የኢትዮጵያ ኦርቶዶክስ ተዋሕዶ ቤተ ክርስቲያን ከፍተኛ የሥራ ኃላፊዎችና ምዕመናን በተገኙበት፣ በአዲስ አበባ አሮጌ ቄራ አካባቢ የተገነባው ዘመናዊ ሁለገብ ሕንጻ በዛሬው ዕለት በደመቀ ሁኔታ ተመርቋል። ይህ በ480 ካሬ ሜትር ቦታ ላይ ያረፈውና ባለ 11 ወለል (B+G+10) የሆነው ሕንጻ፣ ግንባታው የተጀመረው በብፁዕ አቡነ ዲዮስቆሮስ ጠቅላይ ሥራ አስኪያጅነት ዘመነ ሢመት ነበር። ሆኖም ግንባታው በአራት የተለያዩ ኮንትራክተሮች እጅ በማለፉ ምክንያት ከፍተኛ መጓተት አጋጥሞት ቆይቷል።
​ይህንን መጓተት ለመቅረፍ ብፁዕ አቡነ ሳዊሮስ የመንበረ ፓትርያርክ ጠቅላላ ቤተ ክህነት ዋና ሥራ አስኪያጅ ሆነው ከተሾሙ በኋላ፣ የአሠራር ሥርዓቱን በማስተካከልና ለሮሃ ኮንስትራክሽን ሙሉ ኃላፊነት በመስጠት፣ ግንባታው በአጭር ጊዜ ውስጥ ማለትም በ40 ቀናት አካባቢ ተጠናቆ ዛሬ ግንቦት 6 ቀን 2018 ዓ.ም ለምረቃ እንዲበቃ ሆኗል።
​በምረቃ መርሐ ግብሩ ላይ ብፁዕ ወቅዱስ አባ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ፣ ብፁዕ አቡነ ሳዊሮስ የመንበረ ፓትርያርክ ጠቅላላ ቤተ ክህነት ዋና ሥራ አስኪያጅ፣ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ፣ ብፁዓን ሊቃነ ጳጳሳት እንዲሁም የቤተ ክርስቲያኒቱ የመምሪያና የድርጅት ኃላፊዎች ተገኝተዋል።
​የሕንጻውን ዝርዝር ሁኔታ በሚመለከት የግንባታ አማካሪው ኢንጂነር ቀሲስ ደመቀ አሸናፊ እንዳብራሩት፣ ሕንጻው ለእያንዳንዱ ቤተሰብ ምቹ የሆኑ ባለ ሦስት መኝታ ቤቶችን የያዘ ሲሆን፣ በውስጡም ዘመናዊ መጸዳጃ ቤቶችና ባልኮኒዎች ተካተውለታል። በተጨማሪም ሕንጻው የሚከተሉትን ዘመናዊ የደኅንነት ሥርዓቶች ያካተተ ነው፦
​ሙሉ ሕንጻውን የሚቆጣጠር የሴርቨላንስ ካሜራ ተገጥሞለታል።
​ሙቀትና ጭስን ለይቶ የሚያውቅና አደጋ ሲከሰት አላርም የሚያደርግ የፋየር ሲስተም ኮንትሮል አለው።
​በእያንዳንዱ ወለል ላይ የእሳት አደጋ መከላከያ (ፋየር ሃይድራንት) እና የአደጋ ጊዜ መውጫ (ኢመርጀንሲ ኢግዚት) ተዘጋጅቶለታል።
​ይህ ታላቅ የምረቃ ሥነ ሥርዓት በብፁዕ ወቅዱስ ፓትርያርኩ ጸሎትና ቡራኬ ተጠናቋል።

ግንቦት 5 ቀን 2018 ዓ.ም
የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ፣ ለስድስት ተከታታይ ቀናት ሲያካሂድ የቆየውን መደበኛ የምልኣተ ጉባኤ ስብሰባውን በ22 አጀንዳዎች ላይ በመወያየትና ለቤተክርስቲያናችን ቀጣይ ጉዞ ወሳኝ የሆኑ ውሳኔዎችን በማሳለፍ ማጠናቀቁን የቅዱስ ሲኖዶስ የኮሙኒኬሽን ጉዳዮች ኃላፊ፣ ረዳት ፕሮፌሰር ቀሲስ ዳንኤል ሰይፈ-ሚካኤል ለEOTCTV በሰጡት ዕለታዊ መግለጫ አስታውዋል።
ኃላፊው በሰጡት ማብራርያ፣ ጉባኤው በተለይም በመንበረ ፓትርያርክ ጠቅላይ ጽሕፈት ቤት እየተከናወኑ ያሉትን የልማት፣ የዘመናዊ አሠራር እና የቴክኖሎጂ ሽግግር ሥራዎች በዝርዝር ከገመገመ በኋላ ከፍተኛ አድናቆቱን መግለጹን ተናግረዋል።
በጠቅላይ ቤተ ክህነት ዋና ሥራ አስኪያጅና የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ በሆኑት በብፁዕ አቡነ ሳዊሮስ አመራር እየተከናወኑ ያሉ ተግባራት በምስል እና ድምፅ የተደገፈ ሰፊ ሪፖርት ለምልአተ ጉባኤው መቅረቡን የጠቀሱት ረዳት ፕሮፌሰር ቀሲስ ዳንኤል፣ ሪፖርቱ “ቤተክርስቲያናችን ለዘመናት ያላትን ታሪካዊ አስተዋጽኦ እያስጠበቀች፣ ከዘመኑ ጋር የሚራመድ አሠራርን ለመገንባት እየተደረገ ያለውን ርብርብ በጉልህ አሳይቷል” ሲሉ ገልጸዋል።
በሪፖርቱ ከቀረቡት ዋና ዋና ጉዳዮች መካከል በመንበረ ፓትርያርክ ግቢ እና “በኮሪደር ልማት” በተገኙ መሬቶች ላይ የተጀመሩ የግንባታ ፕሮጀክቶች እንዲሁም ግቢውን የማስዋብና ምቹ የማድረግ ሥራዎች እንደሚገኙበት የገለጹ ሲሆን ረዳት ፕሮፌሰር ቀሲስ ዳንኤል እንዳብራሩት፣ “ምልአተ ጉባኤው በአጭር ጊዜ ውስጥ የተገኙትን እነዚህን ተጨባጭ ውጤቶች በማየት ሥራዎቹን በከፍተኛ አድናቆት ምልዓተ ጉባኤው ተቀብሏቸዋል።” ብለዋል።
ከዚህም በተጨማሪ፣ ለዘመናት ተቀምጠው የነበሩ ታሪካዊ የሰነድ መዛግብትን በዲጂታል ቴክኖሎጂ የማስቀመጥ ሥራ መጀመሩና
አስተዳደራዊ መዋቅሩን በማዘመን የአገልግሎት አሰጣጥን ቀልጣፋ ለማድረግ እየተሠራ መሆኑ ተብራርቷል።
ለረጅም ጊዜ በመጋዘን የቆዩ ቅዱሳት መጻሕፍትን በማሳተም ለምዕመናን ተደራሽ የማድረግ ሥራም በስፋት መከናወኑን ኃላፊው አክለው ገልጸዋል።
ብፁዓን አባቶች በቀረበው ሪፖርት ላይ ሰፊ ውይይት ካደረጉ በኋላ፣ “የተጀመሩት ስራዎች የቤተክርስቲያኒቱን ክብርና ልዕልና
የሚያስጠብቁ፣ ተቋማዊ ህልውናዋን የሚያጠናክሩና ለምዕመናን የሚሰጠውን አገልግሎት የሚያዘምኑ ናቸው” በማለት ሙሉ ድጋፋቸውን መግለጻቸውን ረዳት ፕሮፌሰር ቀሲስ ዳንኤል አስረድተዋል።
በዚህም መሠረት ምልኣተ ጉባኤው የተጀመሩት የልማትና የማዘመን ሥራዎች ተጠናክረው እንዲቀጥሉ ከመወሰኑም በላይ፣ ሌሎች አባቶችም በየአህጉረ ስብከታቸው ተመሳሳይ ማሻሻያዎችን እንዲተገብሩ ጥሪ ማቅረቡን ገልጸዋል።
ጉባኤው ብፁዕ አቡነ ሳዊሮስ የጀመሩትን ሥራ አጠናክረው እንዲቀጥሉ ሙሉ ድጋፍ እንደሚሰጥም አረጋግጧል ተብለዋል ።
ጉባኤው በሌሎች አስተዳደራዊ ጉዳዮች ላይ ከመከረ በኋላም፣ በቀጣዮቹ ስድስት ወራት በቋሚ ሲኖዶስ ውስጥ የሚያገለግሉ ብፁዓን አባቶችን ምርጫ ማካሄዱን የኮሙኒኬሽን ኃላፊው ተናግረዋል።
በመጨረሻም፣ “ለቀናት በተለያዩ አገራዊና ሃይማኖታዊ አጀንዳዎች ላይ ሲመክር የቆየው የቅዱስ ሲኖዶሱ ምልኣተ ጉባኤ፣ በነገው
ዕለት በብፁዕ ወቅዱስ አቡነ ማትያስ ቀዳማዊ፣ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለሃይማኖት በሚሰጡት ቃለ ምዕዳንና አባታዊ ቡራኬ በይፋ ይጠናቀቃል” ሲሉ ረዳት ፕሮፌሰር ቀሲስ ዳንኤል ሰይፈ-ሚካኤል ማብራርያቸውን አጠቃለዋል።©EOTc tv

ክፍል አንድ
አምና በዚህ ወቅት የኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ ምልዓተ ጉባኤ የግንቦቱን ርክበ ካህናት ጉባኤውን በሚያካሒድበት ወቅት አንዱ አጀንዳ አድርጎ የያዘው የጠቅላይ ሥራ አስኪያጅና የቅዱስ ሲኖዶስ ዋና ጸሐፊ ምርጫን ነበር።
በምርጫውም ብፁዕ አቡነ ሳዊሮስ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስን የጠቅላይ ቤተክህነት ዋና ሥራ አስኪያጅ፣ብፁዕ አቡነ ዲዮስቆሮስ የራያ ሀገረ ስብከት ሊቀ ጳጳስን የቅዱስ ሲኖዶስ ዋና ጸሐፊ በማድረግ በከፍተኛ ድምጽ መርጦ ሾማቸው።
ወዲያውኑም ሁለቱ ብፁዓን አባቶች ከብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት አባታዊ ቡራኬና መመሪያን በመቀበል፣አስፈላጊና ውሳኔ የሚሹ ሥራዎችን በቋሚ ሲኖዶስ በማስወሰንና ውሳኔዎችን በጽኑ በማስፈጸም ሥራዎቻቸውን በውጤታማነት ለማከናወን ጥረት ማድረግ ሲጀምሩ አንድነታቸውንና ወንድማማችነታቸውን በአስተማማኝ ሁኔታ ማጽናት መሰረታዊ ጉዳይ መሆኑን በማመን ተናበውና ተመካክረው ዘመነ ሢመታቸውን በስኬት ለመፈጸም ቆርጠው ተነሱ።
ይህንንም ለማድረግ በዕቅድ ላይ የተመሠረተ የትኩረት አቅጣጫን ነድፈው ዕቅዳቸውን ለማሳካት የሚያስችል የሥራ ኃላፋዎች ዝውውርና ምደባን በማድረግ የሚከተሉትን ጉዳዮች ለማሳካት በሙሉ ኃላፊነት ወደ ሥራ ሲገቡ መንፈሳዊ፣አስተዳደራዊና ልማታዊ የሥራ ዘርፎችን በውጤታማነት ለማከናወን የረጅም ጊዜ ልምዳቸው፣የመሪነት አቅማቸውና የማስፈጸም ብቃታቸውን በሚገባ ተጠቅመዋል።
በዚህም መሰረት ባሳለፍነው አንድ ዓመት ውስጥ በቤተክርስቲያናችን ታሪክ ታይቶና ተሰምቶ የማያውቅ ውጤት ማስመዝገብ ቻሉ።
በመሆኑም በብፁዕ አቡነ ሳዊሮስ የመንበረ ፓትርያርክ ጠቅላይ ቤተ ክህነት ዋና ሥራ አስኪያጅ ፣የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ አመራር ሰጪነትና ከፍተኛ ክትትል ከግንቦት እስከ ግንቦት ምን ውጤቶች ተመዘገቡ? የሚሉትን ጥያቄዎች ለመመለስ እንችል ዘንድ ጥቂቶቹን ለማሳያነት ያህል እንደሚከተለው እናቀርባለን ።
1.ኛ. ስብከተ ወንጌልን ለማስፋፋትና ለማጠናከር የሚያስችሉ በርካታ የውይይት መድረኮች ፣የሰባኪያነ ወንጌልን አቅም ሊገነቡ የሚችሉ ሥልጠናዎች፣የስብከተ ወንጌልና ሐዋርያዊ ተልዕኮ አገልግሎትን በማኅበራዊ ሚዲያ የማስፋፋት ሥራዎች ፣ለበርካታ ዓመታት ሳይሰበሰብ የቀረውን የስብከተ ወንጌል አገልግሎት አንድ ፐረሰንት ገቢን በአግባቡ በመሰብሰብም የመምሪያውን ገቢ የማሳደግና በበጀት እጥረት ምክንያት አገልግሎቱ እንቅፋት እንዳይገጥመው የማድረግ ሥራ፣ የስብከተ ወንጌል ስምሪትና የመምሪያውን ሥራ የበለጠ ለማጠናከር የሚያስችሉ ልዩልዩ ጥናቶችም ተደርገዋል።በመደረግም ላይ ይገኛሉ።
በሸገር ከተማና ደቡብ ምዕራብ ሸዋ አህጉገረ ስብከት ደረጃ በብፁዕነታቸው አመራር ሰጪነት የተቋቋመው ወጣትነት ለቤተክርስቲያን በተሰኘው ማኅበር አማካኝነትም ታላላቅ የስብከተ ወንጌል መርሐ ግብሮችም ተካሒደዋል።
በአጠቃላይ በስብከተ ወንጌል ዘርፍ የተከናወኑና በመከናወን ላይ የሚገኙ ስኬታማ ሥራዎች በዘርፉ ቤተክርስቲያን የበለጠ ውጤታማ ሥራን ማከናወን እንድትችል የሚያደርጋት ነው።
2.ኛ የኢትዮጵያ ኦርቶዶክስ ተዋሕዶ ቤተክርስቲያን የቤቶችና ሕንጻዎች አስተዳደርና ልማት ድርጅትን አሠራር ማዘመን ይቻል ዘንድ ብፁዕነታቸው የሰጡትን አመራር ተከትሎ ከፍተኛ ሥራ ተሠርቷል። በዚህም የገቢ አሰባሰብ ሥርዓቱ ዘመናዊና ዲጃታል እንዲደረግ፣ድርጅቱ የራሱ የሆነ ማኅበራዊ ሚዲያ እንዲኖረውና በድርጅቱ የሚሠሩ ሥራዎች ሁሉ በየጊዜውም ውጤታቸው ለሕዝብ ይፋ እንዲደረግ ተደርጓል፣የድርጅቱን ገቢ የሚጎዱና ግለሰቦችን የሚጠቅሙ የኪራይ አሰባሰብ ሥርዓቶችን በማስወገድ የቤተ ክርርቲያን ገቢ በአግባቡ የሚሰበሰብበት ሥርዓት ተፈጥሯል፣ በጎ አድራጊዎችን በማስተባበር የድርጅቱ ቢሮ በዘመናዊና የቤተክረስቲያናችንን ክብር በሚመጥን መልኩ እንዲታደስ ተደርጓል።በአጠቃላይ በድርጅቱ ውስጥ ከፍተኛ መነቃቃትና የሥራ ተነሳሽነት እንዲጎለብት፣አሠራሩ እንዲዘምንና ውጤታማ ተቋም እንዲሆን የማድረግ ሥራ በማከናወን ድርጅቱን ግንባር ቀደም የቤተክርስቲያናችን የልማት ተቋም ማድረግ ተችሏል።
3.ኛ እጅግ በጣም ለበርካታ ዓመታት ከዕቅድ፣ከፍላጎትና ከሥርጭት ጋር ሳይጣጣሙ በከፍተኛ ወጪ ታትመው የተከማቹ መጻሕፍቶችን የመለየት፣የማደራጀት፣የማሰባሰብና የማሰራጨት ሥራ መላውን የቤተክህነት ሠራተኛን በማሳተፍ እንዲከናወን በማድረግ መጻሕፍቶቹ በጨረታ ተሸጠው የቤተክርስቲያን ገቢ በአግባቡ እንዲሰበሰብ፣መጻሕፍቱም አገልግሎት ላይ እንዲውሉ የማድረግ ታሪካዊ ሥራ ተሰርቷል።
4.ኛ የኢትዮጵያ ኦርቶዶክስ ተዋሕዶ ቤተክርስቲያንን ታሪኮቿ፣ የቅዱስ ሲኖዶስ ውሳኔዎችን፣ልዩልዩ ሃብቶቿን፣የቤተ ክርስቲያናችንን ሁለንተናዊና ተቋማዊ ሕልውናን የሚመሰክሩ ማኅደሮች በተበታተነና ለአያያዝ ምቹ ባልሆኑ ሥፍራዎች ተከማችተው ለአደጋ ተጋልጠውና ለመጥፋት ተቃርበው የነበሩ ሲሆን እነዚህን ፋይሎች በሚገባ ተለይተው፣ተደራጅተውና በዘመናዊ መልኩ ወደ ዲጂታል ፋይል ተቀይረው ለታሪክና ለትውልድ እንዲተላለፉ እንዲደረግ በብፁዕ ጠቅላይ ሥራ አስኪያጁ የተሰጠውን መመሪያ ተከትሎ ፋይሎቹን ወደ ዲጂታል የመቀየሩ ሥራ እየተከናወነ ይገኛል። ቀደም ሲል የቤተክርስቲያናችንን አሠራር ወደ ዘመናዊና በICT የተደራጀ እንዲሆን ለማድረግ የተጀመረውን ሥራ ማስቀጠል እንዲቻልም ከፍተኛ ባለሙያዎችን የያዘ ኮሚቴ በማደራጀትም ትርጉም ያለው ሥራ እየተሠራ ይገኛል።
5.ኛ ለበርካታ ዓመታት ሳይጸዳ የኖረው ለእይታ የማይመቸውና የቤተክርስቲያንን ክብርና ልዕልናን የማይመጥነውን የመንበረ ፓትርያርክ ጠቅላይ ቤተክህነት ቅጽር ጊቢ በሚገባ ጸድቶ፣
አምሮና ተውቦ፣ለዕይታ የሚማርክ፣የቤተክርስቲያንን ክብር የሚመጥን፣የሥራ ተነሳሽነትን የሚፈጥር፣ቅጽረ ጊቢ እንዲሆን ተደርጓል። የቅጽረ ጊቢው ማማር እጅግ በጣም ከፍተኛ በሆነ ወጪ በመገንባት ላይ ለሚገኘው ዘመናዊው የመሰብሰቢያ አዳራሽ ተጨማሪ ውበትን ያጎናጸፈ ሲሆን የዘመናዊ አዳራሽ ግንባታው አፈጻጸምም እስከዛሬ ከነበረው እጅግ በተሻለ ሁኔታና ፍጥነት መከናወን በመቻሉ እነሆ የማጠቃለያ ሥራ ላይ ይገኛል። የግንባታ ሥራው ሙሉበሙሉ ተጠናቆ ሥራ በሚጀምርበት ወቅትም ታላላቅ የስብከተ ወንጌል መርሐ ግብሮችን በማከናወን የስብከተ ወንጌል እንቅስቃሴዎችን ከማስፋፋት ጎን ለጎን ሀገራችን
የምታከናውናቸውን ዓለም ዓቀፋዊ ስብሰባዎችን ጭምር በማስተናገድ የቤተክርስቲያን እና የሀገር ኩራት የሚሆን ተቋም በመሆን እንደሚያገለግል ይታመናል።
6.ኛ ብፁዕ አቡነ ሳዊሮስ የቅዱስ ሲኖዶስ ዋና ጸሐፊ፣ብፁዕ አቡነ ዲዮስቆሮስ ጠቅላይ ሥራ አስኪያጅ በነበሩ ጊዜ በተለምዶ አሮጌው ቄራ በመባል በሚታወቀው ቦታ ላይ በመሠራት ላይ የነበሩት ሁለት ግዙፋን ሁለገብ ሕንጻዎችም ትኩረት ሰጥቶ ለውጤት የሚያበቃቸው አጥተው ለበርካታ ዓመታት የቤተክርስቲያን ሀብት ሲባክንባቸው ከርመው በአሁኑ ወቅት ብፁዕ አቡነ ሳዊሮስ ጠቅላይ ሥራ አስኪያጅ፣ብፁዕ አቡነ ዲዮስቆሮስ የቅዱስ ሲኖዶስ ጸሐፊ በመሆን ዳግም ወደ አመራርነት ሲመጡ በልዩ ትኩረትና በፍጥነት እንዲሠሩ በመደረጋቸው እነሆ በአራት መቶ ሰማኒያ ካሬ ላይ ያረፈው ሕንጻ ግንባታ ተጠናቆ ብፁዕ ወቅዱስ ፓትርያርኩ፣ብፁዓን አበው ሊቃነ ጳጳሳት፣የመንግሥት ከፍተኛ የሥራ ኃላፊዎች በተገኙበት በዛሬው ዕለት በደማቅ ሥነሥርዓት ለምርቃት ሲበቃ በአንድ ሺህ ካሬ ሜትር ቦታ ላይ ያረፈው ሕንጻ ግንባታ ደግሞ የግንባታ ሥራው በመፋጠን ላይ ይገኛል። ይ ቀ ጥ ላ ል …
የኢትዮጵያ ኦርቶዶክስ ተዋሕዶ ቤተ ክርስቲያን
የሕዝብ ግንኙነት መምሪያ
ግንቦት ፳፻ ፲ወ፰ ዓ.ም
አዲስ አበባ-ኢትዮጵያ

ግንቦት ፪ቀን ፳፻፲፰ ዓ.ም አዳማ — በአዳማ ከተማ በውብ የኪነ-ሕንጻ ጥበብ የታነጸው የአዳማ ሰቀቀሎ ደብረ ገነት ቅዱስ በዓለ ወልድ ቤተ ክርስቲያን አዲሱ ሕንጻ ቤተ መቅደስ፣ ብፁዓን አበው ሊቃነ ጳጳሳት፣ የሀገረ ስብከት የሥራ ኃላፊዎችና በሺዎች የሚቆጠሩ ምእመናን በተገኙበት በዛሬው ዕለት ቅዳሴ ቤቱ በታላቅ መንፈሳዊ ድምቀት ተከብሯል።
ትላንት ግንቦት ፩ ቀን በብፁዕ አባታችን አቡነ ጎርጎርዮስ (የምሥራቅ ሸዋ ሀገረ ስብከት ሊቀ ጳጳስ፣ የዝዋይ ሐመረ ብርሃን ቅዱስ ገብርኤል ገዳምና ሥራ አመራር መንፈሳዊ ኮሌጅ የበላይ ኃላፊ፣ የቅዱስ ሲኖዶስ ቋሚ አባልና የኢትዮጵያ ሃይማኖቶች ተቋማት የሥራ አስፈጻሚ ቦርድ ሰብሳቢ) እንዲሁም በብፁዕ አቡነ ጢሞቲዎስ (የዳውሮ፣ ኮንታ እና የከንባታ ሀላባ ጠንባሮ አህጉረ ስብከት ሊቀ ጳጳስና የቅዱስ ሲኖዶስ ቋሚ አባል) ቡራኬ ተባርኮ የተመረቀው ይህ ቤተ መቅደስ በዛሬው ዕለት ቅዳሴ ቤቱ ተከብሯል።
በክብረ በዓሉ ላይ በመገኘት ቡራኬና ትምህርት የሰጡት ብፁዕ አቡነ ጢሞቴዎስ፣ ምእመናን የእግዚአብሔርን ቤት በመሥራታቸው ያለቸውን ደስታ ገልጸው የሚከተለውን መልእክት አስተላልፈዋል፦
“ዛሬ አሳንጻችሁ የወልደ እግዚአብሔርን ሥጋውን የምንበላበት፣ ደሙን የምንጠጣበት የእግዚአብሔርን ቤት ሠርታችኋል። በዚህ ቤተ መቅደስ እመቤታችንን ቅድስት ድንግል ማርያም ፣ ቅዱሳን መላእክትን፣ ጻድቃንና ሰማዕታትን እናገኝባቸዋለን። ይህ ሥፍራ ያዘነ የሚጽናናበት፣ የደከመ የሚበረታበት፣ ያጣ የሚያገኝበትና የተቸገረ ከችግሩ የሚላቀቅበት ዘላለማዊ ቤት ነው” ብለዋል።
ብፁዕነታቸው አክለውም፣ እግዚአብሔር ከምእመናን የሚፈልገው በዋናነት ራሳቸውን እንደሆነ ገልጸው፤ ምእመናን በንስሓ ሕይወት በመመላለስ ቅዱስ ሥጋውንና ክቡር ደሙን መቀበል እንዳለባቸው አሳስበዋል።
የሀገረ ስብከቱ ሊቀ ጳጳስ ብፁዕ አባታችን አቡነ ጎርጎርዮስ በበኩላቸው፣ በሀገረ ስብከታቸው እየተከናወኑ ያሉ የቤተ ክርስቲያን የልማት ሥራዎችን በማድነቅ ጥልቅ የሆነ የእንኳን አደረሳችሁ መልእክትና ቃለ ምዕዳን አስተላልፈዋል።
“ለሁሉም ነገር መሠረቱ ሕዝብ ነው። የኢትዮጵያ ሕዝበ ክርስቲያን በሰላም፣ በአንድነትና በመቻቻል ተሳስሮ የኖረ ድንቅ ሕዝብ ነው። ይህ ሕዝብ ቤተ ክርስቲያኑን ሠርቶ በማስፈጸም ረገድ ያለውን ጥንካሬ የምናደንቀው ቢሆንም፤ ከምንም በላይ ግን ይህንን ለዘመናት የቆየ ሰላሙን፣ አንድነቱንና መቻቻሉን ጠብቆ ማስቀጠል አለበት” ብለዋል።
አክለውም አዳማ ከተማ የፍቅርና የአንድነት ከተማ መሆኗን ጠቅሰው፣ ከልጅ እስከ አዋቂ በገንዘባቸውና በጉልበታቸው ለደከሙ ሁሉ “እንኳን ደስ አላችሁ” በማለት በአባታዊ ቡራኬና ቃለ ምዕዳን ሰጥተዋል።
በዕለቱ የሀገረ ስብከቱ የስብከተ ወንጌል ኃላፊ መጋቤ ሐዲስ ቆሞስ አባ ኃይለ ገብርኤል ተስፋ፣ በብፁዕነታቸው መልካም ፈቃድ “የማትፈርስ መቅደስ” በሚል ርዕስ ጥልቅ የሆነ የወንጌል ትምህርት አስተምረዋል። መርሐ ግብሩን ደግሞ የሀገረ ስብከቱ ዋና ሥራ አስኪያጅ መልአከ ሣሕል ቀሲስ ነጋሽ ሀብተ ወልድ በብቃት መርተውታል።
በመጨረሻም ሕንጻ ቤተ መቅደሱ ከጅምሩ እስከ ፍጻሜው እንዲደርስ በእውቀታቸው፣ በጉልበታቸውና በገንዘባቸው ከፍተኛ ድጋፍ ላደረጉ ምእመናንና ባለሙያዎች ዕውቅናና ምስጋና ተሰጥቷል።
የሐመረ ተዋሕዶ ሚዲያ ማጠቃለያ ዕይታ ፤ ይህ ውብ ሕንጻ ቤተ መቅደስ ከ108 ሚሊዮን ብር በላይ ወጪ ተደርጎበት ለፍጻሜ መብቃቱ፣ ከመንፈሳዊ ጥንካሬ ባለፈ የታላቅ አመራርና የተናበበ ሥራ ውጤት መሆኑን ነው።
​በተለይም የደብሩ አስተዳዳሪ መልአከ ገነት ቀሲስ ታፈሰ ተስፋዬ፣ ግንባታው ከመሠረት ድንጋይ ጀምሮ እዚህ ደረጃ ላይ እስኪደርስ ድረስ የነበራቸው ሚና የሚደነቅ ነው። አስተዳዳሪው ከዲቁና የክህነት ማዕረግ ጀምሮ በዚህ ደብር ውስጥ በማገልገልና አሁን ላይም በኃላፊነት በመምራት፣ የአዳማ ከተማን ምእመናን በአንድነት በማስተባበር ያሳዩት ቁርጠኝነት ለቤተ መቅደሱ ግንባታ መሳካት ዋነኛ ምሰሶ ሆኖ ተገኝቷል።
​ይህ ክስተት የሚያሳየው፣ አንጋፋ አባቶች ከሕዝበ ክርስቲያኑ ጋር በፍቅርና በትሕትና ሲሰለፉ፣ እንደዚህ ያሉ ታላላቅ የልማት ሥራዎችን በአጭር ጊዜ ውስጥ ማከናወን እንደሚቻል ነው። ሚዲያችን እንደተመለከተው፤ የአስተዳዳሪው የረጅም ዘመን አገልግሎትና ከምእመናን ጋር የገነቡት ጥንካሬ፣ ዛሬ ለታየው ታላቅ መንፈሳዊ ድልና ለቤተ ክርስቲያኒቱ ክብር መጎናጸፊያ ሆኗል። ይህም ለሌሎች አድባራትና ገዳማት አስተዳዳሪዎችም ትልቅ ትምህርትና አርአያ የሚሆን ተግባር መሆኑን ሐመረ ተዋሕዶ ሚዲያ ባደረገው ዳሰሳ አረጋግጧል።©ሐመረ ተዋሕዶ ሚዲያ

በስመ ኣብ ወወልድ ወመንፈስ ቅዱስ ኣሓዱ ኣምላክ ኣሜን!
ብፁዕ ኣቡነ ሳዊሮስ
የመንበረ ፓትርያርክ ጠቅላይ ቤተ ክህነት ዋና ስራ ኣስኪያጅ፤
ብፁዕ ኣቡነ ዲዮስቆሮስ
የቅዱስ ሲኖዶስ ዋና ጸሓፊ፤
ብፁዕ ኣቡነ ሕርያቆስ
የኣዲስ ኣበባ ሃገረ ስብከት ሊቀ ጳጳስ፣
ብፁዓን ኣበው ሊቃነ ጳጳሳት የቅዱስ ሲኖዶስ ኣባላት፣
በኣጠቃላይ በዚህ ዓመታዊ የቅዱስ ሲኖዶስ ምልኣተ ጉባኤ የተገኛችሁ በሙሉ፦
ማሕየዊት በምትሆን ሞቱ ሰማያውያንና ምድራውያንን ያስታረቀ፣ በቅድስት ትንሣኤውም የሙታንን ሕይወት በተስፋ ያለመለመ ጌታችን፣ ኣምላካችንና መድኃኒታችን ኢየሱስ ክርስቶስ፣ እንኳን ለዓመታዊው የረክበ ካህናት ቅዱስ ሲኖዶስ ምልኣተ ጉባኤ ኣደረሰን ኣደረሳችሁ!
“እስመ ተዋለጠ እግዚአብሔር ዓለመ በክርስቶስ ኣናኅስዮ ኃጢኣቶሙ ወኢነጺሮ ጌጋዮሙ፤ ወረሰየ ላዕሌነ ቃለ ሥምረቱ፤ ወወሃበነ መልእክተ ሣህሉ፡- እግዚአብሔር በክርስቶስ ሆኖ ዓለሙን ከራሱ ጋር ያስታርቅ ነበርና በደላቸውን ኣይቈጥርባቸውም ነበር፤ በእኛም የማስታረቅ ቃል ኣኖረ” (2ቆሮ. 5፥19)።
የእግዚአብሔርም ልጅ፣ የሰውም ልጅ የሆነው ጌታችን ኢየሱስ ክርስቶስ በዚህ ዓለም በሰብእነት ሲገለጽ ግልጽ የሆነ ዓላማና ግብ እንደነበረው ቅዱስ መጽሓፍ ይነግረናል፤ እሱም በሰማይም፣ በምድርም ያሉትን በሙሉ ማስታረቅ፣ ማገናኘትና ኣንድ ማድረግ ነበረ፤
ጌታችን ይህንን ሲያደርግ ሰማያውያኑንና ምድራውያኑን የለያየው ምክንያት በማስወገድ ነው፤ የመለያየቱ ምክንያት ክፉ ኅሊና ኣምጦ የወለደው በደልና እሱን ተከትሎ የተከሠተው ኃጢኣት ነበረ፤ በኃጢኣት ምክንያት የገባው ሞት ደግሞ የቅጣቱ ማሳያ ፍርድ ነበረ።
የመጀመሪያዎቹ ሰዎች በፈጸሙት ስሕተት መነሻነት ምድርንና ምድራውያንን ለከባድ ቅጣትና መርገም የዳረገው ይህ መለያየት ለሰማያውያኑም ተርፎኣል፤
ምክንያቱም መለያየቱ በእግዚአብሔርና በሰው፣ በመላእክትና በሰው፣ በሰውና በሰው፣ በነፍስና በሥጋ ጭምር የጥል ግድግዳን ገንብቶ እስከ ክርስቶስ ዕለተ ስቅለት መዝለቁን በቅዱስ መጽሓፍ የምናውቀው ስለሆነ ማለት ነው።
ብፁዓን ሊቃነ ጳጳሳት የቅዱስ ሲኖዶስ ኣባላት!
ቀዳማዊና ዘላለማዊ የሆነው ወልደ እግዚአብሔር ኢየሱስ ክርስቶስ ሰብእናችንን ተዋሕዶ በዚህ ዓለም የተገለጸው ሰማያውያንንና ምድራውያንን የለያየው የጥል ግድግዳን ለማፈራረስ ነው፤
ለመለያየት ምክንያት የሆነችውን ኃጢኣት በሰውነቱ በመቅጣት የሕግን ትእዛዝ ከፈጸመ በኋላ የዕርቁን ተግባር በወሳኝ መልኩ ኣከናውኖታል፤
በክርስቶስ ቤዛነት የሆነው ይህ ዕርቅ በእግዚአብሔር ዘንድ እጅግ የተወደደ ነበረና እሱ ራሱ በክርስቶስ ሆኖ ዓለሙን ከራሱ ጋር ኣስታረቀ፤
ለዚህም ነው ተበዳይ እሱ፣ ቤዛዊ መሥዋዕት ሆኖ የቀረበው እሱ፣ ኣስታራቂ እሱ፣ ታራቂ እሱ ሆኖ የምናገኘው፤ ለሱ የሚሳነው ነገር የለምና ለኛ ግር የሚል ቢመስልም ለሱ ቀላል ነበረ።
በዚህ የዕርቅ ተግባር ሰውና እግዚአብሔር፣ ሰውና መላእክት፣ ሰውና ሰው፣ ነፍስና ሥጋ ታርቀው በይፋ ተገናኙ፤ በኅብረትና በኣንድነትም መኖር ቻሉ፤ በቀኙ ለተሰቀለው ሽፍታ “ዛሬውኑ ከኔ ጋር በገነት ትኖራለህ” የሚለው ቃለ ምሕረትና “ኣባት ሆይ፥ ነፍሴን በእጅህ ኣደራ እሰጣለሁ” የሚለው ቃለ ኣማሕፅኖ የዕርቁ፣ የግንኙነቱና የኣንድነቱ ማሳያ ኣስረጅ ናቸው።
ስቅለተ ክርስቶስ ነፍሶቻችን ወደ ግዞት ቤት ሳይሆን ወደ ገነት እንዲገቡ፣ የሚቀበላቸውም ራሱ እግዚአብሔር እንዲሆን ያስቻለ ታላቅ መለኮታዊ ፍጻሜ ነው፤
እኛ “ክርስቶስ መድኃኒታችን ነው፤ ኣድኖናል” ብለን በልበ ሙሉነት የምንመሰክረው፣ እሱም “ሰላሜን ሰጠኋችሁ” ብሎ የሚያረጋጋን በመሰቀሉ ይህንን ውጤት ስላስገኘልን ነው።
ብፁዓን ሊቃነ ጳጳሳት የቅዱስ ሲኖዶስ ኣባላት!
የድኅነታችንና የሰላማችን መሠረት የሆኑትን የክርስቶስ ሞትና ትንሣኤ ለዓለም ማኅበረ ሰብ የማብሰርና የማሥረጽ ተግባር የቅድስት ቤተ ክርስቲያን ቍጥር ኣንድ ተልእኮ ነው፤
ነገረ ሞቱና ነገረ ትንሣኤው በኣስተውሎት፣ በጥልቀትና በተመሥጦ ስናስተምር በውስጡ የምናገኘው የዕርቅ፣ የሰላምና የኣንድነት ምስጢር ነው፤
እንደ እውነቱ ከሆነ እኛ የክርስቶስ መልእክተኞች እንደ ቃሉ ራሳችንን ክደን በሚጠበቀው መጠን ተልእኮኣችንን መወጣት ብንችል ኖሮ፣ ኣሁን በዓለማችን የተፈጠረው መለያየትና ግጭት ኣይኖርም ነበር፤
ችግሩን ሙሉ በሙሉ ማስቀረት ባንችልም በእጅጉ መቀነስና ዓቅሙን ማዳከም እንችል ነበር፤ ነገር ግን ተልእኮኣችንን በኣግባቡ ኣለመወጣት ኣንድ ነገር ሆኖ የዓለሙ መሳሪያ ሆነን መገኘታችን “በዕንቅርት ላይ…” ሆኖ ይስተዋላል።
ይሁንና ኣሁንም ሕዝቡን ወደ ኣንድነት፣ ወደ ፍቅር፣ ወደ ሰላም፣ ወደ ዘላቂ የጋራ ጥቅምና ወደ ፈሪሐ እግዚአብሔር ማምጣት የጉባኤያችን ዓቢይ ተግባር ሊሆን ይገባል፤ እነዚህ ካሉ የምናጣውም ሆነ የሚያመልጠን የለምና ነው፤
ሃገርን በኃላፊነት ተረክባችሁ በላዕላዊ፣ በማእከላዊና በታሕታዊ መዋቅር የምትገኙ፣ እንደዚሁም ኣማራጭ ሓሳብ ኣለን ብላችሁ የምትንቀሳቀሱ ልኂቃነ ሃገር ፣ ሁላችሁም እግዚአብሔርን ከሚያውቅ፣ ከሚያመልክና ከሚፈራ ሕዝብ የተገኛችሁ ናችሁና በልባችሁ እግዚአብሔርን ፍሩ፤ ድምፁንም ስሙ፤ የሱ ገንዘብ በሆኑ ፍጡራንም ኣትጨክኑ፤ ሰውን መያዝ የሚቻለው ኅሊናን በመርታት እንጂ በሌላ ኣይደለምና፣
የሕዝቡን ፍላጎትና የልብ ትርታ በሚገባ ኣዳምጡ፤ ሕዝቡ የሚፈልገው በኣንድነትና በእኩልነት መኖር፣ በሰላም ወጥቶ መግባት፣ ፍትሕን ማስፈን፣ ለኑሮው የሚበቃ ምጣኔ ሃብትን ማግኘት፣ የእምነት ነጻነትና እኩልነት መረጋገጥ የመሳሰሉት ናቸው።
ሕዝቡ እነዚህ ከተሟሉለት ተደመጠ ማለት ነው፤ ከተደመጠ ደግሞ እሱም በበኩሉ ያደምጣል፤ ይከተላልም፤
ስለሆነም ለሁሉም ልጆቻችንና ወገኖቻችን የምናስተላልፈው ወቅታዊ ጥሪ ሁሉንም ችግሮቻችን በሰላምና በሰላም ብቻ ለመፍታት ተባበሩ የሚል ነው፤ ከዚህ ውጭ የሚደረገው ኣማራጭ ሁሉ ለዘላቂ ሰላማችን ኣይበጅም እንላለን።
በመጨረሻም፦
በቀኖና ቤተ ክርስቲያን መሠረት ከበዓለ ትንሣኤ በኋላ በሃያ ኣምስተኛው ቀን የሚካሄደው ዓመታዊው የረክበ ካህናት ቅዱስ ሲኖዶስ ምልኣተ ጉባኤ በዛሬው ዕለት የተጀመረ መሆኑን ለሕዝበ ክርስቲያኑና ለመላው ኢትዮጵያውያን እናበስራለን!!!
እግዚአብሔር ጉባኤያችንን ይባርክ!
እግዚአብሔር ኢትዮጵያንና ሕዝቦቿን ይባርክ!
ወስብሓት ለእግዚአብሔር፤
አሜን!!!
አባ ማትያስ ቀዳማዊ ፓትርያርክ
ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘኣኵስም ወዕጨጌ ዘመንበረ
ተክለ ሃይማኖት፤
ሚያዝያ 28 ቀን 2018 ዓ.ም
ኣዲስ ኣበባ – ኢትዮጵያ