዚተገኙት ዹመንበሹ ፓትሪያርክ ጠቅላይ ቀተ ክህነት ዚገዳማት መምሪያ ኃላፊው መጋቀ ካህናት አባ ሀብተጊዮርጊስ አስራት ብፁዕ ዋና ሥራ አስኪያጁ በተጣበበ ዚሥራ ሰዓታ቞ው ተገኝተው ፕሮግራሙን በማካፈላ቞ው ያላ቞ውን ደስታ ዚገለጹ ሲሆን አክለውም ዚቀሚቡት ልዩልዩ ቁሳቁሶቜ በትክክል ለታለመላ቞ው መንፈሳዊ ዓላማ እንደሚውሉና ዚመምሪያው ሐዋርያዊ አገልግሎት ኹጊዜ ወደ ጊዜ እያደገ መምጣቱን ገልጞዋል።በተጚማሪም ይህ አሠራር መሥሪያ ቀቱን ካልተፈለገ ተጚማሪ ወጪ ያዳነ መሆኑንም ተናግሚዋል።
በመጚሚሻም ብፁዕ ዋና ሥራ አስኪያጁ ለገዳማትና አድባራት አስፈላጊውን ድጋፍ ላደሚጉት ለብፁዕ አቡነ ማርቆስ እና ለገዳማት መምሪያው ዹላቀ ምስጋና በማቅሚብ፣ አባታዊ መመሪያና ቡራኬ ሰጥተው መርሃ ግብሩ በሰላም ተጠናቋል።
ላዕኹ ወንጌል ኃይሉ አዹለ

“ስለማኅበሩ ስንመሰክር ኑሹናል- ይህ መንፈሳዊ ሠራዊትም ሕገ ቀተ ክርስቲያንን ዚሚያስጠብቅ መሆን አለበት ” ብፁዕ አቡነ ዲዮስቆሮስ ዚቅዱስ ሲኖዶስ ዋና ጾሐፊና ዚራያ ሀገሹ ስብኚት ሊቀ ጳጳስ

በማኅበሹ ቅዱሳን 17ኛው ዓለም አቀፍ ጠቅላላ ጉባኀ መክፈቻ ፕሮግራም ዚተገኙት ብፁዕ አቡነ ዲዮስቆሮስ
ዚቅዱስ ሲኖዶስ ዋና ጾሐፊና ዚራያ ሀገሹ ስብኚት ሊቀ ጳጳስ ለተሳታፊዎቜ መልእክት አስተላልፈዋል።
ማኅበሹ ቅዱሳን ኹተመሠሹተ ጀምሮ ለ34 ዓመታት በገጠር፣ገዳማት ፣አብነት ት/ቀቶቜ፣በካህናት ማሠልጠኛዎቜና በሌላም አገልግሎት መንፈሳዊ ሠራተኛ ሁኖ ሲሠራ ቆይቷል ያሉት ብፁዕነታ቞ው ይህንንም ሁላቜንም በዚቊታው ስንመሰክር ኑሚናል፡፡
ዚአባቶቻቜሁ ልጆቜ በመሆናቜሁ አባቶቜን በማክበር፣ በጋራ በመሮጥ፣ቀ/ክ በመውደድና ጥብቅና በመቆም አገልግሉ ሲሉም አባታዊ መልእክት አስተላልፈዋል፡፡
ቜግር ዹለም ባንልም ዚውስጣቜንን ቜግር በውስጣቜን መፍታት አለብንፀ ሁላቜንም ተቀራርበን በቀተ ክሚስቲያንን ድርሻቜንን አውቀን ስናገለግል ውጀታማ እንሆናለን በማለትም ገልጞዋል።
ይህ መንፈሳዊ ሠራዊትም ሕገ ቀተ ክርስቲያንን ዚሚያስጠብቅ መሆን አለበት በማለትም አጜዕኖት ሰጥተዋል፡፡

“ማኅበሹ ቅዱሳን ኹገጠር እስኚኚተማ፣ኚሀገር ውስጥ እስኚውጭ ሀገር ብዙ ሥራ ይሰራል፡፡” ብፁዕ አቡነ ሳዊሮስ ዹጠቅላይ ቀተክህት ዋን ሥራ አስኪያጅ ፣ዚደቡብ ምዕራብ ሾዋና ሾገር አህጉሹ ስብኚት ሊቀ ጳጳስ

Mk TV ነሐሮ 23 ቀም 2018 ዓ.ም
ብፁዕ አቡነ ሳዊሮስ ዹጠቅላይ ቀተክህነት ዋና ሥራ አስኪያጅ ፣ዚደቡብ ምዕራብ ሾዋና ሾገር አህጉሹ ስብኚት ሊቀ ጳጳስ በማኅበሹ ቅዱሳን 17ኛ ዓለም አቀፍ ጠቅላላ ጉባኀ በተገኙበት ወቅት ባስተላለፉት መልእክት ማኅበሹ ቅዱሳን ኹገጠር እስኚኚተማ፣ኚሀገር ውስጥ እስኚውጭ ሀገር ብዙ ሥራ ይሰራል። ብዙ ፈተና አልፎ ለዚህ መድሚስ ቀላል አይደለም ስንተባበርና አንድ ስንሆን ደግሞ ብዙ እንሰራለን ቜግሮቜንም መቅሹፍ እንቜላለን ብለዋል፡፡
ብፁዕነታ቞ው ሥራቜሁ ዹሰመሹ ነው ብዙ እያገለገላቜሁ ነው፡፡ ሁሉን ትታቜሁ ቅድሚያ ለቀተ ክርስቲያን ሰጥታቜሁ እዚህ ተገኝታቜሁ በመወያዚታቜሁ ለቀተ ክርስቲያን ትልቅ ጉልበት ትልቅ ሥራ ነው ሲሉም ገልጞዋል፡፡
በአሁኑ ሰዓት በቅዱስ ሲኖዶስ መልካም ፍቃድ ዹተበላሾውን ለማቀናት እዚሞኚርን ስለሆነ ደግፉን፣አብሚን እንቁም፣አብሚን እንሥራ፡፡ ዹበለጠ አንድ ስንሆን ድግሞ ቀተ ክርስቲያንን እናሻግራለን በማለት አባታዊ መልእክታ቞ውን አስተላልፈዋል፡፡

ዚኢትዮጵያ ኊርቶዶክስ ተዋሕዶ ቀተክርስቲያን ዚአይሲቲና ዚዲጂታል ሜግግር መዋቅር እዚተተገበሚ መሆኑ ተገለጾ::

ዚኢትዮጵያ ኊርቶዶክስ ተዋሕዶ ቀተክርስቲያን ዶግማዋን ቀኖናዋንና ሥርዓቷን በጠበቀ መልኩ መንፈሳዊ አገልግሎቷን ለማጠናኹር ኚምታኚናውና቞ው በርካታ ተግባራት መካኚል ዘመኑ ዚደሚሰበት ዚአይሲቲና ዚዲጂታል ሜግግር ሥራ ዋነኛው መሆኑ ይታወቃል:: ይህንንም ሥራ በበላይነት ዚሚመራና ዚሚያስተባብር በመንበሹ ፓትርያርክ ጠቅላይ ቀተክህነት ጜሕፈት ቀት በቅዱስ ሲኖዶስ ውሳኔ መሠሚት ዹተቋቋመው ዚኢንፎርሜሜንና ኮሙኒኬሜን ቮክኖሎጂ መምሪያ ወደ ሥራ መግባቱ ታውቋል።
ዚግንቊት 2018 ዓ.ም ዚቅዱስ ሲኖዶስ ምልዓተ ጉባኀ በብፁዕ አቡነ ሳዊሮስ ዹጠቅላይ ቀተክህነት ዋና ሥራ አስኪያጅ ፣ ዚደቡብ ምዕራብ ሾዋና ሾገር አህጉሹ ስብኚተ ሊቀ ጳጳስ መሪነት ዹመንበሹ ፓትርያርክ ጠቅላይ ቀተክህነት በዓመቱ ኚኢንፎርሜሜን ኮሙኒኬሜን ቮክኖሎጂ ልማት ጋር በተያያዘ ዹተኹናወኑ ተግባራትን በመመልኚት ቀተክርስቲያን እስኚታቜኛው መዋቅር ድሚስ ዚኢንፎርሜሜንና ኮሙኒኬሜን ቮክኖሎጂ ተጠቃሚ እንድትሆን መመሪያ ማስተላለፉ ይታወሳል።
በዚህ መሠሚት ለበርካታ ወራት በሙያው ዚተሰማሩ በጎፈቃደኛ አገልጋዮቜ ዝግጅት ሲደሚግባ቞ው ዚቆዩ ዚአይሲቲ ፖሊሲ ፣ ዚአይሲቲ መምሪያ ማቋቋሚያ ደንብ ፣ ዚአይሲቲ ዚአምስት ዓመታት ስትራ቎ጂካዊ ዕቅድ እና ዚአይሲቲና ዚዲጂታል ሜግግር አማካሪ ኮሚ቎ ዚሥራ መመሪያ በቅዱስ ሲኖዶስ ታይተውና ጞድቀው ሥራ ላይ እንዲውሉ እዚተደሚጉ መሆናቾውን መጋቀ ጥበብ ሙሉዓለም ዐሥራት ዹመንበሹ ፓትርያርክ ጠቅላይ ቀተክህነት ዚኢንፎርሜሜንና ኮሙኒኬሜን ቮክኖሎጂ መምሪያ ሓላፊ ገልጞዋል።
አዲስ ለተቋቋመው ዚኢንፎርሜሜንና ኮሙኒኬሜን ቮክኖሎጂ መምሪያ ባለሙያዎቜን ለመቅጠር ግልጜ ዚሥራ ማስታወቂያ ዚወጣ መሆኑን ዚገለጹት ሓላፊው ሌሎቜ አስፈላጊ ዹቮክኖሎጂ ግብአቶቜን ለማሟላት ጥሚት እዚተደሚገ መሆኑንም ጠቅሰዋል።
ሐምሌ 28 ቀን 2018 ዓ.ም በብፁዕ ጠቅላይ ሥራ አስኪጅ ስምና ፊርማ በውስጥና በውጭ ለሚገኙ አህጉሹ ስብኚት በዲጂታል መገናኛ ዘዎዎቜ በተላኹ ደብዳቀ ፀ በቅዱስ ሲኖዶስ ውሳኔ መሠሚት በመንበሹ ፓትርያርክ ጠቅላይ ቀተ ክህነት ዚኢንፎርሜሜንና ኮሙኒኬሜን ቮክኖሎጂ መምሪያ በመቋቋሙ በዹሀገሹ ስብኚቱ ደግሞ ዚአይሲቲ ዋና ክፍል እንዲደራጅና በሥር ባሉ ወሚዳዎቜና አጥቢያዎቜ እንደአስፈላጊነቱ እንዲቋቋሙ መመሪያ መውሚዱን መጋቀ ጥበብ ሙሉዓለም ዐሥራት አስሚድተዋል።
በሌላ በኩል ቀደም ብለው አይሲቲ ክፍልን በዋና ክፍል አደራጅተው እዚሠሩ ዹሚገኙ አህጉሹ ስብኚት በተላኹላቾው ፖሊሲና መመሪያ መሠሚት መዋቅሩን አጠናክሹው ኚመምሪያው ጋር በመተባበር ሥራ቞ውን መቀጠል እንደሚኖርባ቞ውም ተገልጿል።
በተለይም በቅርቡ ሥራ ላይ ይውላሉ ተብለው ዚሚጠበቁት ልዮ ልዮ ሲስተሞቜን ተግባራዊ ለማድሚግ በመንበሹ ፓትርያርክ ጠቅላይ ቀተክህነት ጜሕፈት ቀት አማካይነት በጠቅላይ ቀተክህነት ለሚገኙ መምሪያዎቜና ድርጅቶቜ እንዲሁም ለሁሉም አህጉሹ ስብኚት በተጻፈ ደብዳቀ ዹተላለፉ ዝርዝር ተግባራትን በፍጥነት ማኹናወን እንደሚገባ ዚገለጹት ሓላፊው በቀተክርስቲያን መዋቅር ውስጥ ያሉና በዹጊዜው ዹሚኹናወኑ ኚኢንፎርሜሜንና ኮሙኒኬሜን ቮክኖሎጂ ልማቶቜ ጋር ዚተያያዙ ማናቾውም ዓይነት ተግባራት ቅዱስ ሲኖዶስ ባወጣ቞ው ዚአይሲቲ ፖሊሲና መመሪያዎቜ መሠሚት ብቻ መኹናወን እንደሚኖርባ቞ው መመሪያ መተላለፋን ጠቁመዋል።

ዚብፁዓን አበው ሊቃነ ጳጳሳት ዚ፳፩ኛ ዓመት በዓለ ሢመት

ዚዛሬ ፳፩ ዓመት ዚኢትዮጵያ ኊርቶዶክስ ተዋሕዶ ቀተክርስቲያን ነሐሮ ፳፪ ቀን ፲፱፻፺፯ ዓ.ም በመንበሹ ጞባዖት ቅድስት ሥላሎ ካ቎ድራል በተካሄደው ሥርዐተ ሢመት በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጹጌ ዘመንበሹ ተክለ ሃይማኖት አንብሮተ እድ ፲፯ አባቶቜ ተሹመዋል፡፡
ኚእነዚህ አባቶቜ መካኚል ብፁዕ አቡነ ሳዊሮስ ዹመንበሹ ፓትርያርክ ጠቅላይ ቀተክህነት ዋና ሥራ አስኪያጅ፣ ዚደቡብ ምዕራብ ሾዋና ዹሾገር አህጉሹ ስብኚት ሊቀ ጳጳስ፣ ብፁዕ አቡነ ዲዮስቆሮስ ዚቅዱስ ሲኖዶስ ዋና ጾሐፊና ዚራያ ሀገሹ ስብኚት ሊቀ ጳጳስ እና ብፁዕ አቡነ ማ቎ዎስ ዚኢትዮጵያ ኊርቶዶክስ ተዋሕዶ ቀተክርስቲያን መገናኛ ብዙኃን ድርጅት እና ዚምሥራቅ አፍሪካ ሀገሹ ስብኚት ሊቀ ጳጳስ ይጠቀሳሉ፡፡ በዚህም መሠሚት ሊስቱን ብፁዓን አባቶቻቜንን በጥቂቱ እናስታውሳ቞ው፡፡ /ስምዐ ጜድቅ ጋዜጣ መስኚሚም 1998 ዓ.ም/፡፡
ብፁዕ አቡነ ሳዊሮስ ሊቀ ጳጳስ
ብፁዕ አቡነ ሳዊሮስ በ፲፱፻፺፯ ዓም በተደሹገ ዚኀጲስ ቆጶሳት ምርጫ ኚሌሎቜ ፲፮ ብፁዓን አባቶቜ ጋር በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጹጌ ዘመንበሹ ተክለ ሃይማኖት ዹዓለም አብያተ ክርስቲያናት ምክር ቀት ፕሬዚዳንት፣ ዹዓለም ሃይማኖቶቜ ለሰላም ዚክብር ፕሬዚዳንት አንብሮተ እድ ተሹመው በደቡብ ምዕራብ ሞዋ፣ በኬንያ፣ በሾገር አህጉሹ ስብኚት ሊቀ ጳጳስነት አገልግለዋል፡፡
ብፁዕነታ቞ው በ፳፻፰ ዓ.ም በተካሄደው ዚግንቊት ርክበ ካህናት ቅዱስ ሲኖዶስ ምልዓተ ጉባኀ ኚሌሎቜ ብፁዓን ሊቃነ ጳጳሳት ጋር ለቅዱስ ሲኖዶስ ዋና ጞሐፊነት በእጩነት ቀርበው በኹፍተኛ ድምፅ በማለፋቾው ኚ፳፻፰ እስኚ ፳፻፲፩ ዓ.ም ግንቊት ወር ድሚስ ለሊስት ዓመታት በቅዱስ ሲኖዶስ ዋና ጞሐፊነት በትጋትና በፍጹም ቅንነት አገልግለዋል፡፡ ብፁዕነታ቞ው በዘመነ ሢመታ቞ው በአህጉሹ ስብኚትም ሆነ በቅዱስ ሲኖዶስ ዋና ጞሐፊነት ዚሥራ ዘመናቾው ለቅድስት ቀተክርስቲያን መንፈሳዊ ተልዕኮ መሳካት፣ ልዕልናና እድገት በመሥራት ያስመዘገቧ቞ው ውጀቶን እጅግ ዹሚደነቁ ና቞ው፡፡
ብፁዕ አቡነ ሳዊሮስ በቅዱስ ሲኖዶስ ዋና ጞሐፊነት ዚሥራ ዘመናቾው ዚቀተክርስቲያን ሕጎቜ፣ ደንቊቜና መመሪያዎቜ ተኚብሚው ሥራዎቜ እንዲሠሩ ኹፍተኛ ጥሚት በማድሚግ ውጀታማ ሥራ ሠርተዋል፡፡ በተለይም ዚቀተክርስቲያን ልዕልናና ክብር እንዲጠበቅ ዹሚኹናወኑ ሥራዎቜ ሁሉ በሕግና በመመሪያ እንዲፈጞሙ፣ ኹዚህ በተጚማሪም በተመደቡበት በደቡብ ምዕራብ ሾዋና በሾገር አህጉሹ ስብኚት በሰላም፣ በፍቅርና በስምምነት ሥራዎቻ቞ውን በመፈጞም፣ ዚካህናትና ዚአገልጋዮቜ መብት እንዲኚበር፣ መንፈሳዊ አገልግሎቶ቞ው ሁሉ በፍቅርና በስምምነት በማኹናወን በርካታ አብያተ ክርስቲያናት እንዲታነጹ በማድሚግ በርካታ ስኬታማ ሥራዎቜን ሠርተዋል፡፡ ብፁዕነታ቞ው አጠቃላይ ዓለም አቀፍ ዚሰበካ ጉባኀ ስብሰባ ላይ ኹአንጋፋና ዘመን ኚአስቆጠሩ ብዙ አህጉሹ ስብኚቶቜ ዚተሻለ አፈጻጞም በማስመዝገቡ ለመሾለምና ለመመስገን ዹበቃ ሀገሹ ስብኚትን ፈጥሚዋል፡፡ ዹሾገር ሀገሹ ስብኚት ኚሌሎቜ አህጉሹ ስብኚቶቜ በተሻለ መልኩ ዚመልካም አስተዳደር ሥርዐት ዚሚታይበት ነው፡፡ /ልማት በቀተክርስቲያን መጜሔትፀ ሰኔ ፳፫ ቀን ፳፻፲፯ ዓ.ም/፡፡
ብፁዕነታ቞ው ሌላው ዚሚታወቁበት በስብኚተ ወንጌል አገልግሎት ነው፡፡ በሀገሹ ስብኚቱ “ወጣትነት ለቀተክርስቲያን” በሚል ርእስ በሾገርና በደቡብ ምዕራብ ሾዋ አህጉሹ ስብኚት ላይ በስፋት አገልግሎት እዚተሰጠ ይገኛል፡፡ በሾገር ኹተማና ደቡብ ምዕራብ ሾዋ አህጉሹ ስብኚት ደሹጃ በብፁዕነታ቞ው አመራር ሰጪነት ዹተቋቋመው ወጣትነት ለቀተክርስቲያን ስብኚተ ወንጌልን በማስፋፋት በአጠቃላይ በስብኚተ ወንጌል ዘርፍ ስኬታማ ሥራዎቜ ለመሥራት ተቜሏል፡፡
ዚኢትዮጵያ ኊርቶዶክስ ተዋሕዶ ቀተክርስቲያን ዚቀቶቜና ሕንጻዎቜ አስተዳደርና ልማት ድርጅትን አሠራር ማዘመን ይቻል ዘንድ ብፁዕነታ቞ው ዚሰጡትን አመራር ዚገቢ አሰባሰብ ሥርዓቱ ዘመናዊና ዲጃታል እንዲደሚግ፣ድርጅቱ ዚራሱ ዹሆነ ድሚ ገጜ እንዲኖሚው ተደርጓል፡፡ በትንሣኀ አሳታሚ ድርጅት ኹፍተኛ ወጪ ታትመው ዚተኚማቹ መጻሕፍቶቜን በማሰራጚት ሥራ መላውን ዚቀተክህነት ሠራተኛን በማሳተፍ መጻሕፍቶቹ በጚሚታ ተሾጠው ዚቀተክርስቲያን ገቢ በአግባቡ እንዲሰበሰብ፣መጻሕፍቱም አገልግሎት ላይ እንዲውሉ ተደርጓል፡፡ ዚኢትዮጵያ ኊርቶዶክስ ተዋሕዶ ቀተክርስቲያንን ታሪኮቿ፣ ዚቅዱስ ሲኖዶስ ውሳኔዎቜን፣ልዩልዩ ሃብቶቿን፣ á‹šá‹«á‹™ ዚታሪክ ሰነዶቜ ተለይተው፣ተደራጅተውና በዘመናዊ መልኩ ወደ ዲጂታል ፋይል ተቀይሹው ለታሪክና ለትውልድ እንዲተላለፉ እዚተኚናወነ ይገኛል።
ዹመንበሹ ፓትርያርክ ጠቅላይ ቀተክህነት ቅጜር ጊቢ በሚገባ ጞድቶ፣አምሮና ተውቊ፣ለዕይታ ዚሚማርክ፣ዚቀተክርስቲያንን ክብር ዚሚመጥን፣ ቅጜሚ ጊቢ እንዲሆን ተደርጓል። አሮጌው ቄራ በመባል በሚታወቀው ቊታ ላይ በመሠራት ላይ ዚነበሩት ሁለት ግዙፋን ሁለገብ ሕንጻዎቜም ትኩሚት ሰጥቶ ለውጀት አብቅተዋል፡፡አሁንም ቀተክርስቲያን በመጪው ዘመን መንፈሳዊ አገልግሎቷን ዚምትጠቀምበት ዘመናዊ ሕንጻዎቜ እዚተገነቡ ይገኛሉ፡፡
ብፁዕ አቡነ ሳዊሮስ በዘመነ ሢመታ቞ው ኚሠሯ቞ው በርካታና ውጀታማ ሥራዎቜ መካኚል በታሪክ መዝገብ ኚሚሰፍሩ ሥራዎቻ቞ው መካኚል ተጠቃሜ ዹሚሆነው ዹሾገር ሀገሹ ስብኚት ውጀታማ ሥራ቞ውና ኚአስተዳደራዊ ሥራዎቜ በተጓዳኝ ዚሚያኚናውኗ቞ው ዚመንፈሳዊ አገልግሎቶቜ ና቞ው። ብፁዕነታ቞ው በሚገርም ትጋትና ብቃት ዚአስተዳደራዊና ዚልማት ሥራዎቜን ኚመምራት በተጓዳኝ በዓበይት በዓላት፣በአብያተ ክርስቲያናት ምሚቃ፣በስብኚተ ወንጌል አገልግሎቶቜ፣ወዘተ በሀገሹ ስብኚታ቞ው በዹጊዜው በመገኘት ወጣቱ ትውልድ በስብኚተ ወንጌል አማካኝነት፣በቃለ እግዚአብሔር ታንጟ እንዲያድግና ዚቀተክርስቲያን ተሚካቢ እንዲሆን በማድሚግ ሚገድ እያደሚጉት ያለው ጥሚትና እያስመዘገቡት ውጀት ዚመሪነት ብቃታ቞ውን ዚሚያሳይ ነው።
ብፁዕነታ቞ው በልማትም ይታወቃሉፀ በሀገሹ ስብኚቱ ያለ መሰል቞ት ትልቅ ትንሜ ደብር ነው፣ ገጠር ነው ኹተማ ሳይሉ በአስ቞ጋሪ ቊታና ሁኔታ ሳይቀር አልፈው ሐዋርያዊ አገልግሎት ይጓዛሉ፡፡ በሚያደርጓ቞ው ጉዞዎቜ ሁሉ ሳይቀር ለተሠሩ ሥራዎቜና ልማቶቜ ምስጋና አቅርበው ወደፊትም ለሚሠሩት አቅጣጫ ሰጥተው ዚሚመለሱ ዚልማት አባት ሠርተው ዚሚያሠሩ ታላቅ አባት ና቞ው፡፡
ብፁዕ አቡነ ዲዮስቆሮስ ሊቀ ጳጳስ
ብፁዕ አቡነ ዲዮስቆሮስ በ፲፱፻፺፯ ዓ.ም በተደሹገ ሢመተ ጳጰሳት ኚሌሎቜ ፲፮ ብፁዓን ኀጲስ ቆጶሳት ጋር ተሹመው በደቡብ ትግራይ ማይጚው፣ በደቡብ ምሥራቅና በአዲግራት አህጉሹ ስብኚት በሊቀ ጳጳስነት እንዲሁም ኚ፳፻፮-፳፻፱ ዓ.ም በጠቅላይ ቀተክህነት በዋና ሥራ አስኪጅነት በትጋት በጥንካሬ በታማኝነትና በፍጹም ቅንነት አገልግለዋል፡፡
ብፁዕነታ቞ው በአህጉሹ ስብኚት ሊቀ ጳጳስነትም ሆነ በጠቅላይ ቀተክህነት ዋና ሥራ አስኪያጅነት ዘመናቾው ለቅድስት ቀተክርስቲያን መንፈሳዊ ተልዕኮ መሳካት፣ ልዕልናና ዕድገት ዚሠሯ቞ው ሥራዎቜ ዹሚደነቁ ና቞ው፡፡ ብፁዕነታ቞ው ስብኚተ ወንጌል በማስፋፋት፣ በልማት ተተኪ ደቀ መዛሙርትን በማፍራት ወዘተ ያኚናወኗ቞ው ተግባራት ሰፊ ና቞ው፡፡ ሕገ ቀተክርስቲያን፣ ቃለ ዓዋዲና ሌሎቜ ሕጎቜና ደንቊቜን አክበሹው ዚሚያስኚብሩ ሥራዎቻ቞ው ሁሉ በዕውቀት፣ በአባትነት መንፈስና በተቋማዊ ተቆርቋሪነት ዚሚመሩ እጅግ ዚተዋጣላ቞ው አባት ነበሩ፡፡ በአጠቃላይ ብፁዕነታ቞ው በተለይም በሥራ አስኪያጅነት ዘመናቾው ያላ቞ውን ኹፍተኛ ዚአመራር ብቃት በመጠቀም ለቀተክርስቲያን |ዕድገትና ልዕልና ለስብኚተ ወንጌል መስፋፋት፣ ለማኅበራዊና ኢኮኖሚያዊ ዕድገት ያበሚኚቱት አስተዋጜኊ፣ ያስመዘገቡት ተቋማዊ ዕድገት ኹፍተኛ ዕውቅና እንዲያገኙ አስቜሏ቞ዋል፡፡ /ዝኒ ኹማሁ/፡፡
ቅዱስ ሲኖዶስ በበላይ ሊቀ ጳጳስነት እንዲመሩት ዚሰጣ቞ውን ዚቅርስ ጥበቃ፣ ቀተ መጻሕፍት ወመዘክር መምሪያን በሰው ኃዹይልና በቁሳቁስ ተደራጅቶ እንዲሠራ ለማድሚግ ካደሚጉት ኹፍተኛ አስተዋጜኊ በተጚማሪ ዚቀተክርስቲያን አእምሮአዊ ንብሚቶቜ እንዲጠበቁና በአእምሮአዊ መብትነት እንዲመዘገቡ ለማድሚግ ዚሚያስቜል ጠንካራ ኮሚ቎ በመሰዹምና ኮሚ቎ውን በአግባቡ በመመራት ዚቀተክርስቲያን ቅዱሳት መጻሕፍትና ንዋያተ ቅድሳት በአእምሮአዊ ንብሚት እንዲመዘገብ አድርገዋል፡፡ ብፁዕነታ቞ው በሥራዎቻ቞ው ሀሉ ቅድሚያ ለቀተክርስቲያን ተቋማዊ ህልውና ዚሚሰጡ ትጉህ አባት ና቞ው፡፡ ይህም በመሆኑ በግንቊት ፳፻፲፯ ዓ.ም ዹርክበ ካህናት ዚቅዱስ ሲኖዶስ ምልዓተ ጉባኀ ለሚቀጥሉት ሊስት ዓመታት ዚቅዱስ ሲኖዶስ ዋና ጾሐፊ በማድሚግ መርጣ቞ዋል፡፡
ብፁዕ አቡነ ዲዮስቆሮስ ዚቅዱስ ሲኖዶስ ዋና ጾሐፊ ሆነው እንዲሠሩ በቅዱስ ሲኖዶስ ምልዓተ ጉባኀ በኹፍተኛ ድምጜ ኚተሟሙበት ጊዜ ጀምሮ ዚቅዱስ ሲኖዶስ ጜሕፈት ቀት ደሹጃውን በጠበቀና ዚቅዱስ ሲኖዶስን ክብር በሚመጥን መልኩ እንዲደራጅ ፣ እንዲዋብ በጎ አድራጊ ምዕመናንን በማስተባበር ዚቅዱስ ሲኖዶስ ጜሕፈት ቀት ያማሚና ግሩም እንዲሆን አድርገውታል። ዚቅዱስ ሲኖዶስን ሥራ ዚሚያግዙ ምሁራን ዚሥራ ኃላፊዎቜን በማሳተፍ ዚቅዱስ ሲኖዶስ ቃለ ጉባኀ በአግባቡ እንዲጻፍ፣ዚቅዱስ ሲኖዶስ መግለጫ ደሹጃውን በጠበቀ መልኩ እንዲዘጋጅና ወጥነት ያለው ዹመሹጃ መለዋወጫ ሥርዓት በማድሚግ በርካታ ሥራዎቜን ማኹናወን ቜለዋል። ለዚህ ውጀታማነታ቞ው ትልቁ ምክንያትም ብፁዕነታ቞ው ያላ቞ው ዹሹጅም ጊዜ ዚሥራ ልምድ፣ብልሃት ዚተሞላበት ዚመሪነት ክህሎት፣አርቆ ዚማሰብ ብቃት፣መጠነ ሰፊ ተቋማዊ አመለካኚት፣ ለቀተክርስቲያን ሉዓላዊነት እና ክብር በቆራጥነት ዚመሥራት ዚዳበሚ ልምድና ፍጹም ዹሆነ ዹሁለንተናዊ ብቃት ባለቀት መሆናቾው እንደሆነ ዚሚጠራጠር አይደለም።/ዝኒ ኹማሁ/፡፡
ብፁዕነታ቞ው ዚቅዱስ ሲኖዶስ ውሳኔዎቜ እንዲተገበሩ፣ ዘመኑን በመዋጀት ቀተክርስቲያንን እንዲያስኚብሩ፣ በአጠቃላይ ዚቀተክርስቲያንን ሁለንተናዊ ጥቅሞቜ ተቋማዊ በሆነ መልኩ ያስኚበሩ አባት ና቞ው፡፡ ዚቅዱስ ሲኖዶስ ጜሕፈት ቀትን በአግባቡ በሰው ኃይልና በቁሳቁስ ማደራጀት ለቀተክርስቲያን እድገትና ልዕልና መኹበር ዚሚሚዱ ጥናቶቜ እንዲጠኑና በተግባር እንዲውሉ በማድሚግ ቅድስት ቀተክርስቲያን መንፈሳዊ ክብሯን ለቀጣዩ ትውልድ እንድትላለፍ እዚሠሩ ይገኛሉ፡፡
በአጠቃላይ ኚብፁዕ አቡነ ሳዊሮስ ዹጠቅላይ ቀተ ክህነት ዋና ሥራ አስኪያጅ ጋር በመናበብና በመተባበር ለቅድስት ቀተክርስቲያን ሁለንተናዊ ዕድገት ጠንክሹው በመሥራት ቀተክርስቲያን በ21ኛው መ/ክ/ዘ ዚሚጠበቅባትን ሥራ እንድታኚናውን እዚሠሩ ይገኛሉ፡፡ በዚህም በቀተክህነት ታሪክ ታይቶና ተሰምቶ ዚማያውቅ ውጀት ተመዝግቧል፡፡
ብፁዕ አቡነ ማ቎ዎስ ሊቀ ጳጳስ
ብፁዕ አቡነ ማ቎ዎስ በ፲፱፻፺፯ ዓም በተደሹገ ዚኀጲስ ቆጶሳት ምርጫ ኚሌሎቜ ፲፮ ብፁዓን አባቶቜ ጋር በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጹጌ ዘመንበሹ ተክለ ሃይማኖት ዹዓለም አብያተ ክርስቲያናት ምክር ቀት ፕሬዚዳንት፣ ዹዓለም ሃይማኖቶቜ ለሰላም ዚክብር ፕሬዚዳንት አንብሮተ እድ ተሹመው ሀገሹ ስብኚት ሊቀ ጳጳስነት አገልግለዋል፡፡
ብፁዕነታ቞ው በዋግህምራ፣ በሶማሌ ጅግጅጋ፣ በወላይታ አህጉሹ ስብኚት አገልግለዋል፡፡ በአሁኑ ወቅትም ዚኢትዮጵያ ኊርቶዶክስ ተዋሕዶ ቀተክርስቲያን መገናኛ ብዙኃን ድርጅት ዹበላይ ኃላፊ ሊቀ ጳጳስ በመሆን በማገልገል ላይ ይገኛሉ፡፡ ብፁዕነታ቞ው ዚቀተክርስቲያናቜን ቁልፍ ሥራ ዹሆነውን ዚስብኚተ ወንጌል መስፋፋትና መጠናኹርን ዕውን ለማድሚግ ሚዲያውን በማጠናኹር ሚገድ ተጚባጭ ለውጥ ዚተመዘገበበትም ወቅት ነው፡፡
ድርጅቱ በተለይም ኚዕለት ወደ ዕለት እያደገ በሰው ኃይልና በመርሐ ግብር ዝግጅት ኹፍተኛ ለውጥ እያመጣ ይገኛል፡፡ በተለይም ዚቀተክርስቲያናቜን ተቋማት በግንባር ቀደምትነት ዚሚጠቀስ ሲሆን ዚፕሮግራም ይዘቶቜ መሻሻል፣ ዹዜናና ዚፕሮግራም አቀራሚቊቜ ዘመኑን ዚሚመጥኑ እንዲሆኑ መደሚጉ፣ ዜናዎቜ በመልክና በይዘታ቞ው ተለይተው እንዲሰራጩ መደሚጉ፣ ወቅታዊ ፕሮግራሞቜ ወቅታ቞ውን ጠብቀው እንዲለቀቁ መደሚጉ፣ ዚቀጥታ ሥርጭቶቜና አስፈላጊ መሚጃዎቜ በፍጥነት እንዲሰራጩ በማድሚግ ዚብፁዕነታ቞ው አመራር ውስጥ በስኬት ካኚናወና቞ው በርካታ ውጀቶቜ መካኚል ዚሚጠቀሱ ና቞ው።
እነዚህ ስኬቶቜ ሊመዘገቡ ዚቻሉትም ዚድርጅቱ ዹበላይ ኃላፊ ሊቀ ጳጳስ፣ ዚድርጅቱ ሥራ አስኪያጅ፣ ዚድርጅቱ ዚሥራ ኃላፊዎቜ፣ ዹመርሐ ግብር አዘጋጆቜና ጋዜጠኞቜ ተናበውና ዕቅድ አውጥተው በመሥራታ቞ው እንደሆነ ዚሚታወቅ ቢሆንም ለለውጡ፣ለዕድገቱ መመዝገብ ትልቁ ድርሻ ዚብፁዕ አቡነ ማ቎ዎስ ይሆናል።
እንደ ማጠቃለያ
በጜሑፉ መግቢያ እንደገለጜኩት በዚህ ጜሑፍ ለማሳዚት ዚሞኚርኩት ዚብፁዓን አበው ሊቃነ ጳጳሳት 21ኛ ዓመት በዓለ ሢመት፣ ዚተሠሩ ሥራዎቜን ነው፡፡ በዚህም መሠሚት ኚሁለቱ ብፁዓን አበው ሊቃነ ጳጳሳት በተጚማሪ በዚሁ ዕለት ዚተሟሙት
ብፁዕ አቡነ ሕዝቅኀል፣
ብፁዕ አቡነ ሳሙኀል፣
ብፁዕ አቡነ ሉቃስ፣
ብፁዕ አቡነ አብርሃም፣
ብፁዕ አቡነ ዳንኀል፣
ብፁዕ አቡነ ያሬድ፣
ብፁዕ አቡነ ሚካኀል፣
ብፁዕ አቡነ ሔኖክ፣
ብፁዕ አቡነ ዕንባቆም፣
ብፁዕ አቡነ ቀሌምንጊስ፣
ብፁዕ አቡነ ሰላማ፣
ብፁዕ አቡነ ዮሐንስ፣
ብፁዕ አቡነ ማ቎ዎስ፣
ብፁዕ አቡነ መቃርዮስ እና
ብፁዕ አቡነ ኀውስጣ቎ዎስ ና቞ው፡፡
ዚብፁዓን አባቶቻቜን ቡራኬያቜሁ ይድሚሰን !!!
ዋቢ መጻሕፍት
✍️ ስምዐ ጜድቅ ጋዜጣፀ መስኚሚም 1998 ዓ.ም
✍️ ልማት በቀተክርስቲያን ሰኔ 23 ቀን 2018 ዓ.ም
✍️ ዚኢትዮጵያ ሕዝብ ግንኙነት ድሚ ገጜ

ዹመንበሹ ፓትርያርክ ጠቅላይ ቀተ ክህነት ጜ/ቀት ክፍት ዚሥራ ማስታወቂያ

ዹመንበሹ ፓትርያርክ ጠቅላይ ቀተ ክህነት ጜ/ቀት ዚኢንፎርሜሜን ኮሙኒኬሜን ቮክኖሎጂ መምሪያ ቀጥሎ ለተዘሚዘሩት ዚሥራ መደቊቜ መመዘኛዎቜ ዚሚያሟሉፀ ብቁ እና ተነሳሜነት ያላ቞ው 2 (ሁለት) ባለሞያ ሠራተኞቜን አወዳድሮ በጜ/ቀቱ ዹደሞዝ ስኬል መሠሚት ለመቅጠር ይፈልጋል።
ማስታወቂያው ዚወጣበት ቀን፡ ነሐሮ 21/ 2018 ዓ.ም
ማመልኚቻ መቀበያ ዚመጚሚሻ ቀን፡ መስኚሚም 7/2019 ዓ.ም
ማመልኚቻ ማቅሚቢያ ሁኔታ
መስፈርቱን ዚሚያሟሉ አመልካ቟ቜ ማስታወቂያው ኚወጣበት ቀን ጀምሮ ባሉት 15 (አስር) ዚሥራ ቀናት ውስጥ ኹዚህ በታቜ ዚተዘሚዘሩትን ሰነዶቜ ይዘው በጠቅላይ ቀተ ክህነት ጜ/ቀት ዚአስተዳደር መምሪያ በመቅሚብ መመዝገብ ይቜላሉ፡፡
· ዚሥራ ማመልኚቻ ደብዳቀ ኚአንድ ገጜ ያልበለጠ
· ዚግል፣ ዚትምህርት እና ዚሥራ ልምድ ማጠቃለያ (ካሪኩለም ቪ቎ – CV)
· መታወቂያ (ዚነዋሪነት ወይም ፋይዳ) ፣ ዚትምህርት (ሰርተፍኬት እና ትራንስክሪፕት) ፣ ዚሥራ ልምድ (ቀን፣ ወር፣ ዓ/ም እና ዹደሞዝ መጠን ዚተጠቀሰበት) ፣ ዚክህነት (ለካህናት ብቻ) እና ዚሰበካ ጉባኀ አባልነት (ለምእመናን ብቻ) ማስሚጃዎቜ ዋናውን እና ዚማይመለስ ፎቶ ኮፒ
· ኹ6 ወር ያልበለጠ 1 (አንድ) ጉርድ ፎቶግራፍ፡

ቀተ ክርስቲያን ዹሁሉም ወገን እናት እንጂ ዚቡድኖቜ መጠቀሚያ ልትሆን አይገባም ይበቃልን እንበል!” ብፁዕ ጠቅላይ ሥራ አስኪያጅ አቡነ ሳዊሮስ ሊቀ ጳጳስ

ብፁዕነታ቞ው ዚአዲስ አበባ ሀገሹ ስብኚት ዋና ሥራ አስኪያጅ መልአኹ ብርሃን ሰሎሞን በቀለ ኚገዳማትና አድባራት ዚአገልግሎት መሪዎቜ ጋር ባደሚጉት ዚትውውቅ መርሐ ግብር ላይ ተገኝተው አባታዊ ቡራኬና ዚሥራ መመሪያ ሰጥተዋል።
ብፁዕ ጠቅላይ ሥራ አስኪያጅ አቡነ ሳዊሮስ ሊቀ ጳጳስ ያስተላለፉት ሙሉ መልእክት እንደሚኚተለው ይነበባል።
በስመ አብ ወወልድ ወመንፈስ ቅዱስ አሐዱ አምላክ አሜን።
ብፁዕ አቡነ ዲዮስቆሮስ፣
ዚቅዱስ ሲኖዶስ ዋና ጾሐፊና ዚራያ ሀገሹ ስብኚት ሊቀጳጳስ
ክቡራን ዹመንበሹ ፓትርያርክ ጠቅላይ ቀተክህነት ዚዚመምሪያ ኃላፊዎቜ
ክቡር መልአኹ ብርሃን ሰሎሞን በቀለ፣
ዚአዲስ አበባ ሀገሹ ስብኚት ዋና ሥራ አስኪያጅ
ዹሀገሹ ስብኚቱ ዹዋና ክፍል ኃላፊዎቜና ሠራተኞቜ
ዹሁሉም ክፍላተ ኹተማ ዋና ሥራ አስኪያጆቜና ሠራተኞቜ
ዚአዲስ አበባ ገዳማትና አድባራት አስተዳዳሪዎቜፀ ዚሥራ ኃላፊዎቜና ሠራተኞቜ በሙሉ፩
ኹሁሉ አስቀድሜ ዚዘመናት ባለቀት ልዑል እግዚአብሔር ሁላቜንንም በያለንበት ጠብቆና አቆይቶ ዚእመቀታቜን ሱባዔ በሰላምና በፍጹም ፍቅር መንፈሳዊ አገልግሎታቜን አቀን ዚዛሬውን ዕለት ያሳዚንና ቅድስት ቀተክርስቲያናቜንን በ቞ርነቱ ዚሚጠብቃት ዚሠራዊት ጌታ ልዑል እግዚአብሔር ስሙ ዚተባሚኚ ይሁን።
አልቩ ጻድቅ ወአልቩ ጠቢብ ወአልቩ ዘዚኃሥሊ ለእግዚአብሔር ሮሜ 3፥11 ዹሰው ልጆቜ ሁሉ ኚተለያዚ ሀገርና ቋንቋ ኚተለያዚ ዹሰው ዝርያ (ነገድ) ዹተገኘን እንደመሆናቜን መጠን በቋንቋ፣ በቀለም፣ በአመጋገብ፣ በአለባበስ፣ በባህል፣ በአስተሳሰብ ጭምር ልዩነት እንዳለን ኚሁላቜሁም ዹሚሰወር አይደለም፡፡
ይሁን እንጂ ኚልዩነታቜን ይልቅ አንድ ዚምንሆንበትና ዚምንመሳሰልበት ነገር ጉልህ ሆኖ እንደሚታይ ኚቅዱሳት መጻሕፍት ገለጻ መሚዳት እንቜላለን።
በመግቢያው በግዕዝ ቃል ዚተናገርኩት ዚሐዋርያው ቃል በአማርኛ ስናዳምጠው እንዲህ ይላል “ጻድቅ ዚለምፀ አንድ ስንኳ አስተዋይም ዚለምፀ እግዚአብሔርንም ዹሚፈልግ ዚለምፀ ሁሉ ተሳስተዋል” ሮሜ ምዕራፍ 3 ቁጥር 11። “በአንድነትም ዹማይጠቅሙ ሆነዋል ቞ርነት ዚሚያደርግ ዚለምፀ አንድ ስንኳ ዹለም” ብሎ መዝግቩልናል ሮሜ ምዕራፍ 3 ቁጥር 12። ምክንያቱም ኚአዳምና ኹሔዋን ዘር
በመወለድና በሠራነው ኃጢአት ሁላቜንም እኩል በአንድነት በአንድ አንቀጜ ተኚሰናል።
በሌላም መልኩ ስናዚው እኔ ቅዱስ ነኝና እናንተም ቅዱሳን ሁኑ በማለት አንድያ ልጁን ወደ ዓለም ለመላክ ዚተገደደበት ኃጢአታቜን እንጂ ቅድስናቜን አይደለም። ኹዚህም መሚዳት ያለብን ሁላቜንም ያስፈለገን አንድ መድኃኒት እንጂ ዚተለያዚ አለመሆኑን ገላጭ ነው።
ይህን እውነታ በጥልቀት ዚተሚዳው ሌላው ሐዋርያ “ኃጢአት ዚለብንም ብንል ግን ራሳቜንን እናስታለን ዹቀና ነገርም በኛ ዘንድ ዹለም ኃጢአታቜንን አምነን ብንናገር ግን ኃጢአታቜንን ይቅር ይለን ዘንድ ዚታመነ ነው ቾርም ነው ኚበደላቜንም ሁሉ ያነጻናል” (1ኛ ዮሐ ምዕራፍ 1 ቁጥር 9) አሁን እንግዲህ ኹነዚህ ኃይለቃሎቜ ይቅር መባል፣ ትላንትን መርሳት ኚውድቀት መነሣት ወደ ክብር መመለስ እንደሚቻል በመጜሐፍ ኹተመዘገበው እውነታ መማርና መሚዳት እንቜላለን፡፡
ለመልዕክቮና ለዕለቱ ተስማሚ ይሆናል በማለት ለመግቢያ ይህን ካልኩ ለዛሬ መሰባሰባቜን ምክንያት ዚሆነቜን ቅድስት ቀተክርስቲያናቜን ዚጥንታውያንና ዚታሪካውያን አበው እምነት ማኅደርፀ ዚሀገራቜን ኢትዮጵያ መንፈሳዊ፣ ባሕላዊና ታሪካዊነት መሠሚት እንዲሁም ዚቅርሶቿ ባለቀትና ቀደምት ተጠሪ ናት።
ለዘመናት ዚሀገራቜንን አንድነት ጠብቃ ዚትምህርትና ዚስልጣኔ ብርሃንን አብርታ ዚሕዝብን ግብሚገብነትና ፍቅር ኮትኩታ ዛሬ ላይ ያደሚሰቜ ታላቅና ብሔራዊ ተቋም በመሆኗ ዚልባቜን ኩራት ናት፡፡
ቀተክርስቲያናቜን በአሁኑ ወቅት በዓለም አቀፍ ደሹጃ አገልግሎቷን
እያሰፋቜና እያሳደገቜ ያለቜበት ቢሆንም በሌላ በኩል ደግሞ ኹዘመኑ ሥልጣኔ ጋር ዹበቀሉ ዹቮክኖሎጂ መስፋፋቱን ተንተርሰው ዚመጡ በርካታ መልዕክት ማስተላለፊያዎቜ ኚፊቷ ተደቅነው ፈተና ሆነውባታል፡፡
ውጫዊ ፈተናዎቜ ዹወንጌልን ትምህርት ለማዳኚም ዹሚደሹጉ መንፈሳዊና ማኅበራዊ ጫናዎቜ ዹሰላም እጊትና ዹምዕመናን መበታተን ሲሆን፣ ውስጣዊ ፈተናዎቜ ደግሞ ዚመልካም አስተዳደር እጊት፣ ዘመኑን ዹዋጀ ዚሥራ አመራር
ሥርዓት ማነስ፣ ዚንብሚትና ዚሀብት ማኔጅመንት ክፍተቶቜ እንዲሁም ዚአገልጋዮቜ አቅም ግንባታ ማነስ ዋና ዋናዎቹ ሲሆኑ በጊዜ ሂደት በተኚሰቱ ዚአስተዳደር ብልሹነቶቜ በሙስና፣ በብሔርተኝነትና ሕጋዊ አሠራርን ባልተኚተሉ አካሄዶቜ ምክንያት ዛሬ ላይ ታላቋ ቀተክርስቲያናቜን በተለይ በአዲስ አበባ ሀገሹ ስብኚት አስተዳደር ሥራ አፈጻጞም ላይ በተለያዚ መልኩ ዚብዙዎቜ መነቀፍያና ዚማኅበራዊ ሚዲያ አፍ መፍቻ ሆና መፍትሔ ዚምትፈልግበት ተቋም ሆናለቜ።
ይህ ሁኔታ ዚእያንዳንዳቜንን ልብ ዚሚሰብርና ሊቀጥል ዚማይገባው ዚአንድ ወቅት ታሪክ ሆኖ ማለፍ ያለበት አሳዛኝ ምዕራፍ ነው ዛሬ ይሄንን ለሰሚው ግራ ዹሆነ ደስ ዹማይል ምዕራፍ በይፋ ዚምንዘጋበት በመግቢያ ጥቅሎ እንደተገለጞው ማንም ያልበደለ ስለሌለ በንስሐና በአዲስ መንፈስ ዚምንነሣበት ቀን ነው።
ቀተክርስቲያናቜን ኚተደቀኑባት ቜግሮቜ አውጥተን ዚትናንት ታላቅነቷንና ክብሯን ዚመመለስ ታሪካዊ ኃላፊነት ያለብን በመሆኑ ይህንን ዚለውጥ መስመር እንዲመሩልን ክቡር መልአኹ ብርሃን ሰሎሞን በቀለን ዚአዲስ አበባ ሀገሹ ስብኚት ዋና ሥራ አስኪያጅ አድርገን ሟመናል፡፡
ተሿሚው ወንድምና ልጃቜን ወደፊት በሚያኚናውኗ቞ው ተግባራት ኚብሔርና ኚቡድን አሠራር ነጻ ዹሆነ መዋቅር ቀተክርስቲያንን ብቻ ማዕኹል ያደሚገ አድሏዊ ያልሆነና እውነተኛ ዚመንፈስ ቅዱስ ሀሳብን በአሠራር በመዘርጋት ዚቅዱስ ሲኖዶስ ውሳኔና ልዕልና በማክበር ዹበላይ አካል መመሪያና ለሀገሹ ስብኚቱ ዹተሰጠውን ደንብ ጠብቀው በቮክኖሎጂ ዚታገዘ አሠራር ዚፋይናንስና ንብሚት አስተዳደሩን ግልጜ፣ ዘመናዊና ቁጥጥር ዚሚደሚግበት በማድሚግ ሙስናንና ብልሹ አሠራርን ፈጜመው እንደሚያጠፉ ትልቅ ተስፋና አደራ ጭምር ጥለንባ቞ዋል፡፡
ማዕኚላዊነት ላይ ዹተመሠሹተ ዚአሠራር ሲስተም በመዘርጋት አዲሱ ዋና ሥራ አስኪያጅና አመራራ቞ው ሀገሹ ስብኚቱን ነጻ በሆነ መንገድ ያለምንም ማማለጃ ማስተዳደር አለባ቞ው ቀተክርስቲያን ዹሁሉም ወገን እናት እንጂ ዚቡድኖቜ መጠቀሚያ ልትሆን አትቜልም ይበቃል ብለን ሀገሚስብኚቱን ኚገባበት ዚስም መጥፋት አጣብቂኝ ማላቀቅ ጊዜ ዹሚሰጠው ሆኖ አላገኘነውም፡፡
በሀገሹ ስብኚቱ በዹጊዜው ዚሚነሣውና ዚሚስተዋለው ሙስናና ብልሹ አሠራርን ማስወገድ ዚቀተክርስቲያንን ሀብትና ንብሚት ኚብክነት በመጠበቅ ዹቀደመውን ስም ማደስ ቀደምት አባቶቻቜን ቀተክርስቲያንን ኹምንም አይነት ዚአስተዳደርና ዚሞራል እድፍ ጉድፍ ነጻ አድርገው ቅድስናዋን ኹሙሉ ክብሯ ጋር እንዳስሚኚቡን ሁሉ ዛሬም ዚታጣብንን ታማኝነት ዹተበላሾውን ስም አድሰን ለቀጣዩ ትውልድ ዚማስሚኚብ ታላቅ አደራ በዛሬው ዕለት ጥለንባቜኋል፡፡
ፍትሕና መልካም አስተዳደር በሀገሹ ስብኚቱ ሰፍኖ ዚሊቃውንት፣
ዚካህናትና ሠራተኞቜ አበሳ ዚሚያበቃበት ዹበደል ድምጜ ዚማይሰማበት እኩልነት ዚሚሰፍንበት አሠራር እንደሚቀዚስ እምነ቎ ጜኑ ነው።
በመጚሚሻም ዹሀገሹ ስብኚቱ ዋና ክፍል ኃላፊዎቜና ሠራተኞቜ በዹክፍላተ ኹተማው ዚምትገኙ ሥራ አስኪያጆቜና ሠራተኞቜ ዚገዳማትና አድባራት አስተዳዳሪዎቜ ዚሰበካ ጉባኀ አባላትና መላው ካህናትና ሠራተኞቜ ተሿሚውን ዋና ሥራ አስኪያጅ በመደገፍ ኹጎናቾው በመቆም እና ብልሹ አሠራርን በመታገል ሀገሹ ስብኚቱ ወደ ቀደመ ክብሩና ስሙ እንዲመለስ ዚዚድርሻቜሁን እንድትወጡ አባታዊ ጥሪዬን አስተላልፋለሁ። ለአዲሱ ዋና ሥራ አስኪያጅና ለአመራራ቞ው ጥበብንና ብርታቱን ይስጣቜሁ ቀተክርስቲያናቜንን በሰላምና በቅድስና ይጠብቅልን።
“በደመወዛቜሁ ኑሩ እንጂ በማንም ግፍ አትሥሩፀ ማንንም አትቀሙፀ አትበድሉ” (ሉቃስ 3:12)
ነሐሮ ፲፱/፳፻፲፰ ዓ/ም
አባ ሳዊሮስ
ዹመንበሹ ፓትርያርክ ጠቅላይ ቀተ ክህነት ዋና ሥራ አስኪያጅ
ዚደቡብ ምዕራብ ሾዋና ሾገር አህጉሹ ስብኚት ሊቀ ጳጳስ
©ዚአዲስ አበባ ሀገሹ ስብኚት ሚዲያ አገልግሎት/Addis Ababa Diocese Media Service

ዚአዲስ አበባ ሀገሹ ስብኚት ዋና ሥራ አስኪያጅ በመሆን ለተመደቡት ለመልአኹ ብርሃን ሰሎሞን በቀለ በሀገሹ ስብኚቱ አዳራሜ በደማቅ አቀባበል ተደሹገላቾው ።

ነሐሮ 19 ቀን 2018 ዓ.ም
በኢትዮጵያ ኊርቶዶክስ ተዋሕዶ ቀተክርስቲያን ቋሚ ሲኖዶስ ኹነሐሮ 8 ቀን 2018 ዓ.ም ጀምሮ ዚአዲስ አበባ ሀገሹ ስብኚት ዋና ሥራ አስኪያጅ በመሆን ለተመደቡት ለመልአኹ ብርሃን ሰሎሞን በቀለ አቀባበል ተደሹገላቾው ።
በአቀባበሉ ላይ ብፁዕ አቡነ ዲዮስቆሮስ ዚቅዱስ ሲኖዶስ ዋና ጾሐፊ ዚራያ ሀገሹ ስብኚት ሊቀ ጳጳስ፣ ብፁዕ አቡነ ሳዊሮስ ዹመንበሹ ፓትርያርክ ጠቅላይ ጜሕፈት ቀት ዋና ሥራ አስኪያጅ ዚደቡብ ምዕራብ ሾዋ እና ዹሾገር ኹተማ አህጉሹ ስብኚት ሊቀ ጳጳስ ፣ብፁዕ አቡነ ጢሞ቎ዎስ ዚዳውሮ ኮንታ ኚንባታና አላባ ጠንባሮ አህጉሹ ስብኚት ሊቀ ጳጳስ፣ ዹመንበሹ ፓትርያርክ ጠቅላይ ጜሕፈት ቀት መምሪያ ኃላፊዎቜ ዚአዲስ አበባ ሀገሹ ስብኚት ልዩ ልዩ ክፍል ኃላፊዎቜና ሠራተኞቜ ዹክፍላተ ኹተማ ኃላፊዎቜና ልዩ ልዩ ሠራተኞቜ ዚአድባራትና ገዳማት አስተዳዳሪዎቜና አገልጋዮቜ ተገኝተዋል ።
መርሐ ግብሩ በጾሎተ ወንጌል ተጀመሹ ሲሆን ለሥራ አስኪያጁ ዚሥራ ዘመን መመሪያ ይሆን ዘንድ በማ቎ዎስ ወንጌል ምዕራፍ 20 ኚቁጥር 26 ጀምሮ ተነቩ ለመርሐ ግብሩ ተስማሚ ዹሆነ ወሚብ በቩሌ ኆኅተ ብርሃን ቅድስት ማርያም ሊቃውንት መዘምራን
ቀርቧል ።
ዚአዲስ አበባ ሀገሹ ስብኚት ዋና ሥራ አስኪያጅ ክቡር መልአኹ ብርሃን ሰሎሞን በቀለ ዚሢመት ደብዎቀ ኹተነበበ በኋላ ዹሀገሹ ስብኚቱ ክፍል ኃላፊዎቜ እና ዹክፍላተ ኹተማ ቀተክህነት ሊቃነ ካህናት በጉባኀው ፊት ቀርበው ትውውቅ ተደርጓል ። በሊቃውንትም ቅኔ ተበርክቷል ።
ዹሀገሹ ስብኚቱ ዋና ሥራ አስኪያጅ ስብኚተ ወንጌልን፣ ሰበካ ጉባኀን ፣ሰንበት ትምህርት ቀትን በማደራጀትና በማስፋፋት ፣ ቀተክርስቲያንን ጠብቆ በማስጠበቅ ሁለንተናዊ ልማትን እንዲያጠናክሩ ፣ ሕገ ቀተክርስቲያንን ጠብቀው ዚመልካም አስተዳደር ቜግርና ሙስናን እንዲቀርፉ ኃላፊነት ተሰጥቶአ቞ዋል።
ክቡር ሊቀ ሊቃውንት ቆሞስ አባ ተ/ሃይማኖት ወልዱ ሰለ ሀገሹ ስብኚቱ ዋና ሥራ አስኪያጅ ያላ቞ውን ዚሥራ ክህሎት በመግለጜ ቀተ ክርስቲያንን አብሚን እናሻግራት ማሻገር ባንቜል ባለቀት ሆኖ ዚመሠሚታት ክርስቶስ ያሻግራታል እኛ ሰጥመን እንዳንቀር ሲሉ ማስጠንቀቂያ አዘል ምክራ቞ውን ለግሰዋል።
ዹቩሌ ኆኅተ ብርሃን ቅድስት ማርያም ተወካይ ክቡር መልአኹ ብርሃን ሰሎሞን በደብራቜን ዘርፈ ብዙ ሰዋዊ እና ዹመሠሹተ ልማት ተግባሮቜን አኹናውነዋል በማለት በዝርዝር ዚሠሯ቞ውን ሥራዎቜ አቅርበዋል።
መልአኹ ብርሃን ሰሎሞን በቀለ ኚቅዱስ ሲኖዶስ ዚተሰጣ቞ውን ኃላፊነት በታማኝነት እንደሚወጡ በሢመቱ ላይ ዹተነበበውን ዝርዝር መመሪያ በማንሳት አሁን ላይ ሀገሹ ስብኚቱን ዚተጋሚጡበትን ተግዳሮቶቜ በጋራ እንቀርፋለን ብለዋል።
ብፁዕ አቡነ ሳዊሮስ ዹመንበሹ ፓትርያርክ ጠቅላይ ጜሕፈት ቀት ዋና ሥራ አስኪያጅ በሮሜ 3፣ 11 በመጥቀስ ወንጌል ዹሰውን ልጅ በኃጢአቱ እንደምትኚስ በመጥቀስ ኚውድቀታቜን በንስሐ ልንመለስ ይገባል ብለዋል።
ብፁዕነታ቞ው ዚኢትዮጵያ ኊርቶዶክስ ተዋሕዶ ቀተክርስቲያን ጥንታዊነትና ታሪካዊ መሆኗን በመጥቀስ
” ተሿሚው ወንድምና ልጃቜን ወደፊት በሚያኚናውኗ቞ው ተግባራት ኚብሔርና ኚቡድን አሠራር ነጻ ዹሆነ መዋቅር ቀተክርስቲያንን ብቻ ማዕኹል ያደሚገ አድሏዊ ያልሆነና እውነተኛ ዚመንፈስ ቅዱስ ሀሳብን በአሠራር በመዘርጋት ዚቅዱስ ሲኖዶስ ውሳኔና ልዕልና በማክበር ዹበላይ አካል መመሪያና ለሀገሹ ስብኚቱ ዹተሰጠውን ደንብ ጠብቀው በቮክኖሎጂ ዚታገዘ አሠራር ዚፋይናንስና ንብሚት አስተዳደሩን ግልጜ፣ ዘመናዊና ቁጥጥር ዚሚደሚግበት በማድሚግ ሙስናንና ብልሹ አሠራርን ፈጜመው እንደሚያጠፉ ትልቅ ተስፋና አደራ ጭምር ጥለንባ቞ዋል።”
ብለዋል።
©ዚኢኊተቀ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/

ኚአዲስአበባ ሀገሹ ስብኚት አጣሪ ኮሚ቎ ዹተሰጠ ማሳሰቢያ

ዚኢትዮጵያ ኊርቶዶክስ ተዋሕዶ ቀተክርስቲያን ቋሚ ሲኖዶስ በአዲስአበባ ሀገሹ ስብኚት ዹተኹሰተውን ዚመልካም አስተዳደር ቜግር አጣርቶ ኚመፍትሔ ሐሳብ ጭምር ዚሚያቀርብ ኮሚ቎ አቋቁሞ ወደ ሥራ እንዲገባ ማድሚጉ ይታወቃል።
ይህንን ተኚትሎ ዹተቋቋመው ኮሚ቎ መሚጃዎቜን ለመሰብሰብ፣
ለማደራጀትና ለመተንተን ያስቜለው ዘንድ ቀደም ሲል ባደሚገው ጥሪ መሠሚት መሚጃዎቜን ማሰባሰብ መጀመሩ ይታወቃል።
ይሁንና አንዳንድ መሹጃ ያቀሚቡ ሰዎቜ ኚግንቊት 2017 ዓ.ም
እስኚ ሐምሌ 2018 ዓ.ም ድሚስ ብቻ ያሉ መሚጃዎቜን መስጠት ሲገባ቞ው ኚሁለት ዓመታት በፊት በሀገሹ ስብኚቱ በደል ደርሶብናል ዹሚሉ ጭምር ማስሚጃዎቻ቞ውን እያደሚሱን መሆኑን ተመልክተናል።
ስለሆነም አጣሪ ኮሚ቎ው ኚግንቊት 2017 ዓ.ም እስኚ ሐምሌ 2018 ዓ.ም ድሚስ በደል ደርሶብናል ዹሚሉ በርካታ ማሚጃዎቜን እዚተቀበለ መሆኑን ኚመግለጜ ጋር በቀሪዎቹ ሊስት ቀናት ብቻ ቀሹ ዚምትሉትን ማስሚጃ ለኮሚ቎ው እንድታደርሱ እያስታወቅን ኚአርብ ነሐሮ 22 ቀን 2018 ዓ.ም በኋላ ዚተሰበሰቡትን መሚጃዎቜ በመተንተን ወደ ጭብጥ በመቀዹር ዚጥናቱ ግብዓት ዚማድሚግ ሥራ ብቻ ዚሚያኚናውን ስለሆነ ማስሚጃዎቜን ዹማይቀበል መሆኑን ኚወዲሁ ይገልጻል።
አጣሪ ኮሚ቎ው
ነሐሮ19 ቀን 2018 ዓ.ም
አዲስአበባ -ኢትዮጵያ