ግንቦት ፳፪ ቀን ፳፻፲ወ፰ ዓም
የለገዳዲ አንቀጸ ምሕረት ቅድስት ኪዳነ ምሕረት ቤተክርስቲያን በብፁዕ አቡነ ሳዊሮስ የመንበረ ፓትርያርክ ጠቅላይ ቤተ ክህነት ዋና ሥራ አስኪያጅ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ ቡራኬ ተመረቀ፡፡ ቤተክርስቲያኑን ለማጠናቀቅ ዐሥራ ሁለት ዓመት የፈጀ ሲሆን፤ በወቅቱ የመሠረት ድጋዩ የተጣለው በ፳፻፮ ዓ.ም በሰሜን ሸዋ ሰላሌ ሀገረ ስብከት ሊቀ ጳጳስ በብፁዕ አቡነ ቀውስጦስ ሲሆን፤ ለምርቃት የበቃውም በብፁዕ አቡነ ሳዊሮስ ዕለት በዕለት ክትትልና አመራር ሰጪነት መሆኑን የደብሩ አስተዳዳሪ መልአከ ምሕረት ቀሲስ ያሬድ ሺፈራው ያስረዳሉ፡፡ የደብሩ አስተዳዳሪ አያይዘውም አዲሱ ሕንጻ ቤተክርስቲያን ተመርቆ አገልግሎት መስጠት መጀመሩ እንዳስደሰታቸው ጠቁመው፤ በቤተክርስቲያን ሕሙማንን የሚፈውስ ታሪካዊ፣ በርካታ ገቢረ ተአምራት የሚፈጸምበት ጠበል የሚገኝ በመሆኑ ምእመናን ወደ ሥፍራው መጥተው እንዲጠመቁ ጥሪያቸውን አስተላልፈዋል፡፡
ብፁዕ አቡነ ሳዊሮስ እንደተናገሩት “ ግሩም የሆነ፣ በጣም ያማረ ሕንጻ ቤተክርስቱያን አንጻችኋል፡፡ በድካማችኁ፣ በገንዘባችኁ ዘመን ተሸጋሪ፣ ለቀጣዩ ትውልድ የሚተላለፍ ታካዊ ቤተክርስቲያን እግዚአብሔር ፈቅዶላችሁ፣ እናንተ የምትገለገሉበት፣ እግዚአብሔር የሚመሰገንበት ሠርታችሁ በማጠናቀቃችሁ እንኳ ደስ አላችሁ” ብለዋል፡፡ ብፁዕነታቸው አያይዘውም ቤተክርስቲያኑን በፍቅር፣ በሰላም በአንድነት እንድታመሰገኑ ሲሉ አባታዊ መልእክታቸውን አስተላልፈዋል፡፡
የሕንጻ አሠሪ ኮሚቴ ጸሐፊ አቶ ዐቢይ አበበ እንደተናገሩት ይህን ቤተክርስቲያን ስንሠራ ብዙ ነገር አሳልፈናል፤ እግዚአብሔር ለዛሬዋ ለምርቃት ቀን ስላበቃን እግዚአብሔርን እናመሰግናለን ብሏል፡፡
ሊቀ ብርሃናት መምህር ተክለ ብርሃን “እናንተ እንደ አንድ ልብ መካሪ፣ እንደ አንድ ቃል ተናጋሪ ሆናችሁ ቤተክርስቲያን ሠርታችኋል፤ በቅዱስ መጽሐፍ እንደተገለጸው ቤተመቅደስ ሥሩልኝ እኔም በውስጡ እድራለሁ ያለውን ቃል ተግባራዊ ያደረጋችሁ በመሆናችሁ፤ ዕድለኞች ናችሁ እንኳን ደስ አላችሁ በማለት ደስታቸውን ገልጸዋል፡፡
በመጨረሻም ለሕንጻ ቤተክርስቲያኑ ግንባታ በዕውቀታቸው፣ በጉልበታቸውና በገንዘባቸው ከፍተኛ አስተዋጽኦ ላበረከቱ ምእመናን፣ በጎ አድራጊዎችና በሕንጻ አሠሪ ኮሚቴ ሲያገለግሉ የነበሩ ከብፁዕነታቸው እጅ ሽልማትና የምስጋና ምስክር ወረቀት ተቀብለዋል፡፡
በመርሐ ግብሩ ላይ መልአከ ኃይል አባ አፈወርቅ ዮሐንስ የለገጣፎ ለገዳዲ እና ኩራ ጂዳ፣ የመልካ ኖኖ፣ የጉጂ ገፈርሳ ክፍላተ ከተማ እንዲሁም በአዲስ አበባ ሀገረ ስብከት የለሚ ኩራ ክፍለ ከተማ ዋና ሥራ አስኪያጅ፣ ሊቀ ልሣናት በዳሳ ቶላ የኮዬ ፈጬና ገላን ክፍላተ ከተማ ዋና ሥራ አስኪያጅ እና ጥሪ የተደረገላቸው እንግዶችና በርካታ የአካባቢው ምእመናን ተገኝተዋል፡፡©EOTC_TV

ከታህሳስ ወር 2017 ዓ.ም ጀምሮ ሲገነባ በቆየው የወንዝ ማስቀየስ ሥራ በተለያየ ወረዳ ተበታትነው የነበሩ ቦታዎች ወደአንድ ወረዳ እንዲካተቱ እና ደብሩ የይዞታ ማረጋገጫ ካርታ እንዲያገኝ ተደርጓል።
በከፍተኛ ወጪ በአጭር ጊዜ የተከናወነው ግንባታ በብፁዕ አቡነ ሕርያቆስ የአዲስአበባ የሀዲያ እና ስልጤ አህጉረ ስብከት ሊቀ ጳጳስ እና በብፁዕ አቡነ ናትናኤል የሰሜን አሜሪካ ሚኒሶታ እና ኮሎራዶ አህጉረ ስብከት ሊቀ ጳጳስ ተባርኮ ተመርቋል።
በምረቃ መርሀ ግብሩላይ ብፁዓን አባቶች እና የቦሌ ክፍለ ከተማ ወረዳ ቤተክህነት ሥራ አስኪያጅ መልዓከ ብርሃን ሩፋኤል የማነ ብርሃን ፣ የአድባራት እና ገዳማት አስተዳዳሪዎች ሊቃውንት አባቶች የክፍለ ከተማው ዋና ሥራ አስፈጻሚ አቶ አደፍርስ ሆራ እና ሌሎች የመንግሥት የሥራ ኃላፊዎች እንዲሁም በርካታ ምዕመናን ተገኝተዋል።
በኩረ ትጉኀን ጸጋዬ ዓለማየሁ የሰበካ ጉባኤ ምክትል ሊቀመንበር ባቀረቡት ሪፖርት ደብሩ በ2012 ዓ.ም ከተመሠረተ ጀምሮ የተከናወኑ ሥራዎችን አብራርተዋል።
የክፍለ አተማው ሥራ አስፈፃሚ አቶ አደፍርስ ሆራ ቅድስት ቤተክርስቲያን የምታከናውነውን ሥራ አድንቀው በቀጣይም አብረው እንደሚሠሩ ቃል ገብተዋል ።
የደብሩ አስተዳዳሪ መልአከ ብሥራት መምህር አብርሃም ዲበኩሉ በበኩላቸው በተከናወነው የልማት ሥራ አስተዋጽኦ ላበረከቱት በሙሉ ምስጋና አቅርበዋል ።
ከምስጋናውም ባሻገር በወንዝ ማስቀየስ ሥራው ላይ በተለያየ መልኩ ለተሳተፋ ወገኖች የምስጋና ስጦታ እና የምሥክር ወረቀት ተበርክቷል።©Eotc tv

ግንቦት 18 ቀን 2018 ዓ.ም
የርክበ ካህናት የቅዱስ ሲኖዶስ ምልዓተ ጉባኤ ብፁዕ አቡነ ኤልሳዕ የሱማሌ ክልል ጅግጅጋ እና የምሥራቅ አርሲ አህጉረ ስብከት ሊቀ ጳጳስ ከዚህ በፊት በቅዱስ ሲኖዶስ በተወሰነው መሠረት ሀገረ ስብከቱን እንዲመሩ መድቧቸዋል።
በዚሁም መሠረት ብፁዕነታቸው በም0ሥራቅ አርሲ አሰላ ደብረ ምጽላል ቅድስት ድንግል ማርያም ቤተ ክርስቲያን ደማቅ አቀባበል ተደርጎላቸዋል ።
በአቀባበሉ ብፁዕ አቡነ ሳዊሮስ የጠቅላይ ቤተ ክህነት ዋና ሥራ አስኪያጅ ፣ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ ፣ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ ፣ የደቡብ ምስራቅ ትግራይና ራያ አህጉረ ስብከት ሊቀ ጳጳስ ብፁዓን አበው ሊቃነ ጳጳሳት ፣ የጠቅላይ ቤተ ክህነት የየመምሪያ እና የድርጅት ኃላፊዎች ፣ የመንግሥት የሥራ ኃላፊዎች ፣የሀገረ ስብከቱ የልዩ ልዩ የክፍል ኃላፊዎች ፣ የገዳማትና አድባራት አስተዳዳሪዎች ፣ ሊቃውንተ ቤተ ክርስቲያን አባ ገዳዎችና በጣም በርካታ ምዕመናን ተገኝተዋል።
ብፁዕነታቸውና ብፁዓን አበው ሊቀነ ጳጳሳት በቤተ ክርስቲያኑ ሲደርሱም ጸሎተ ወንጌልና ኪዳን ከተደረሰ በኋላ በቅዱስ ሲኖዶስ ውሳኔ መሠረት ለብፁዕነታቸው የተዘጋጀ ደብዳቤ በብፁዕ አቡነ ፊልጶስ የደቡብ ኦምና አሪ ዞኖች ሀገረ ስብከት ሊቀ ጳጳስ የቅድስት ሥላሴ ዩኒቨርስቲ ፕሬዚዳንት ከተነበበ በኋላ ሕዝበ ክርስቲያኑ በእልልታና በደስታ ብፁዕነታቸውን ተቀብሏል።
የደብሩ ሊቃውንተ ቤተ ክርስቲያንም የቅዱስ ያሬድ ዜማ ያቀረቡ ሲሆን በመቀጠልም ቅኔያት በሊቃውንተ ቤተ ክርስቲያን ቀርበዋል፡፡
የመታሰቢያ ስጦታዎችም ለብፁዕ ጠቅላይ ዋና ሥራ አስኪያጅ ፣ ለብፁዕ የቅዱስ ሲኖዶስ ዋና ጸሐፊ ፣ብፁዓን አበው ሊቃነ ጳጳሳት እንዲሁም ለብፁዕ አቡነ ኤልሳዕ ተሰጥተዋል።
በመቀጠልም ብፁዕ አቡነ ፊልጶስ የደቡብ ኦምና አሪ ዞኖች ሀገረ ስብከት ሊቀ ጳጳስ የቅድስት ሥላሴ ዩንቨርስቲ ፕሬዝዳንት የዕለቱን ትምህርተ ወንጌል ሰጥተዋል።
በመጨረሻም ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ ፣ የደቡብ ምሥራቅ የራያ አህጉረ ስብከት ሊቀ ጳጳስ አባታዊ መልእክት ያስተላለፉ ሲሆን ብፁዕ አቡነ ኤልሳዕ ሥራንና ሠራተኛን ማገናኘት የሚችሉና ጠንካራ አባት በመሆናቸው ቅዱስ ሲኖዶስ በሀገረ ስብከቱ የነበረውን ችግር በማየት ሀገረ ስብከቱን እንዲያሳድጉ መመደባቸውን ገልጸዋል።
ብፁዕነታቸው አክለውም በእምነታችን ከጸናን ሁሉም ስለሚያልፍ መጸለይ አለብን ፣ ቤተ ክርስቲያናችንን መጠበቅ አለበን በማለት አባታዊ መልእክት አስተላልፈዋል።
በመጨረሻም ብፁዕ አቡነ ሳዊሮስ የጠቅላይ ቤተ ክህነት ዋና ሥራ አስኪያጅ ፣ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ ቃለ ምዕዳንና አባታዊ ቡራኬ የሰጡ ሲሆን ሀገረ ስብከቱ እንደ ቀደምትነቱ ብዙ ያልተሠራበት በመሆኑ፣ ብፁዕ አቡነ ኤልሳዕ እንደሚሰሩ ያላቸውን ተስፋ ገልጸዋል።
ሕዝቡ በቋንቋው መማር እንዳለበትና ሀገሩ እንዲለማ አባታዊ መልእክታቸውን አስተላልፈዋል።
ብፁዕነታቸው አክለውም ብፁዕ አቡነ ኤልሳዕ ከታች ጀምሮ የተሰጣቸውን ሥራ ሁሉ በመሥራት የሚታወቁ በመሆናቸው አብሮ መሥራት ያሰጥተዋል።
በብፁዕነታቸው አባታዊ ቡራኬና ጸሎት መርሐ ግብሩ የተጠናቀቀ ሲሆን ለመንበረ ጵጵስናው ለሚሠራ ሕንጻ ፣ በጥምቀተ ባህር ግቢ ውስጥ G+6 ሁለ ገብ የሕንጻ የገበያ ማዕከል እንዲሁም ለተለያዩ የልማት ሥራዎች በብፁዕ ጠቅላይ ዋና ሥራ አስኪያጅና በብፁዕ የቅዱስ ሲኖዶስ ዋና ጸሐፊ መሠረተ ድንጋይ ተቀምጠዋል ።
በተጨማሪም የምሥራቅ አርሲ ሀገረ ስብከት የአገልግሎት ጥራትን ለማሳደግና የፋይናንስ አቅም ለማጠናከር ታስቦ የተገነባ ሁለገብ ሕንጻ በብፁዓን አበው ሊቃነ ጳጳሳተ ቡራኬ ተመርቋል።

ግንቦት 16 ቀን 2018 ዓ.ም
ግንቦት 15 ቀን 2017 ዓ.ም በብፁዕ ወቅዱስ አቡነ ማትያስ ቀማዳዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኲስም ወዕጨጌ ዘመንበረ ተክለሃይማኖት ቡራኬ ተባርኮ የተመረቀው የአዳማ ደብረ ገነት ቅድስት ኪዳነ ምህረት ካቴድራል አንደኛ ዓመት የቅዳሴ ቤቷ ክብረ በዓል በዛሬዋ ዕለት፤
ብፁዕ አባታችን አቡነ ጎርጎርዮስ የምሥራቅ ሸዋ ሀገረ ስብከት ሊቀ ጳጳስ፣ የዝዋይ ሐመረ ብርሃን ቅዱስ ገብርኤል ገዳምና ሥራ አመራር መንፈሳዊ ኮሌጅ የበላይ ኃላፊ፣ የቅዱስ ሲኖዶስ ቋሚ አባልና የኢትዮጵያ ሃይማኖቶች ተቋማት የሥራ አስፈጻሚ ቦርድ ሰብሳቢ በተገኙበት ተከብሯል።
በክብረ በዓሉም ላይም መልአከ ሣህል ቀሲስ ነጋሽ ሀብተ ወልድ የሀገረ ስብከቱ ዋና ሥራ አስኪያጅ ፣የሀገረ ስብከቱ የየመምሪያው ክፍል ኃላፊዎች ፣ የገዳማት አድባራት አስተዳደሪዎች ሊቃውንተ ቤተ ክርስቲያን ካህናት ወዲያቆናት መምህራነ ወንጌል ፣ የሰንበት ት/ቤት ዘማርያን ማኅበራት: አባ ገዳዎችና አደ ስንቄዎች በርካታ ኦርቶዶክሳውያን ተገኝተዋል። ©ሐመረ ተዋሕዶ ሚዲያ