August 2026 – Ethiopian Orthodox Tewahedo Church Patriarchate Head Office

ኢትዮጵያዊው ጻድቅ አቡነ ተክለ ሃይማኖት ዕረፍታቸው በዓል መታሰቢያ በሸገር ሀገረ ስብከት በቡራዩ ጉጂ ገፈርሳ መልካ ኖኖ ክፍላተ ከተማ ፊሊ ዶሮ ደብረ ፀሐይ አቡነ ተክለ ሃይማኖት ቤተክርስቲያን ተከበረ።

August 30, 2026

ነሐሴ ፳፬ ቀን ፳፻፲፰ ዓ.ም

የጻድቁ አቡነ ተክለ ሃይማኖት በዓለ ዕረፍታቸው መታሰቢያ በሸገር ሀገረ ስብከት በቡራዩ ጉጂ ገፈርሳ መልካ ኖኖ ክፍላተ ከተማ ፊሊ ዶሮ ደብረ ፀሐይ አቡነ ተክለ ሃይማኖት ቤተክርስቲያን ብፁዕ አቡነ ሳዊሮስ የመንበረ ፓትርያርክ ጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር አህጉረ ስብከት ሊቀ ጳጳስ በተገኙበት ተከበረ፡፡

ጻድቁ አቡነ ተክለ ሃይማኖት ሕይወታቸውን ሙሉ ለእግዚአብሔር በመስጠት፣ ይህንን ዓለም ንቀው በጾም በጸሎት ተወስነው በብሕትውና የኖሩ፣ እንደ ቅዱሳን ሐዋርያት ወንጌልን በመላው ኢትዮጵያ እየተዘዋወሩ የሰበኩ፣ በጌታችን በመድኃኒታችን በኢየሱስ ክርስቶስ ስም ድውያነ ሥጋን በተአምራት፣ ድውያነ ነፍስን በትምህርት የፈወሱ ታላቅ ኢትዮጵያዊ ሐዋርያ ናቸው፡፡

መልአከ ሕይወት ቆሞስ አባ ተክለ ወልድ ኃይለ ማርያም የቤተክርስቲያኑ አስተዳዳሪ እንደተናገሩት በደብሩ በርካታ የልማት ሥራዎች እተከናወኑ መሆኑን ገልጸው በዛሬው ጻድቁ አቡነ ተክለ ሃይማኖት በዓለ ዕረፍት ብፁዕነታቸው ተገኝተው በዓሉን አክብረው፣ ምእመናንን መባረካቸው እንዳስደሰታቸው ገልጸዋል፡፡

ሊቀ ሥዩማን ዮሴፍ ፈቃደ እንደተናገሩት የክርስትና ሕይወት ጀምረን የምንተወው ሳይሆን እስከ መጨረሻው የምንጓዝበት ሕይወት ነው ብለዋል፡፡ ሊቀ ሥዩማን አያይዘውም ጻድቁ አቡነ ተክለ ሃይማኖት በጾም፣ በጸሎት ተወስነው ሲጋደሉ፤ ከቊመት ብዛት የተነሣ አንዲቱ የእግራቸው አገዳ ተሰብራለች፡፡ ጻድቁ በአንድ እግራቸው ቆመው ያለ ምግብና ያለ ውኃ በትኅርምት ሌሊትና ቀን እንደ ምሰሶ ጸንተው በትጋት ወንጌል ለኢትዮጵያ ሕዝብ አስተምረዋል፡፡ እኛም የጻድቁን በረከት እንድናገኝ የተቸገረውን መርዳት፣ የተራበውን ማብላት፣ የተጠማውን ማጠጣት ይገባናል ብለዋል፡፡

በመጨረሻም ብፁዕ አቡነ ሳዊሮስ የመንበረ ፓትርያርክ ጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር አህጉረ ስብከት ሊቀ ጳጳስ ባስተላለፉት መልእክት ጻድቁ አባታችን በሀገራችን በመላው ኢትዮጵያ እየተዘዋወሩ ወንጌልን በመስበክና ተአምራትን በማድረግ ብዙ አሕዛብን ከአምልኮተ ጣዖት ወደ አምልኮተ እግዚአብሔር፤ ከገቢረ ኀጢአት ወደ ገቢረ ጽድቅ መልሰዋል፡፡ አብያተ ክርስቲያናትንም አሳንጸዋል፡፡ እኛም ከጻድቁ በረከት ለማግኘት በዓሉን እያከበርን እንገኛለን ብለዋል፡፡

ብፁዕነታቸው አያይዘውም የጻድቅ መታሰቢያ በረከት ነው፤ ጻድቁ ከእግዚአብሔር በረከት አግኝተው ያረፉበትን በዓል እያከበርን ነው፤ በረከታቸው እንዲያድርብንም የጻድቁ ልጆች እውነተኛ መሆን አለብን፣ የእግዚአብሔር ምርጥ ዕቃ እንድንሆን በሰላም በፍቅር ሆነን ማገልገል አለብን ሲሉ አባታዊ መልእክታቸውን አስተላልፈዋል፡፡

በአጠቃላይ ጻድቁ አቡነ ተክለ ሃይማኖት ሕይወታቸዉን ሙሉ ለእግዚአብሔር በመስጠት፣ ወንጌልን በመላው ኢትዮጵያ እየተዘዋወሩ የሰበኩ፤ በጌታችን አምላካችንና መድኀኒታችን ኢየሱስ ክርስቶስ ስም ድውያነ ሥጋን በተአምራት፣ ድውያነ ነፍስን በትምህርት የፈወሱ ሐዋርያ ናቸው፡፡ ቅድስት ቤተክርስቲያናችንም የጻድቁን ሐዋርያዊ ውለታቸውን በማሰብና ከእግዚአብሔር የተሰጣቸውን ቅድስና መሠረት አድርጋ በስማቸው ጽላት ቀርጻ ስታከብራቸው ትኖራለች፡፡

በመርሐ ግብሩ ላይ መልአከ ኃይል አባ አፈወርቅ ዮሐንስ የመልካ ኖኖ፣ጉጂ ገፈርሳ ክፍለ ከተማና በአዲስ አበባ ሀገረ ስብከት የለሚ ኩራ ሥራ አስኪያጅን ጨምሮ በርካታ ምእመናን ተገኝተዋል፡፡

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/

የገዳማት መምሪያ ለአህጉረ ስብከትና ገዳማት የሚያገለግሉ ልዩልዩ የቤተ ክርስቲያን መገልገያና የሶላር ኃይል ማመንጫ መሳሪያዎችን አበረከተ።

August 30, 2026

ነሐሴ 22 ቀን 2018 ዓ.ም አዲስ አበባ- ኢትዮጵያ

በኢትዮጵያ ኦርቶዶክስ ተዋሕዶ ቤተ ክርስቲያን በመንበረ ፓትሪያርክ ጠቅላይ ቤተ ክህነት የገዳማት መምሪያ አስተባባሪነት ለተለያዩ አህጉረ ስብከትና ገዳማት አገልግሎት የሚውሉ ልዩልዩ ቁሳቁሶችና የሶላር ኃይል ማመንጫዎች ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ፣የደቡብ ቢብዕራብ ሸዋና የሸገር ከተማ አህጉረ ስብከት ሊቀ ጳጳስ በተገኙበት ተበረከተ።

ስጦታውን ያበረከቱት የዋሽንግተን ዲሲ፣ ኦሪገንና አካባቢው ሀገረ ስብከት ሊቀ ጳጳስ ብፁዕ አቡነ ማርቆስ ሲሆኑ፣ እሳቸው ከሚያስተዳድሩት ሀገረ ስብከት ምዕመናንና የመንፈስ ወቅዱስ ልጆቻቸውን አስተባብረው በየጊዜው በሚላከው የገንዘብና የቁሳቁስ ድጋፍ በተለይም በገጠራማ የአገሪቱ ክፍሎች የሚገኙ ገዳማትና አድባራት እንዲጠናከሩ ከፍተኛ አስተዋጽኦ እያደረጉ ይገኛሉ።

በዚህም መሠረት ባለፈው ዓመት ለ36 ገዳማት የሶላር ኃይል ማመንጫዎች የተበረከቱ ሲሆን፣ በዘንድሮው ዓመት ደግሞ ድጋፉ በተሻለ ሁኔታ ተጠናክሮ ቀጥሎ ከ5 እስከ 6 ዓመታት የአገልግሎት ዋስትና (ጋራንቲ) ያላቸው 250 ትልልቅ የሶላር መሣሪያዎች ከነባትሪያቸው ለገዳማቱ እንዲደርሱ ተደርጓል።

ይህም በገጠራማ አካባቢዎች ለሚገኙ ገዳማት የመንፈሳዊ አገልግሎት እንቅስቃሴ ትልቅ እፎይታ የሚያበረክት መልካም አጋጣሚ መሆኑ በወቅቱ ተገልጿል።

በሥነ ሥርዓቱ ላይ የተገኙት የመንበረ ፓትሪያርክ ጠቅላይ ቤተ ክህነት የገዳማት መምሪያ ኃላፊው መጋቤ ካህናት አባ ሀብተጊዮርጊስ አስራት ብፁዕ ዋና ሥራ አስኪያጁ በተጣበበ የሥራ ሰዓታቸው ተገኝተው ፕሮግራሙን በማካፈላቸው ያላቸውን ደስታ የገለጹ ሲሆን አክለውም የቀረቡት ልዩልዩ ቁሳቁሶች በትክክል ለታለመላቸው መንፈሳዊ ዓላማ እንደሚውሉና የመምሪያው ሐዋርያዊ አገልግሎት ከጊዜ ወደ ጊዜ እያደገ መምጣቱን ገልጸዋል።በተጨማሪም ይህ አሠራር መሥሪያ ቤቱን ካልተፈለገ ተጨማሪ ወጪ ያዳነ መሆኑንም ተናግረዋል።

በመጨረሻም ብፁዕ ዋና ሥራ አስኪያጁ ለገዳማትና አድባራት አስፈላጊውን ድጋፍ ላደረጉት ለብፁዕ አቡነ ማርቆስ እና ለገዳማት መምሪያው የላቀ ምስጋና በማቅረብ፣ አባታዊ መመሪያና ቡራኬ ሰጥተው መርሃ ግብሩ በሰላም ተጠናቋል።

ላዕከ ወንጌል ኃይሉ አየለ

“ስለማኅበሩ ስንመሰክር ኑረናል- ይህ መንፈሳዊ ሠራዊትም ሕገ ቤተ ክርስቲያንን የሚያስጠብቅ መሆን አለበት ” ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ

August 30, 2026

በማኅበረ ቅዱሳን 17ኛው ዓለም አቀፍ ጠቅላላ ጉባኤ መክፈቻ ፕሮግራም የተገኙት ብፁዕ አቡነ ዲዮስቆሮስ

የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ ለተሳታፊዎች መልእክት አስተላልፈዋል።

ማኅበረ ቅዱሳን ከተመሠረተ ጀምሮ ለ34 ዓመታት በገጠር፣ገዳማት ፣አብነት ት/ቤቶች፣በካህናት ማሠልጠኛዎችና በሌላም አገልግሎት መንፈሳዊ ሠራተኛ ሁኖ ሲሠራ ቆይቷል ያሉት ብፁዕነታቸው ይህንንም ሁላችንም በየቦታው ስንመሰክር ኑረናል፡፡

የአባቶቻችሁ ልጆች በመሆናችሁ አባቶችን በማክበር፣ በጋራ በመሮጥ፣ቤ/ክ በመውደድና ጥብቅና በመቆም አገልግሉ ሲሉም አባታዊ መልእክት አስተላልፈዋል፡፡

ችግር የለም ባንልም የውስጣችንን ችግር በውስጣችን መፍታት አለብን፤ ሁላችንም ተቀራርበን በቤተ ክረስቲያንን ድርሻችንን አውቀን ስናገለግል ውጤታማ እንሆናለን በማለትም ገልጸዋል።

ይህ መንፈሳዊ ሠራዊትም ሕገ ቤተ ክርስቲያንን የሚያስጠብቅ መሆን አለበት በማለትም አጽዕኖት ሰጥተዋል፡፡

“ማኅበረ ቅዱሳን ከገጠር እስከከተማ፣ከሀገር ውስጥ እስከውጭ ሀገር ብዙ ሥራ ይሰራል፡፡” ብፁዕ አቡነ ሳዊሮስ የጠቅላይ ቤተክህት ዋን ሥራ አስኪያጅ ፣የደቡብ ምዕራብ ሸዋና ሸገር አህጉረ ስብከት ሊቀ ጳጳስ

August 30, 2026

Mk TV ነሐሴ 23 ቀም 2018 ዓ.ም

ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ ፣የደቡብ ምዕራብ ሸዋና ሸገር አህጉረ ስብከት ሊቀ ጳጳስ በማኅበረ ቅዱሳን 17ኛ ዓለም አቀፍ ጠቅላላ ጉባኤ በተገኙበት ወቅት ባስተላለፉት መልእክት ማኅበረ ቅዱሳን ከገጠር እስከከተማ፣ከሀገር ውስጥ እስከውጭ ሀገር ብዙ ሥራ ይሰራል። ብዙ ፈተና አልፎ ለዚህ መድረስ ቀላል አይደለም ስንተባበርና አንድ ስንሆን ደግሞ ብዙ እንሰራለን ችግሮችንም መቅረፍ እንችላለን ብለዋል፡፡

ብፁዕነታቸው ሥራችሁ የሰመረ ነው ብዙ እያገለገላችሁ ነው፡፡ ሁሉን ትታችሁ ቅድሚያ ለቤተ ክርስቲያን ሰጥታችሁ እዚህ ተገኝታችሁ በመወያየታችሁ ለቤተ ክርስቲያን ትልቅ ጉልበት ትልቅ ሥራ ነው ሲሉም ገልጸዋል፡፡

በአሁኑ ሰዓት በቅዱስ ሲኖዶስ መልካም ፍቃድ የተበላሸውን ለማቀናት እየሞከርን ስለሆነ ደግፉን፣አብረን እንቁም፣አብረን እንሥራ፡፡ የበለጠ አንድ ስንሆን ድግሞ ቤተ ክርስቲያንን እናሻግራለን በማለት አባታዊ መልእክታቸውን አስተላልፈዋል፡፡

የኢትዮጵያ ኦርቶዶክስ ተዋሕዶ ቤተክርስቲያን የአይሲቲና የዲጂታል ሽግግር መዋቅር እየተተገበረ መሆኑ ተገለጸ::

August 30, 2026

የኢትዮጵያ ኦርቶዶክስ ተዋሕዶ ቤተክርስቲያን ዶግማዋን ቀኖናዋንና ሥርዓቷን በጠበቀ መልኩ መንፈሳዊ አገልግሎቷን ለማጠናከር ከምታከናውናቸው በርካታ ተግባራት መካከል ዘመኑ የደረሰበት የአይሲቲና የዲጂታል ሽግግር ሥራ ዋነኛው መሆኑ ይታወቃል:: ይህንንም ሥራ በበላይነት የሚመራና የሚያስተባብር በመንበረ ፓትርያርክ ጠቅላይ ቤተክህነት ጽሕፈት ቤት በቅዱስ ሲኖዶስ ውሳኔ መሠረት የተቋቋመው የኢንፎርሜሽንና ኮሙኒኬሽን ቴክኖሎጂ መምሪያ ወደ ሥራ መግባቱ ታውቋል።

የግንቦት 2018 ዓ.ም የቅዱስ ሲኖዶስ ምልዓተ ጉባኤ በብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ ፣ የደቡብ ምዕራብ ሸዋና ሸገር አህጉረ ስብከተ ሊቀ ጳጳስ መሪነት የመንበረ ፓትርያርክ ጠቅላይ ቤተክህነት በዓመቱ ከኢንፎርሜሽን ኮሙኒኬሽን ቴክኖሎጂ ልማት ጋር በተያያዘ የተከናወኑ ተግባራትን በመመልከት ቤተክርስቲያን እስከታችኛው መዋቅር ድረስ የኢንፎርሜሽንና ኮሙኒኬሽን ቴክኖሎጂ ተጠቃሚ እንድትሆን መመሪያ ማስተላለፉ ይታወሳል።

በዚህ መሠረት ለበርካታ ወራት በሙያው የተሰማሩ በጎፈቃደኛ አገልጋዮች ዝግጅት ሲደረግባቸው የቆዩ የአይሲቲ ፖሊሲ ፣ የአይሲቲ መምሪያ ማቋቋሚያ ደንብ ፣ የአይሲቲ የአምስት ዓመታት ስትራቴጂካዊ ዕቅድ እና የአይሲቲና የዲጂታል ሽግግር አማካሪ ኮሚቴ የሥራ መመሪያ በቅዱስ ሲኖዶስ ታይተውና ጸድቀው ሥራ ላይ እንዲውሉ እየተደረጉ መሆናቸውን መጋቤ ጥበብ ሙሉዓለም ዐሥራት የመንበረ ፓትርያርክ ጠቅላይ ቤተክህነት የኢንፎርሜሽንና ኮሙኒኬሽን ቴክኖሎጂ መምሪያ ሓላፊ ገልጸዋል።

አዲስ ለተቋቋመው የኢንፎርሜሽንና ኮሙኒኬሽን ቴክኖሎጂ መምሪያ ባለሙያዎችን ለመቅጠር ግልጽ የሥራ ማስታወቂያ የወጣ መሆኑን የገለጹት ሓላፊው ሌሎች አስፈላጊ የቴክኖሎጂ ግብአቶችን ለማሟላት ጥረት እየተደረገ መሆኑንም ጠቅሰዋል።

ሐምሌ 28 ቀን 2018 ዓ.ም በብፁዕ ጠቅላይ ሥራ አስኪጅ ስምና ፊርማ በውስጥና በውጭ ለሚገኙ አህጉረ ስብከት በዲጂታል መገናኛ ዘዴዎች በተላከ ደብዳቤ ፤ በቅዱስ ሲኖዶስ ውሳኔ መሠረት በመንበረ ፓትርያርክ ጠቅላይ ቤተ ክህነት የኢንፎርሜሽንና ኮሙኒኬሽን ቴክኖሎጂ መምሪያ በመቋቋሙ በየሀገረ ስብከቱ ደግሞ የአይሲቲ ዋና ክፍል እንዲደራጅና በሥር ባሉ ወረዳዎችና አጥቢያዎች እንደአስፈላጊነቱ እንዲቋቋሙ መመሪያ መውረዱን መጋቤ ጥበብ ሙሉዓለም ዐሥራት አስረድተዋል።

በሌላ በኩል ቀደም ብለው አይሲቲ ክፍልን በዋና ክፍል አደራጅተው እየሠሩ የሚገኙ አህጉረ ስብከት በተላከላቸው ፖሊሲና መመሪያ መሠረት መዋቅሩን አጠናክረው ከመምሪያው ጋር በመተባበር ሥራቸውን መቀጠል እንደሚኖርባቸውም ተገልጿል።

በተለይም በቅርቡ ሥራ ላይ ይውላሉ ተብለው የሚጠበቁት ልዮ ልዮ ሲስተሞችን ተግባራዊ ለማድረግ በመንበረ ፓትርያርክ ጠቅላይ ቤተክህነት ጽሕፈት ቤት አማካይነት በጠቅላይ ቤተክህነት ለሚገኙ መምሪያዎችና ድርጅቶች እንዲሁም ለሁሉም አህጉረ ስብከት በተጻፈ ደብዳቤ የተላለፉ ዝርዝር ተግባራትን በፍጥነት ማከናወን እንደሚገባ የገለጹት ሓላፊው በቤተክርስቲያን መዋቅር ውስጥ ያሉና በየጊዜው የሚከናወኑ ከኢንፎርሜሽንና ኮሙኒኬሽን ቴክኖሎጂ ልማቶች ጋር የተያያዙ ማናቸውም ዓይነት ተግባራት ቅዱስ ሲኖዶስ ባወጣቸው የአይሲቲ ፖሊሲና መመሪያዎች መሠረት ብቻ መከናወን እንደሚኖርባቸው መመሪያ መተላለፋን ጠቁመዋል።

የብፁዓን አበው ሊቃነ ጳጳሳት የ፳፩ኛ ዓመት በዓለ ሢመት

August 29, 2026

የዛሬ ፳፩ ዓመት የኢትዮጵያ ኦርቶዶክስ ተዋሕዶ ቤተክርስቲያን ነሐሴ ፳፪ ቀን ፲፱፻፺፯ ዓ.ም በመንበረ ጸባዖት ቅድስት ሥላሴ ካቴድራል በተካሄደው ሥርዐተ ሢመት በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት አንብሮተ እድ ፲፯ አባቶች ተሹመዋል፡፡

ከእነዚህ አባቶች መካከል ብፁዕ አቡነ ሳዊሮስ የመንበረ ፓትርያርክ ጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር አህጉረ ስብከት ሊቀ ጳጳስ፣ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ እና ብፁዕ አቡነ ማቴዎስ የኢትዮጵያ ኦርቶዶክስ ተዋሕዶ ቤተክርስቲያን መገናኛ ብዙኃን ድርጅት እና የምሥራቅ አፍሪካ ሀገረ ስብከት ሊቀ ጳጳስ ይጠቀሳሉ፡፡ በዚህም መሠረት ሦስቱን ብፁዓን አባቶቻችንን በጥቂቱ እናስታውሳቸው፡፡ /ስምዐ ጽድቅ ጋዜጣ መስከረም 1998 ዓ.ም/፡፡

ብፁዕ አቡነ ሳዊሮስ ሊቀ ጳጳስ

ብፁዕ አቡነ ሳዊሮስ በ፲፱፻፺፯ ዓም በተደረገ የኤጲስ ቆጶሳት ምርጫ ከሌሎች ፲፮ ብፁዓን አባቶች ጋር በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት የዓለም አብያተ ክርስቲያናት ምክር ቤት ፕሬዚዳንት፣ የዓለም ሃይማኖቶች ለሰላም የክብር ፕሬዚዳንት አንብሮተ እድ ተሹመው በደቡብ ምዕራብ ሸዋ፣ በኬንያ፣ በሸገር አህጉረ ስብከት ሊቀ ጳጳስነት አገልግለዋል፡፡

ብፁዕነታቸው በ፳፻፰ ዓ.ም በተካሄደው የግንቦት ርክበ ካህናት ቅዱስ ሲኖዶስ ምልዓተ ጉባኤ ከሌሎች ብፁዓን ሊቃነ ጳጳሳት ጋር ለቅዱስ ሲኖዶስ ዋና ጸሐፊነት በእጩነት ቀርበው በከፍተኛ ድምፅ በማለፋቸው ከ፳፻፰ እስከ ፳፻፲፩ ዓ.ም ግንቦት ወር ድረስ ለሦስት ዓመታት በቅዱስ ሲኖዶስ ዋና ጸሐፊነት በትጋትና በፍጹም ቅንነት አገልግለዋል፡፡ ብፁዕነታቸው በዘመነ ሢመታቸው በአህጉረ ስብከትም ሆነ በቅዱስ ሲኖዶስ ዋና ጸሐፊነት የሥራ ዘመናቸው ለቅድስት ቤተክርስቲያን መንፈሳዊ ተልዕኮ መሳካት፣ ልዕልናና እድገት በመሥራት ያስመዘገቧቸው ውጤቶን እጅግ የሚደነቁ ናቸው፡፡

ብፁዕ አቡነ ሳዊሮስ በቅዱስ ሲኖዶስ ዋና ጸሐፊነት የሥራ ዘመናቸው የቤተክርስቲያን ሕጎች፣ ደንቦችና መመሪያዎች ተከብረው ሥራዎች እንዲሠሩ ከፍተኛ ጥረት በማድረግ ውጤታማ ሥራ ሠርተዋል፡፡ በተለይም የቤተክርስቲያን ልዕልናና ክብር እንዲጠበቅ የሚከናወኑ ሥራዎች ሁሉ በሕግና በመመሪያ እንዲፈጸሙ፣ ከዚህ በተጨማሪም በተመደቡበት በደቡብ ምዕራብ ሸዋና በሸገር አህጉረ ስብከት በሰላም፣ በፍቅርና በስምምነት ሥራዎቻቸውን በመፈጸም፣ የካህናትና የአገልጋዮች መብት እንዲከበር፣ መንፈሳዊ አገልግሎቶቸው ሁሉ በፍቅርና በስምምነት በማከናወን በርካታ አብያተ ክርስቲያናት እንዲታነጹ በማድረግ በርካታ ስኬታማ ሥራዎችን ሠርተዋል፡፡ ብፁዕነታቸው አጠቃላይ ዓለም አቀፍ የሰበካ ጉባኤ ስብሰባ ላይ ከአንጋፋና ዘመን ከአስቆጠሩ ብዙ አህጉረ ስብከቶች የተሻለ አፈጻጸም በማስመዝገቡ ለመሸለምና ለመመስገን የበቃ ሀገረ ስብከትን ፈጥረዋል፡፡ የሸገር ሀገረ ስብከት ከሌሎች አህጉረ ስብከቶች በተሻለ መልኩ የመልካም አስተዳደር ሥርዐት የሚታይበት ነው፡፡ /ልማት በቤተክርስቲያን መጽሔት፤ ሰኔ ፳፫ ቀን ፳፻፲፯ ዓ.ም/፡፡

ብፁዕነታቸው ሌላው የሚታወቁበት በስብከተ ወንጌል አገልግሎት ነው፡፡ በሀገረ ስብከቱ “ወጣትነት ለቤተክርስቲያን” በሚል ርእስ በሸገርና በደቡብ ምዕራብ ሸዋ አህጉረ ስብከት ላይ በስፋት አገልግሎት እየተሰጠ ይገኛል፡፡ በሸገር ከተማና ደቡብ ምዕራብ ሸዋ አህጉረ ስብከት ደረጃ በብፁዕነታቸው አመራር ሰጪነት የተቋቋመው ወጣትነት ለቤተክርስቲያን ስብከተ ወንጌልን በማስፋፋት በአጠቃላይ በስብከተ ወንጌል ዘርፍ ስኬታማ ሥራዎች ለመሥራት ተችሏል፡፡

የኢትዮጵያ ኦርቶዶክስ ተዋሕዶ ቤተክርስቲያን የቤቶችና ሕንጻዎች አስተዳደርና ልማት ድርጅትን አሠራር ማዘመን ይቻል ዘንድ ብፁዕነታቸው የሰጡትን አመራር የገቢ አሰባሰብ ሥርዓቱ ዘመናዊና ዲጃታል እንዲደረግ፣ድርጅቱ የራሱ የሆነ ድረ ገጽ እንዲኖረው ተደርጓል፡፡ በትንሣኤ አሳታሚ ድርጅት ከፍተኛ ወጪ ታትመው የተከማቹ መጻሕፍቶችን በማሰራጨት ሥራ መላውን የቤተክህነት ሠራተኛን በማሳተፍ መጻሕፍቶቹ በጨረታ ተሸጠው የቤተክርስቲያን ገቢ በአግባቡ እንዲሰበሰብ፣መጻሕፍቱም አገልግሎት ላይ እንዲውሉ ተደርጓል፡፡ የኢትዮጵያ ኦርቶዶክስ ተዋሕዶ ቤተክርስቲያንን ታሪኮቿ፣ የቅዱስ ሲኖዶስ ውሳኔዎችን፣ልዩልዩ ሃብቶቿን፣ የያዙ የታሪክ ሰነዶች ተለይተው፣ተደራጅተውና በዘመናዊ መልኩ ወደ ዲጂታል ፋይል ተቀይረው ለታሪክና ለትውልድ እንዲተላለፉ እየተከናወነ ይገኛል።

የመንበረ ፓትርያርክ ጠቅላይ ቤተክህነት ቅጽር ጊቢ በሚገባ ጸድቶ፣አምሮና ተውቦ፣ለዕይታ የሚማርክ፣የቤተክርስቲያንን ክብር የሚመጥን፣ ቅጽረ ጊቢ እንዲሆን ተደርጓል። አሮጌው ቄራ በመባል በሚታወቀው ቦታ ላይ በመሠራት ላይ የነበሩት ሁለት ግዙፋን ሁለገብ ሕንጻዎችም ትኩረት ሰጥቶ ለውጤት አብቅተዋል፡፡አሁንም ቤተክርስቲያን በመጪው ዘመን መንፈሳዊ አገልግሎቷን የምትጠቀምበት ዘመናዊ ሕንጻዎች እየተገነቡ ይገኛሉ፡፡

ብፁዕ አቡነ ሳዊሮስ በዘመነ ሢመታቸው ከሠሯቸው በርካታና ውጤታማ ሥራዎች መካከል በታሪክ መዝገብ ከሚሰፍሩ ሥራዎቻቸው መካከል ተጠቃሽ የሚሆነው የሸገር ሀገረ ስብከት ውጤታማ ሥራቸውና ከአስተዳደራዊ ሥራዎች በተጓዳኝ የሚያከናውኗቸው የመንፈሳዊ አገልግሎቶች ናቸው። ብፁዕነታቸው በሚገርም ትጋትና ብቃት የአስተዳደራዊና የልማት ሥራዎችን ከመምራት በተጓዳኝ በዓበይት በዓላት፣በአብያተ ክርስቲያናት ምረቃ፣በስብከተ ወንጌል አገልግሎቶች፣ወዘተ በሀገረ ስብከታቸው በየጊዜው በመገኘት ወጣቱ ትውልድ በስብከተ ወንጌል አማካኝነት፣በቃለ እግዚአብሔር ታንጾ እንዲያድግና የቤተክርስቲያን ተረካቢ እንዲሆን በማድረግ ረገድ እያደረጉት ያለው ጥረትና እያስመዘገቡት ውጤት የመሪነት ብቃታቸውን የሚያሳይ ነው።

ብፁዕነታቸው በልማትም ይታወቃሉ፤ በሀገረ ስብከቱ ያለ መሰልቸት ትልቅ ትንሽ ደብር ነው፣ ገጠር ነው ከተማ ሳይሉ በአስቸጋሪ ቦታና ሁኔታ ሳይቀር አልፈው ሐዋርያዊ አገልግሎት ይጓዛሉ፡፡ በሚያደርጓቸው ጉዞዎች ሁሉ ሳይቀር ለተሠሩ ሥራዎችና ልማቶች ምስጋና አቅርበው ወደፊትም ለሚሠሩት አቅጣጫ ሰጥተው የሚመለሱ የልማት አባት ሠርተው የሚያሠሩ ታላቅ አባት ናቸው፡፡

ብፁዕ አቡነ ዲዮስቆሮስ ሊቀ ጳጳስ

ብፁዕ አቡነ ዲዮስቆሮስ በ፲፱፻፺፯ ዓ.ም በተደረገ ሢመተ ጳጰሳት ከሌሎች ፲፮ ብፁዓን ኤጲስ ቆጶሳት ጋር ተሹመው በደቡብ ትግራይ ማይጨው፣ በደቡብ ምሥራቅና በአዲግራት አህጉረ ስብከት በሊቀ ጳጳስነት እንዲሁም ከ፳፻፮-፳፻፱ ዓ.ም በጠቅላይ ቤተክህነት በዋና ሥራ አስኪጅነት በትጋት በጥንካሬ በታማኝነትና በፍጹም ቅንነት አገልግለዋል፡፡

ብፁዕነታቸው በአህጉረ ስብከት ሊቀ ጳጳስነትም ሆነ በጠቅላይ ቤተክህነት ዋና ሥራ አስኪያጅነት ዘመናቸው ለቅድስት ቤተክርስቲያን መንፈሳዊ ተልዕኮ መሳካት፣ ልዕልናና ዕድገት የሠሯቸው ሥራዎች የሚደነቁ ናቸው፡፡ ብፁዕነታቸው ስብከተ ወንጌል በማስፋፋት፣ በልማት ተተኪ ደቀ መዛሙርትን በማፍራት ወዘተ…ያከናወኗቸው ተግባራት ሰፊ ናቸው፡፡ ሕገ ቤተክርስቲያን፣ ቃለ ዓዋዲና ሌሎች ሕጎችና ደንቦችን አክበረው የሚያስከብሩ ሥራዎቻቸው ሁሉ በዕውቀት፣ በአባትነት መንፈስና በተቋማዊ ተቆርቋሪነት የሚመሩ እጅግ የተዋጣላቸው አባት ነበሩ፡፡ በአጠቃላይ ብፁዕነታቸው በተለይም በሥራ አስኪያጅነት ዘመናቸው ያላቸውን ከፍተኛ የአመራር ብቃት በመጠቀም ለቤተክርስቲያን |ዕድገትና ልዕልና ለስብከተ ወንጌል መስፋፋት፣ ለማኅበራዊና ኢኮኖሚያዊ ዕድገት ያበረከቱት አስተዋጽኦ፣ ያስመዘገቡት ተቋማዊ ዕድገት ከፍተኛ ዕውቅና እንዲያገኙ አስችሏቸዋል፡፡ /ዝኒ ከማሁ/፡፡

ቅዱስ ሲኖዶስ በበላይ ሊቀ ጳጳስነት እንዲመሩት የሰጣቸውን የቅርስ ጥበቃ፣ ቤተ መጻሕፍት ወመዘክር መምሪያን በሰው ኃየይልና በቁሳቁስ ተደራጅቶ እንዲሠራ ለማድረግ ካደረጉት ከፍተኛ አስተዋጽኦ በተጨማሪ የቤተክርስቲያን አእምሮአዊ ንብረቶች እንዲጠበቁና በአእምሮአዊ መብትነት እንዲመዘገቡ ለማድረግ የሚያስችል ጠንካራ ኮሚቴ በመሰየምና ኮሚቴውን በአግባቡ በመመራት የቤተክርስቲያን ቅዱሳት መጻሕፍትና ንዋያተ ቅድሳት በአእምሮአዊ ንብረት እንዲመዘገብ አድርገዋል፡፡ ብፁዕነታቸው በሥራዎቻቸው ሀሉ ቅድሚያ ለቤተክርስቲያን ተቋማዊ ህልውና የሚሰጡ ትጉህ አባት ናቸው፡፡ ይህም በመሆኑ በግንቦት ፳፻፲፯ ዓ.ም የርክበ ካህናት የቅዱስ ሲኖዶስ ምልዓተ ጉባኤ ለሚቀጥሉት ሦስት ዓመታት የቅዱስ ሲኖዶስ ዋና ጸሐፊ በማድረግ መርጣቸዋል፡፡

ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ ሆነው እንዲሠሩ በቅዱስ ሲኖዶስ ምልዓተ ጉባኤ በከፍተኛ ድምጽ ከተሾሙበት ጊዜ ጀምሮ የቅዱስ ሲኖዶስ ጽሕፈት ቤት ደረጃውን በጠበቀና የቅዱስ ሲኖዶስን ክብር በሚመጥን መልኩ እንዲደራጅ ፣ እንዲዋብ በጎ አድራጊ ምዕመናንን በማስተባበር የቅዱስ ሲኖዶስ ጽሕፈት ቤት ያማረና ግሩም እንዲሆን አድርገውታል። የቅዱስ ሲኖዶስን ሥራ የሚያግዙ ምሁራን የሥራ ኃላፊዎችን በማሳተፍ የቅዱስ ሲኖዶስ ቃለ ጉባኤ በአግባቡ እንዲጻፍ፣የቅዱስ ሲኖዶስ መግለጫ ደረጃውን በጠበቀ መልኩ እንዲዘጋጅና ወጥነት ያለው የመረጃ መለዋወጫ ሥርዓት በማድረግ በርካታ ሥራዎችን ማከናወን ችለዋል። ለዚህ ውጤታማነታቸው ትልቁ ምክንያትም ብፁዕነታቸው ያላቸው የረጅም ጊዜ የሥራ ልምድ፣ብልሃት የተሞላበት የመሪነት ክህሎት፣አርቆ የማሰብ ብቃት፣መጠነ ሰፊ ተቋማዊ አመለካከት፣ ለቤተክርስቲያን ሉዓላዊነት እና ክብር በቆራጥነት የመሥራት የዳበረ ልምድና ፍጹም የሆነ የሁለንተናዊ ብቃት ባለቤት መሆናቸው እንደሆነ የሚጠራጠር አይደለም።/ዝኒ ከማሁ/፡፡

ብፁዕነታቸው የቅዱስ ሲኖዶስ ውሳኔዎች እንዲተገበሩ፣ ዘመኑን በመዋጀት ቤተክርስቲያንን እንዲያስከብሩ፣ በአጠቃላይ የቤተክርስቲያንን ሁለንተናዊ ጥቅሞች ተቋማዊ በሆነ መልኩ ያስከበሩ አባት ናቸው፡፡ የቅዱስ ሲኖዶስ ጽሕፈት ቤትን በአግባቡ በሰው ኃይልና በቁሳቁስ ማደራጀት ለቤተክርስቲያን እድገትና ልዕልና መከበር የሚረዱ ጥናቶች እንዲጠኑና በተግባር እንዲውሉ በማድረግ ቅድስት ቤተክርስቲያን መንፈሳዊ ክብሯን ለቀጣዩ ትውልድ እንድትላለፍ እየሠሩ ይገኛሉ፡፡

በአጠቃላይ ከብፁዕ አቡነ ሳዊሮስ የጠቅላይ ቤተ ክህነት ዋና ሥራ አስኪያጅ ጋር በመናበብና በመተባበር ለቅድስት ቤተክርስቲያን ሁለንተናዊ ዕድገት ጠንክረው በመሥራት ቤተክርስቲያን በ21ኛው መ/ክ/ዘ የሚጠበቅባትን ሥራ እንድታከናውን እየሠሩ ይገኛሉ፡፡ በዚህም በቤተክህነት ታሪክ ታይቶና ተሰምቶ የማያውቅ ውጤት ተመዝግቧል፡፡

ብፁዕ አቡነ ማቴዎስ ሊቀ ጳጳስ

ብፁዕ አቡነ ማቴዎስ በ፲፱፻፺፯ ዓም በተደረገ የኤጲስ ቆጶሳት ምርጫ ከሌሎች ፲፮ ብፁዓን አባቶች ጋር በብፁዕ ወቅዱስ አቡነ ጳውሎስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት የዓለም አብያተ ክርስቲያናት ምክር ቤት ፕሬዚዳንት፣ የዓለም ሃይማኖቶች ለሰላም የክብር ፕሬዚዳንት አንብሮተ እድ ተሹመው ሀገረ ስብከት ሊቀ ጳጳስነት አገልግለዋል፡፡

ብፁዕነታቸው በዋግህምራ፣ በሶማሌ ጅግጅጋ፣ በወላይታ አህጉረ ስብከት አገልግለዋል፡፡ በአሁኑ ወቅትም የኢትዮጵያ ኦርቶዶክስ ተዋሕዶ ቤተክርስቲያን መገናኛ ብዙኃን ድርጅት የበላይ ኃላፊ ሊቀ ጳጳስ በመሆን በማገልገል ላይ ይገኛሉ፡፡ ብፁዕነታቸው የቤተክርስቲያናችን ቁልፍ ሥራ የሆነውን የስብከተ ወንጌል መስፋፋትና መጠናከርን ዕውን ለማድረግ ሚዲያውን በማጠናከር ረገድ ተጨባጭ ለውጥ የተመዘገበበትም ወቅት ነው፡፡

ድርጅቱ በተለይም ከዕለት ወደ ዕለት እያደገ በሰው ኃይልና በመርሐ ግብር ዝግጅት ከፍተኛ ለውጥ እያመጣ ይገኛል፡፡ በተለይም የቤተክርስቲያናችን ተቋማት በግንባር ቀደምትነት የሚጠቀስ ሲሆን የፕሮግራም ይዘቶች መሻሻል፣ የዜናና የፕሮግራም አቀራረቦች ዘመኑን የሚመጥኑ እንዲሆኑ መደረጉ፣ ዜናዎች በመልክና በይዘታቸው ተለይተው እንዲሰራጩ መደረጉ፣ ወቅታዊ ፕሮግራሞች ወቅታቸውን ጠብቀው እንዲለቀቁ መደረጉ፣ የቀጥታ ሥርጭቶችና አስፈላጊ መረጃዎች በፍጥነት እንዲሰራጩ በማድረግ የብፁዕነታቸው አመራር ውስጥ በስኬት ካከናወናቸው በርካታ ውጤቶች መካከል የሚጠቀሱ ናቸው።

እነዚህ ስኬቶች ሊመዘገቡ የቻሉትም የድርጅቱ የበላይ ኃላፊ ሊቀ ጳጳስ፣ የድርጅቱ ሥራ አስኪያጅ፣ የድርጅቱ የሥራ ኃላፊዎች፣ የመርሐ ግብር አዘጋጆችና ጋዜጠኞች ተናበውና ዕቅድ አውጥተው በመሥራታቸው እንደሆነ የሚታወቅ ቢሆንም ለለውጡ፣ለዕድገቱ መመዝገብ ትልቁ ድርሻ የብፁዕ አቡነ ማቴዎስ ይሆናል።

እንደ ማጠቃለያ

በጽሑፉ መግቢያ እንደገለጽኩት በዚህ ጽሑፍ ለማሳየት የሞከርኩት የብፁዓን አበው ሊቃነ ጳጳሳት 21ኛ ዓመት በዓለ ሢመት፣ የተሠሩ ሥራዎችን ነው፡፡ በዚህም መሠረት ከሁለቱ ብፁዓን አበው ሊቃነ ጳጳሳት በተጨማሪ በዚሁ ዕለት የተሾሙት

ብፁዕ አቡነ ሕዝቅኤል፣

ብፁዕ አቡነ ሳሙኤል፣

ብፁዕ አቡነ ሉቃስ፣

ብፁዕ አቡነ አብርሃም፣

ብፁዕ አቡነ ዳንኤል፣

ብፁዕ አቡነ ያሬድ፣

ብፁዕ አቡነ ሚካኤል፣

ብፁዕ አቡነ ሔኖክ፣

ብፁዕ አቡነ ዕንባቆም፣

ብፁዕ አቡነ ቀሌምንጦስ፣

ብፁዕ አቡነ ሰላማ፣

ብፁዕ አቡነ ዮሐንስ፣

ብፁዕ አቡነ ማቴዎስ፣

ብፁዕ አቡነ መቃርዮስ እና

ብፁዕ አቡነ ኤውስጣቴዎስ ናቸው፡፡

የብፁዓን አባቶቻችን ቡራኬያችሁ ይድረሰን !!!

ዋቢ መጻሕፍት

ስምዐ ጽድቅ ጋዜጣ፤ መስከረም 1998 ዓ.ም

ልማት በቤተክርስቲያን ሰኔ 23 ቀን 2018 ዓ.ም

የኢትዮጵያ ሕዝብ ግንኙነት ድረ ገጽ

የመንበረ ፓትርያርክ ጠቅላይ ቤተ ክህነት ጽ/ቤት ክፍት የሥራ ማስታወቂያ

August 28, 2026

የመንበረ ፓትርያርክ ጠቅላይ ቤተ ክህነት ጽ/ቤት የኢንፎርሜሽን ኮሙኒኬሽን ቴክኖሎጂ መምሪያ ቀጥሎ ለተዘረዘሩት የሥራ መደቦች መመዘኛዎች የሚያሟሉ፤ ብቁ እና ተነሳሽነት ያላቸው 2 (ሁለት) ባለሞያ ሠራተኞችን አወዳድሮ በጽ/ቤቱ የደሞዝ ስኬል መሠረት ለመቅጠር ይፈልጋል።
ማስታወቂያው የወጣበት ቀን፡ ነሐሴ 21/ 2018 ዓ.ም
ማመልከቻ መቀበያ የመጨረሻ ቀን፡ መስከረም 7/2019 ዓ.ም
ማመልከቻ ማቅረቢያ ሁኔታ
መስፈርቱን የሚያሟሉ አመልካቾች ማስታወቂያው ከወጣበት ቀን ጀምሮ ባሉት 15 (አስር) የሥራ ቀናት ውስጥ ከዚህ በታች የተዘረዘሩትን ሰነዶች ይዘው በጠቅላይ ቤተ ክህነት ጽ/ቤት የአስተዳደር መምሪያ በመቅረብ መመዝገብ ይችላሉ፡፡
· የሥራ ማመልከቻ ደብዳቤ ከአንድ ገጽ ያልበለጠ
· የግል፣ የትምህርት እና የሥራ ልምድ ማጠቃለያ (ካሪኩለም ቪቴ – CV)
· መታወቂያ (የነዋሪነት ወይም ፋይዳ) ፣ የትምህርት (ሰርተፍኬት እና ትራንስክሪፕት) ፣ የሥራ ልምድ (ቀን፣ ወር፣ ዓ/ም እና የደሞዝ መጠን የተጠቀሰበት) ፣ የክህነት (ለካህናት ብቻ) እና የሰበካ ጉባኤ አባልነት (ለምእመናን ብቻ) ማስረጃዎች ዋናውን እና የማይመለስ ፎቶ ኮፒ
· ከ6 ወር ያልበለጠ 1 (አንድ) ጉርድ ፎቶግራፍ፡

ቤተ ክርስቲያን የሁሉም ወገን እናት እንጂ የቡድኖች መጠቀሚያ ልትሆን አይገባም ይበቃልን እንበል!” ብፁዕ ጠቅላይ ሥራ አስኪያጅ አቡነ ሳዊሮስ ሊቀ ጳጳስ

August 25, 2026

ብፁዕነታቸው የአዲስ አበባ ሀገረ ስብከት ዋና ሥራ አስኪያጅ መልአከ ብርሃን ሰሎሞን በቀለ ከገዳማትና አድባራት የአገልግሎት መሪዎች ጋር ባደረጉት የትውውቅ መርሐ ግብር ላይ ተገኝተው አባታዊ ቡራኬና የሥራ መመሪያ ሰጥተዋል።

ብፁዕ ጠቅላይ ሥራ አስኪያጅ አቡነ ሳዊሮስ ሊቀ ጳጳስ ያስተላለፉት ሙሉ መልእክት እንደሚከተለው ይነበባል።

በስመ አብ ወወልድ ወመንፈስ ቅዱስ አሐዱ አምላክ አሜን።

ብፁዕ አቡነ ዲዮስቆሮስ፣

የቅዱስ ሲኖዶስ ዋና ጸሐፊና የራያ ሀገረ ስብከት ሊቀጳጳስ

ክቡራን የመንበረ ፓትርያርክ ጠቅላይ ቤተክህነት የየመምሪያ ኃላፊዎች

ክቡር መልአከ ብርሃን ሰሎሞን በቀለ፣

የአዲስ አበባ ሀገረ ስብከት ዋና ሥራ አስኪያጅ

የሀገረ ስብከቱ የዋና ክፍል ኃላፊዎችና ሠራተኞች

የሁሉም ክፍላተ ከተማ ዋና ሥራ አስኪያጆችና ሠራተኞች

የአዲስ አበባ ገዳማትና አድባራት አስተዳዳሪዎች፤ የሥራ ኃላፊዎችና ሠራተኞች በሙሉ፦

ከሁሉ አስቀድሜ የዘመናት ባለቤት ልዑል እግዚአብሔር ሁላችንንም በያለንበት ጠብቆና አቆይቶ የእመቤታችን ሱባዔ በሰላምና በፍጹም ፍቅር መንፈሳዊ አገልግሎታችን አቀን የዛሬውን ዕለት ያሳየንና ቅድስት ቤተክርስቲያናችንን በቸርነቱ የሚጠብቃት የሠራዊት ጌታ ልዑል እግዚአብሔር ስሙ የተባረከ ይሁን።

አልቦ ጻድቅ ወአልቦ ጠቢብ ወአልቦ ዘየኃሥሦ ለእግዚአብሔር ሮሜ 3፥11 የሰው ልጆች ሁሉ ከተለያየ ሀገርና ቋንቋ ከተለያየ የሰው ዝርያ (ነገድ) የተገኘን እንደመሆናችን መጠን በቋንቋ፣ በቀለም፣ በአመጋገብ፣ በአለባበስ፣ በባህል፣ በአስተሳሰብ ጭምር ልዩነት እንዳለን ከሁላችሁም የሚሰወር አይደለም፡፡

ይሁን እንጂ ከልዩነታችን ይልቅ አንድ የምንሆንበትና የምንመሳሰልበት ነገር ጉልህ ሆኖ እንደሚታይ ከቅዱሳት መጻሕፍት ገለጻ መረዳት እንችላለን።

በመግቢያው በግዕዝ ቃል የተናገርኩት የሐዋርያው ቃል በአማርኛ ስናዳምጠው እንዲህ ይላል “ጻድቅ የለም፤ አንድ ስንኳ አስተዋይም የለም፤ እግዚአብሔርንም የሚፈልግ የለም፤ ሁሉ ተሳስተዋል” ሮሜ ምዕራፍ 3 ቁጥር 11። “በአንድነትም የማይጠቅሙ ሆነዋል ቸርነት የሚያደርግ የለም፤ አንድ ስንኳ የለም” ብሎ መዝግቦልናል ሮሜ ምዕራፍ 3 ቁጥር 12። ምክንያቱም ከአዳምና ከሔዋን ዘር

በመወለድና በሠራነው ኃጢአት ሁላችንም እኩል በአንድነት በአንድ አንቀጽ ተከሰናል።

በሌላም መልኩ ስናየው እኔ ቅዱስ ነኝና እናንተም ቅዱሳን ሁኑ በማለት አንድያ ልጁን ወደ ዓለም ለመላክ የተገደደበት ኃጢአታችን እንጂ ቅድስናችን አይደለም። ከዚህም መረዳት ያለብን ሁላችንም ያስፈለገን አንድ መድኃኒት እንጂ የተለያየ አለመሆኑን ገላጭ ነው።

ይህን እውነታ በጥልቀት የተረዳው ሌላው ሐዋርያ “ኃጢአት የለብንም ብንል ግን ራሳችንን እናስታለን የቀና ነገርም በኛ ዘንድ የለም ኃጢአታችንን አምነን ብንናገር ግን ኃጢአታችንን ይቅር ይለን ዘንድ የታመነ ነው ቸርም ነው ከበደላችንም ሁሉ ያነጻናል” (1ኛ ዮሐ ምዕራፍ 1 ቁጥር 9) አሁን እንግዲህ ከነዚህ ኃይለቃሎች ይቅር መባል፣ ትላንትን መርሳት ከውድቀት መነሣት ወደ ክብር መመለስ እንደሚቻል በመጽሐፍ ከተመዘገበው እውነታ መማርና መረዳት እንችላለን፡፡

ለመልዕክቴና ለዕለቱ ተስማሚ ይሆናል በማለት ለመግቢያ ይህን ካልኩ ለዛሬ መሰባሰባችን ምክንያት የሆነችን ቅድስት ቤተክርስቲያናችን የጥንታውያንና የታሪካውያን አበው እምነት ማኅደር፤ የሀገራችን ኢትዮጵያ መንፈሳዊ፣ ባሕላዊና ታሪካዊነት መሠረት እንዲሁም የቅርሶቿ ባለቤትና ቀደምት ተጠሪ ናት።

ለዘመናት የሀገራችንን አንድነት ጠብቃ የትምህርትና የስልጣኔ ብርሃንን አብርታ የሕዝብን ግብረገብነትና ፍቅር ኮትኩታ ዛሬ ላይ ያደረሰች ታላቅና ብሔራዊ ተቋም በመሆኗ የልባችን ኩራት ናት፡፡

ቤተክርስቲያናችን በአሁኑ ወቅት በዓለም አቀፍ ደረጃ አገልግሎቷን

እያሰፋችና እያሳደገች ያለችበት ቢሆንም በሌላ በኩል ደግሞ ከዘመኑ ሥልጣኔ ጋር የበቀሉ የቴክኖሎጂ መስፋፋቱን ተንተርሰው የመጡ በርካታ መልዕክት ማስተላለፊያዎች ከፊቷ ተደቅነው ፈተና ሆነውባታል፡፡

ውጫዊ ፈተናዎች የወንጌልን ትምህርት ለማዳከም የሚደረጉ መንፈሳዊና ማኅበራዊ ጫናዎች የሰላም እጦትና የምዕመናን መበታተን ሲሆን፣ ውስጣዊ ፈተናዎች ደግሞ የመልካም አስተዳደር እጦት፣ ዘመኑን የዋጀ የሥራ አመራር

ሥርዓት ማነስ፣ የንብረትና የሀብት ማኔጅመንት ክፍተቶች እንዲሁም የአገልጋዮች አቅም ግንባታ ማነስ ዋና ዋናዎቹ ሲሆኑ በጊዜ ሂደት በተከሰቱ የአስተዳደር ብልሹነቶች በሙስና፣ በብሔርተኝነትና ሕጋዊ አሠራርን ባልተከተሉ አካሄዶች ምክንያት ዛሬ ላይ ታላቋ ቤተክርስቲያናችን በተለይ በአዲስ አበባ ሀገረ ስብከት አስተዳደር ሥራ አፈጻጸም ላይ በተለያየ መልኩ የብዙዎች መነቀፍያና የማኅበራዊ ሚዲያ አፍ መፍቻ ሆና መፍትሔ የምትፈልግበት ተቋም ሆናለች።

ይህ ሁኔታ የእያንዳንዳችንን ልብ የሚሰብርና ሊቀጥል የማይገባው የአንድ ወቅት ታሪክ ሆኖ ማለፍ ያለበት አሳዛኝ ምዕራፍ ነው ዛሬ ይሄንን ለሰሚው ግራ የሆነ ደስ የማይል ምዕራፍ በይፋ የምንዘጋበት በመግቢያ ጥቅሴ እንደተገለጸው ማንም ያልበደለ ስለሌለ በንስሐና በአዲስ መንፈስ የምንነሣበት ቀን ነው።

ቤተክርስቲያናችን ከተደቀኑባት ችግሮች አውጥተን የትናንት ታላቅነቷንና ክብሯን የመመለስ ታሪካዊ ኃላፊነት ያለብን በመሆኑ ይህንን የለውጥ መስመር እንዲመሩልን ክቡር መልአከ ብርሃን ሰሎሞን በቀለን የአዲስ አበባ ሀገረ ስብከት ዋና ሥራ አስኪያጅ አድርገን ሾመናል፡፡

ተሿሚው ወንድምና ልጃችን ወደፊት በሚያከናውኗቸው ተግባራት ከብሔርና ከቡድን አሠራር ነጻ የሆነ መዋቅር ቤተክርስቲያንን ብቻ ማዕከል ያደረገ አድሏዊ ያልሆነና እውነተኛ የመንፈስ ቅዱስ ሀሳብን በአሠራር በመዘርጋት የቅዱስ ሲኖዶስ ውሳኔና ልዕልና በማክበር የበላይ አካል መመሪያና ለሀገረ ስብከቱ የተሰጠውን ደንብ ጠብቀው በቴክኖሎጂ የታገዘ አሠራር የፋይናንስና ንብረት አስተዳደሩን ግልጽ፣ ዘመናዊና ቁጥጥር የሚደረግበት በማድረግ ሙስናንና ብልሹ አሠራርን ፈጽመው እንደሚያጠፉ ትልቅ ተስፋና አደራ ጭምር ጥለንባቸዋል፡፡

ማዕከላዊነት ላይ የተመሠረተ የአሠራር ሲስተም በመዘርጋት አዲሱ ዋና ሥራ አስኪያጅና አመራራቸው ሀገረ ስብከቱን ነጻ በሆነ መንገድ ያለምንም ማማለጃ ማስተዳደር አለባቸው ቤተክርስቲያን የሁሉም ወገን እናት እንጂ የቡድኖች መጠቀሚያ ልትሆን አትችልም ይበቃል ብለን ሀገረስብከቱን ከገባበት የስም መጥፋት አጣብቂኝ ማላቀቅ ጊዜ የሚሰጠው ሆኖ አላገኘነውም፡፡

በሀገረ ስብከቱ በየጊዜው የሚነሣውና የሚስተዋለው ሙስናና ብልሹ አሠራርን ማስወገድ የቤተክርስቲያንን ሀብትና ንብረት ከብክነት በመጠበቅ የቀደመውን ስም ማደስ ቀደምት አባቶቻችን ቤተክርስቲያንን ከምንም አይነት የአስተዳደርና የሞራል እድፍ ጉድፍ ነጻ አድርገው ቅድስናዋን ከሙሉ ክብሯ ጋር እንዳስረከቡን ሁሉ ዛሬም የታጣብንን ታማኝነት የተበላሸውን ስም አድሰን ለቀጣዩ ትውልድ የማስረከብ ታላቅ አደራ በዛሬው ዕለት ጥለንባችኋል፡፡

ፍትሕና መልካም አስተዳደር በሀገረ ስብከቱ ሰፍኖ የሊቃውንት፣

የካህናትና ሠራተኞች አበሳ የሚያበቃበት የበደል ድምጽ የማይሰማበት እኩልነት የሚሰፍንበት አሠራር እንደሚቀየስ እምነቴ ጽኑ ነው።

በመጨረሻም የሀገረ ስብከቱ ዋና ክፍል ኃላፊዎችና ሠራተኞች በየክፍላተ ከተማው የምትገኙ ሥራ አስኪያጆችና ሠራተኞች የገዳማትና አድባራት አስተዳዳሪዎች የሰበካ ጉባኤ አባላትና መላው ካህናትና ሠራተኞች ተሿሚውን ዋና ሥራ አስኪያጅ በመደገፍ ከጎናቸው በመቆም እና ብልሹ አሠራርን በመታገል ሀገረ ስብከቱ ወደ ቀደመ ክብሩና ስሙ እንዲመለስ የየድርሻችሁን እንድትወጡ አባታዊ ጥሪዬን አስተላልፋለሁ። ለአዲሱ ዋና ሥራ አስኪያጅና ለአመራራቸው ጥበብንና ብርታቱን ይስጣችሁ ቤተክርስቲያናችንን በሰላምና በቅድስና ይጠብቅልን።

“በደመወዛችሁ ኑሩ እንጂ በማንም ግፍ አትሥሩ፤ ማንንም አትቀሙ፤ አትበድሉ” (ሉቃስ 3:12)

ነሐሴ ፲፱/፳፻፲፰ ዓ/ም

አባ ሳዊሮስ

የመንበረ ፓትርያርክ ጠቅላይ ቤተ ክህነት ዋና ሥራ አስኪያጅ

የደቡብ ምዕራብ ሸዋና ሸገር አህጉረ ስብከት ሊቀ ጳጳስ

የአዲስ አበባ ሀገረ ስብከት ዋና ሥራ አስኪያጅ በመሆን ለተመደቡት ለመልአከ ብርሃን ሰሎሞን በቀለ በሀገረ ስብከቱ አዳራሽ በደማቅ አቀባበል ተደረገላቸው ።

August 25, 2026

ነሐሴ 19 ቀን 2018 ዓ.ም

በኢትዮጵያ ኦርቶዶክስ ተዋሕዶ ቤተክርስቲያን ቋሚ ሲኖዶስ ከነሐሴ 8 ቀን 2018 ዓ.ም ጀምሮ የአዲስ አበባ ሀገረ ስብከት ዋና ሥራ አስኪያጅ በመሆን ለተመደቡት ለመልአከ ብርሃን ሰሎሞን በቀለ አቀባበል ተደረገላቸው ።

በአቀባበሉ ላይ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ የራያ ሀገረ ስብከት ሊቀ ጳጳስ፣ ብፁዕ አቡነ ሳዊሮስ የመንበረ ፓትርያርክ ጠቅላይ ጽሕፈት ቤት ዋና ሥራ አስኪያጅ የደቡብ ምዕራብ ሸዋ እና የሸገር ከተማ አህጉረ ስብከት ሊቀ ጳጳስ ፣ብፁዕ አቡነ ጢሞቴዎስ የዳውሮ ኮንታ ከንባታና አላባ ጠንባሮ አህጉረ ስብከት ሊቀ ጳጳስ፣ የመንበረ ፓትርያርክ ጠቅላይ ጽሕፈት ቤት መምሪያ ኃላፊዎች የአዲስ አበባ ሀገረ ስብከት ልዩ ልዩ ክፍል ኃላፊዎችና ሠራተኞች የክፍላተ ከተማ ኃላፊዎችና ልዩ ልዩ ሠራተኞች የአድባራትና ገዳማት አስተዳዳሪዎችና አገልጋዮች ተገኝተዋል ።

መርሐ ግብሩ በጸሎተ ወንጌል ተጀመረ ሲሆን ለሥራ አስኪያጁ የሥራ ዘመን መመሪያ ይሆን ዘንድ በማቴዎስ ወንጌል ምዕራፍ 20 ከቁጥር 26 ጀምሮ ተነቦ ለመርሐ ግብሩ ተስማሚ የሆነ ወረብ በቦሌ ኆኅተ ብርሃን ቅድስት ማርያም ሊቃውንት መዘምራን

ቀርቧል ።

የአዲስ አበባ ሀገረ ስብከት ዋና ሥራ አስኪያጅ ክቡር መልአከ ብርሃን ሰሎሞን በቀለ የሢመት ደብዴቤ ከተነበበ በኋላ የሀገረ ስብከቱ ክፍል ኃላፊዎች እና የክፍላተ ከተማ ቤተክህነት ሊቃነ ካህናት በጉባኤው ፊት ቀርበው ትውውቅ ተደርጓል ። በሊቃውንትም ቅኔ ተበርክቷል ።

የሀገረ ስብከቱ ዋና ሥራ አስኪያጅ ስብከተ ወንጌልን፣ ሰበካ ጉባኤን ፣ሰንበት ትምህርት ቤትን በማደራጀትና በማስፋፋት ፣ ቤተክርስቲያንን ጠብቆ በማስጠበቅ ሁለንተናዊ ልማትን እንዲያጠናክሩ ፣ ሕገ ቤተክርስቲያንን ጠብቀው የመልካም አስተዳደር ችግርና ሙስናን እንዲቀርፉ ኃላፊነት ተሰጥቶአቸዋል።

ክቡር ሊቀ ሊቃውንት ቆሞስ አባ ተ/ሃይማኖት ወልዱ ሰለ ሀገረ ስብከቱ ዋና ሥራ አስኪያጅ ያላቸውን የሥራ ክህሎት በመግለጽ ቤተ ክርስቲያንን አብረን እናሻግራት ማሻገር ባንችል ባለቤት ሆኖ የመሠረታት ክርስቶስ ያሻግራታል እኛ ሰጥመን እንዳንቀር ሲሉ ማስጠንቀቂያ አዘል ምክራቸውን ለግሰዋል።

የቦሌ ኆኅተ ብርሃን ቅድስት ማርያም ተወካይ ክቡር መልአከ ብርሃን ሰሎሞን በደብራችን ዘርፈ ብዙ ሰዋዊ እና የመሠረተ ልማት ተግባሮችን አከናውነዋል በማለት በዝርዝር የሠሯቸውን ሥራዎች አቅርበዋል።

መልአከ ብርሃን ሰሎሞን በቀለ ከቅዱስ ሲኖዶስ የተሰጣቸውን ኃላፊነት በታማኝነት እንደሚወጡ በሢመቱ ላይ የተነበበውን ዝርዝር መመሪያ በማንሳት አሁን ላይ ሀገረ ስብከቱን የተጋረጡበትን ተግዳሮቶች በጋራ እንቀርፋለን ብለዋል።

ብፁዕ አቡነ ሳዊሮስ የመንበረ ፓትርያርክ ጠቅላይ ጽሕፈት ቤት ዋና ሥራ አስኪያጅ በሮሜ 3፣ 11 በመጥቀስ ወንጌል የሰውን ልጅ በኃጢአቱ እንደምትከስ በመጥቀስ ከውድቀታችን በንስሐ ልንመለስ ይገባል ብለዋል።

ብፁዕነታቸው የኢትዮጵያ ኦርቶዶክስ ተዋሕዶ ቤተክርስቲያን ጥንታዊነትና ታሪካዊ መሆኗን በመጥቀስ

” ተሿሚው ወንድምና ልጃችን ወደፊት በሚያከናውኗቸው ተግባራት ከብሔርና ከቡድን አሠራር ነጻ የሆነ መዋቅር ቤተክርስቲያንን ብቻ ማዕከል ያደረገ አድሏዊ ያልሆነና እውነተኛ የመንፈስ ቅዱስ ሀሳብን በአሠራር በመዘርጋት የቅዱስ ሲኖዶስ ውሳኔና ልዕልና በማክበር የበላይ አካል መመሪያና ለሀገረ ስብከቱ የተሰጠውን ደንብ ጠብቀው በቴክኖሎጂ የታገዘ አሠራር የፋይናንስና ንብረት አስተዳደሩን ግልጽ፣ ዘመናዊና ቁጥጥር የሚደረግበት በማድረግ ሙስናንና ብልሹ አሠራርን ፈጽመው እንደሚያጠፉ ትልቅ ተስፋና አደራ ጭምር ጥለንባቸዋል።”

ብለዋል።

ከአዲስአበባ ሀገረ ስብከት አጣሪ ኮሚቴ የተሰጠ ማሳሰቢያ

August 25, 2026

የኢትዮጵያ ኦርቶዶክስ ተዋሕዶ ቤተክርስቲያን ቋሚ ሲኖዶስ በአዲስአበባ ሀገረ ስብከት የተከሰተውን የመልካም አስተዳደር ችግር አጣርቶ ከመፍትሔ ሐሳብ ጭምር የሚያቀርብ ኮሚቴ አቋቁሞ ወደ ሥራ እንዲገባ ማድረጉ ይታወቃል።

ይህንን ተከትሎ የተቋቋመው ኮሚቴ መረጃዎችን ለመሰብሰብ፣

ለማደራጀትና ለመተንተን ያስችለው ዘንድ ቀደም ሲል ባደረገው ጥሪ መሠረት መረጃዎችን ማሰባሰብ መጀመሩ ይታወቃል።

ይሁንና አንዳንድ መረጃ ያቀረቡ ሰዎች ከግንቦት 2017 ዓ.ም

እስከ ሐምሌ 2018 ዓ.ም ድረስ ብቻ ያሉ መረጃዎችን መስጠት ሲገባቸው ከሁለት ዓመታት በፊት በሀገረ ስብከቱ በደል ደርሶብናል የሚሉ ጭምር ማስረጃዎቻቸውን እያደረሱን መሆኑን ተመልክተናል።

ስለሆነም አጣሪ ኮሚቴው ከግንቦት 2017 ዓ.ም እስከ ሐምሌ 2018 ዓ.ም ድረስ በደል ደርሶብናል የሚሉ በርካታ ማረጃዎችን እየተቀበለ መሆኑን ከመግለጽ ጋር በቀሪዎቹ ሦስት ቀናት ብቻ ቀረ የምትሉትን ማስረጃ ለኮሚቴው እንድታደርሱ እያስታወቅን ከአርብ ነሐሴ 22 ቀን 2018 ዓ.ም በኋላ የተሰበሰቡትን መረጃዎች በመተንተን ወደ ጭብጥ በመቀየር የጥናቱ ግብዓት የማድረግ ሥራ ብቻ የሚያከናውን ስለሆነ ማስረጃዎችን የማይቀበል መሆኑን ከወዲሁ ይገልጻል።

አጣሪ ኮሚቴው

ነሐሴ19 ቀን 2018 ዓ.ም

አዲስአበባ -ኢትዮጵያ