የማዕከላዊ ጎንደር ሀገረ ስብከት ፵፪ኛውን አጠቃላይ የሰበካ መንፈሳዊ ጉባኤውን አካሔደ።የሰበካ አጠቃላይ መንፈሳዊ ጉባዔው ከመካሔዱ አንድ ቀን ቀደም ብሎም በሀገረ ስብከቱ መሰብሰቢያ አዳራሽ ታላቅ ጉባኤ መካሔዱን ከሀገረ ስብከቱ የደረሰን ዘገባ ያመለክታል።

ኅዳር ፲፰ ቀን ፳፻ ፲ወ፮ ዓ.ም
=================
አዲስ አበባ -ኢትዮጵያ
“””””””””””””””””””””

የኢትዮጵያ ኦርቶዶክስ ተዋሕዶ ቤተክርስቲያን አስተዳደር ጉባኤ ከአዲስ አበባ ሀገረ ስብከት የአስተዳደር ጉባኤ አባላት ጋር በሁለትዮሽ የአሰራር ሒደት፣በመልካም አስተዳደር፣በሕግ ፣ደንቦችና መመሪያዎች አከባበር በአጠቃላይ ሥራዎችን በተቋማዊ አሰራር ሒደት በማከናወን ዙሪያ የጋራ መድረክ ተዘጋጅቶ ውይይት እንዲደረግ የኢትዮጵያ ኦርቶዶክስ ተዋሕዶ ቤተክርስቲያን ጠቅላይ ቤተክህነት አስተዳደር ጉባኤ ያስተላለፈውን ውሳኔ ተከትሎ ዛሬ ኅዳር ፲፰ቀን ፳፻ ፲ወ፮ ዓ.ም በጽርሐ ተዋሕዶ አዳራሽ የጋራ ጉባኤ በማካሔድ ላይ ናቸው።

በጉባኤው መክፈቻ ሥነሥርዓት ላይ የተገኙት ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ባስተላለፉት አባታዊ መልዕክት፣ቃለ በረከትና ቡራኬ በቤተክርስቲያናችን ያለውን የመልካም አስተዳደር ችግር ሁላችንም እናውቀዋለን።ማስተካከልም እንችላለን ብለዋል።

እኛ በቤተክርስቲያናችን የሚስተዋለውን ችግር ለማስተካከል የምንቸገረው ልባችን ስላልተስተካከለ ነው።ያሉት ቅዱስ ፓትርያርኩ ራሳችንን ሳናስተካክል ሌላውን ማስተካከል ስለማንችል ቅድሚያ ራሳችንን ለማስተካከል ቆርጠን መነሳት ይኖርብናል ብለዋል።

አያይዘውም ሁላችንም የቆምነው ለቤተክርስቲያናችን እንጂ ለሌላ ዓላማ አይደለም።ያሉት ቅዱስነታቸው ችግሮቻችንን ለመፍታት መወያየት ተገቢ ነው።”ከልብ ካለቀሱ እንባ አይገድም” እንደሚባለው ሁሉ ችግሮቻችንን ለመፍታት ከልብ ከተነሳን የሚያስቸግር ነገር ይኖራል ብለን እናምናለን ካሉ በኋላ ከተጠያቂነትና ከተወቃሽነት ለመዳን፣ቤታችንን ለማቅናትና ለማስተካከል የሚጎለን ምንድነው ?ያሉት ቅዱስነታቸው ይህን ለማድረግና ቤተክርስቲያናችንን ለመጠበቅ ሙሉ ሥልጣንና ኃላፊነት እያለን መቸገራችን ያስገርማል ብለዋል።

ዘወትር ሁላችንም ራሳችንን መመርመር አለብን የት ነው ያለነው፣ምንድነው የምንሰራው፣ወዴት ነው የምንሔደው ብለን ራሳችንን በመጠየቅ ያለፈውን ጊዜ ችግሮች ማሰብና በተሰጠን መንፈሳዊ ኃላፊነት ልክ በመስራት ቤተክርስቲያንን መጠበቅና ምዕመናንን የሚያረካ ተግባር መፈጸም ይኖርብናል ያሉት ቅዱስነታቸው ሁላችንም ራሳችንን በአግባቡ በመመርመር ራሳችንን እናስተካክል ካሉ በኃላ በአንድነትና በጽናት ለቤተክርስቲያናችን እንቁም።በመመካከር አንድ ሆነን በመቆም ለቤተክርስቲያን ህልውና በጋራ እንስራ እኛ ተመካሪዎች አይደለንም መካሪዎች እንጂ ስለዚህ መመካከር ችግሮችን ለመቅረፍ የሚጠቅም ስለሆነ ተመካክረን እንስራ ችግሮችንም በግልጽ በማውጣት ለችግሮቻችን መፍትሔ በማበጀት ለውጤት ልናበቃው ይገባል በማለት አባታዊ መልእክታቸውን በማጠናቀቅ ጉባኤውን በይፋ ከፍተዋል።

ብፁዕ አቡነ አብርሃም የጠቅላይ ቤተክህነት ዋና ሥራ አስኪያጅና የባህርዳር ሀገረ ስብከት ሊቀ ጳጳስ በበኩላቸው ባስተላለፉት መልዕክት፦ መልካም አስተዳደርን ለማምጣትና ችግሮችን ለመፍታት ውይይት ወሳኝ ነው።ቅዱስነትዎም በቤተክርስቲያናችን መልካም አስተዳደር እንዲሰፍን የዘወትር ምኞትዎና ጸሎትዎ እንደሆነ ይታወቃል።

በዚህ ጊዜ የሚታየውን የመልካም አስተዳደር ችግሮችን በጋራ ተወያይተን መፍታትና የቁጥጥር ሥርዓታችንን በማጥበቅ ችግሮችን በአግባቡ መፍታት አለብን ብለዋል አያይዘውም ህገወጥ ቅጥርና ዝውውርን በተመለከተ እየተከናወነ የሚገኘውን ህገ ወጥ ቅጥርና ዝውውር በማረም በቅዱስ ሲኖዶስ ጸድቆ በቀረበው መተዳደሪያ ደንብ መሰረት መስራት ይኖርበታል ብለዋል።

ሀገረ ስብከቱና ጠቅላይ ቤተክህነቱ ተናበውና ተግባብተው መስራት በሚገባቸው ጉዳዩች ላይም ሕግንና ሕግን መሰረት አድርገን መስራት ስለሚገባቸው ይህን መድረክ ለማዘጋጀት ተገደናል ያሉት ብፁዕነታቸው የዚህ መድረክ ዓላማ ለመወነጃጀል ለመነቃቀፍና ለመተቻቸት ሳይሆን በመወያየትና በመግባባት በሀገረ ስብከቱ የሚታዩትን ችግሮች ለመፍታት ነው በማለት የመክፈቻ ንግግራቸውን አጠቃለዋል።

ጉባኤው በዛሬው እለት በሚያካሒደው ጥልቅ ውይይት ሕግ፣መመሪያ፣ደንቦችና ተቋማዊ አሰራሮችን በጠበቀ መልኩ ሥራዎችን በማከናወን ማዕከላዊነትን ባለማክበር ዙሪያ የሚታዩ ክፍተቶችን በመሙላት ተቋማዊና ሕጋዊ አሰራሮችን በመተግበር በሀገረ ስብከቱና በጠቅላይ ቤተክህነት መካከል መዋቅራዊ ግንኙነቶችን ማጠናከር የሚያስችሉ ልዩልዩ ውሳኔዎችን ያስተላልፋል ተብሎ ይጠበቃል።

“ሰላምየ አኀድግ ለክሙ ወሰላመ አቡየ እሁበክሙ፡- ሰላሜን እተውላችኋለሁ፥ የአባቴ ሰላምም እሰጣችኋለሁ” (ዮሐ.14፡27)

ሀ/ስብከቱ የአሠሪ ኮሚቴውና የካቴዴራሉ ሰበካ ጉባኤ ያቀረበውን ጥያቄ መሠረት በማድረግ ከመንበረ ጵጵስና ገዳማትና አድባራት አስተዳዳሪዎችና የሰበካ ጉባኤ አባላት ጋር ውይይት አድርጓል።

ውይይቱን የመሩት የሀገረስብከቱ ዋና ሥራ አስኪያጅ መልአከ ፀሐይ ቆሞስ አባ ዘካርያስ ፀጋ እንደገለጹት የህንፃ ግንባታውን ምርቃት በተመለከተ የካቴዴራሉ ሰበካ ጉባኤ እና የሀ/ስብከቱ ጽ/ቤት ኃላፊነት ወስደው ዐብይ ኮሚቴ በማቋቋም ወደ ሥራ እንደሚገባ ገልጸው የመንበረ ጵጵስ ገዳማትና አድባራትን በመያዝ ካህናትን ሰብስቦ ግንዛቤ መፍጠር እንደሚገባ ገልጸው ግንዛቤ

የተፈጠረላቸውን ካህናት በማሠማራት የማጠናቀቂያ የገቢ ማሰባሰብ ሥራ በመሥራት እስከ መጋቢት 27 ቀን 2016 ዓ/ም ሥራው ተጠናቆ በዘመነ ትንሣኤ ለማስመረቅ ቅድመ ዝግጅት ማድረግ እንደሚገባ አሳስበዋል።

የሀገረስብከቱ ዋና ፀሐፊ ሊቀልሳናት ትህትና አበበ በበኩላቸው የመንበረ ጵጵስና ገዳማትና አድባራት አጥቢያ አቢያተክርስቲያናት የሰበካ ጉባኤ ካህናትና ምዕመናን በህንፃ ግንባታው ማስፈጸሚያ የገቢ አሰባሰብ ንቅናቄ ሥራ ላይ የነቃ ተሳትፎ ማድረግ እንደሚገባቸው ተናግረው ይህም የቤተክርስቲያን አንድነት መገለጫ ነው ብለዋል። ምንግዜም ቢሆን የቤተክርስቲያን አንድነት በሥራ መገለጽ እንዳለበት በሰፊው ያብራሩት ዋና ፀሐፊው በየደረጃው ያለን የቤተክርስቲያን አገልጋዮች ፍቅርን እና አንድነትን በመያዝ የትብብርን መንፈስ ማዳበር አለብን ብለዋል።

የአሶሳ እንዚ መካነ ገነት መድኃኔአለም ካቴዴራል ዋና አስተዳዳሪ ሊቀ-አዕላፍ አባ ገ/መስቀል ምንዳ እንደተናገሩት አሁን ሥራውን አጠናቆ ለማስመረቅ አራት ሚልዮን ብር እንደ ሚያስፈልግ ገልጸው ብሩን ለማሰባሰብ የመንበረ ጵጵስና ገዳማትና አድባራት የሚችሉትን ተከፋፍለው ቃል እንዲገቡ ካህናት ግንባር ቀደም ተሳታፊዎች እንዲሆኑ ለማስቻል በሀ/ስብከቱ በኩል ጥሪ ተደርጎ ምክክር ማድረግ አስፈላጊ ሆኖ መገኘቱን አስታውሰዋል።

የህንፃ ግንባታ ኮሚቴው ዋና ሰብሳቢ አቶ ይሁን ጉዴታ እንደገለጹት ምዕመናን በዓይነት ድጋፍ እንዲያደርጉ በመድኃኔዓለም ስም ጠይቀው የሙሌት ሥራ ለመሥራት አሥር ቢያጆ ሀርድ ኮር ድንጋይ”፤ አምስት ቢያጆ አሸዋ፤ ሁለት መቶ ሃምሳ ኩንታል ስሚንቶ፤ የኳርቲዝ ቀለም በዋናነት እንደሚያስፈልግ ተናግረዋል።

የመንበረ ጵጵስና ገዳማትና አድባራት አጥቢያ አቢያተክርስቲያናት አስተዳዳሪዎችና የሰበካ ጉባኤ አባላትም የሚችሉትን ሁሉ ዴጋፍ ለማድረግ ቃል ገብተዋል።

በቅርቡም የገቢ ማሰባሰብ ንቅናቄውን ለመጀመር ከካህናትና ከዲያቆናት ጋር ምክክር እንደሚደረግ ውሳኔ ላይ ተደርሷል።

ዘገባው የኢትዮጵያ ኦርቶዶክስ ተዋሕዶ ቤተክርስቲያን የቤኒሻንጉል ጉሙዝ ክልል አሶሳ ሀገረ ስብከት ህዝብ ግንኙነት ክፍል ነው።
ኅዳር 08 ቀን 2016 ዓ/ም
አሶሳ፤