“ወይእዜሰ በክርስቶስ ተሐድሰ ኵሉ ወኃለፈ ዘትካት ወናሁ ኮነ ሐዲስ ኵሉ … ማንም በክርስቶስ ቢሆን አዲስ ፍጥረት ነው፤ አሮጌው ነገር አልፏል እነሆ ሁሉም አዲስ ሆኗል” (2.ቆሮ 5÷17)
❖ ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት፤
❖ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ፤
❖ ብፁዕ አቡነ ሕርያቆስ የአዲስ አበባ፣ የሐዲያና ስልጤ አህጉረ ስብከት ሊቀ ጳጳስ
❖ ብፁዓን አበው ሊቃነ ጳጳሳት
ክቡር ንቡረ ዕድ ኤልያስ አብርሃ በመንበረ ፓትርያርክ ጠ/ቤ/ክ የመንፈሳዊ ዘርፍ ምክትል ዋና ሥራ አስኪያጅ፤
ክቡር ረዳት ፕሮፌሰር ግርማ ባቱ በመንበረ ፓትርያርክ ጠ/ቤ/ክ የማኅበራዊና ኢኮኖሚያዊ ዘርፍ ምክትል ዋና ሥራ አስኪያጅ፤
ክቡራን የመንበረ ፓትርያርክ ጠ/ቤ/ክ የየመምሪያውና የየድርጅቱ ኃላፊዎች፤
ክቡራን የመንበረ ፓትርያርክ ጠ/ቤ/ክ ሠራተኞች፤
ክቡራንና ክቡራት በዚህ መንፈሳዊ መርሐ ግብር የተገኛችሁ በሙሉ
በአምላካዊ ሥልጣኑ ሞትን ድል አድርጎ፣ ብርሃንን ተጎናጽፎ፣ ከሙታን የተነሣው፣ ሕያው እግዚአብሔር ቅዱስነታቸውን በሕይወት ጠብቆ አሮጌው ነገር አልፎ የአዲስ ሕይወት ኑሮ ለተጀመረበት በዓለ ትንሣኤ እንኳን አደረሰዎ በማለት ለቅዱስነትዎ ያለኝን ክብር በመላው የኢትዮጵያ ኦርቶዶክስ ተዋሕዶ ቤተ ክርስቲያን ሠራተኞች ስም ስገልጽ ምሉዕና ፍጹም በሆነ ደስታ ነው። (1.ቆሮ 15÷54)
የአዲስ ፍጥረት ምሥጢር ሰው ትንሣኤ ልቡና አግኝቶ በኢየሱስ ክርስቶስ ሲያምን የሚኖረውን አዲስ ሕይወትና ከአሮጌው ማንነቱ መለየቱን የሚያረጋግጥ ጥልቅ የሆነ ትርጉም ያለው በመሆኑ ትንሣኤውን እንደ ኃላፊ ኩነት ብቻ አስበን የምናልፈው አይደለም።
የክፋት ሁሉ ምንጭ የሆነው ዲያብሎስ በመሻሩ የሰው ልጅ ውጫዊ የሕይወት ለውጥን ብቻ ሳይሆን ፍጹም የሆነ ውስጣዊ ለውጥን ስላገኘ ትንሣኤው በዕለት ተዕለት የክርስትና ሕይወት ውስጥ ሁል ጊዜ የሚገለጥ አሁናዊ ጉዳይ ነው።
ከሞት በኋላ በሚቀጥል ሕይወት፣ አዲስ ፍጥረት ሆነን ለነፍሳችን ድኅነት ያገኘንበት የክርስቶስ ትንሣኤ በድካም ጊዜ ብርታት፣ በፈተና ጊዜ ሕያው ተስፋ፣ በጭንቀት ጊዜ ሰላም ከመሆኑም በላይ ክርስቶስ እኛን የወደደበት የታላቅ ፍቅሩ መገለጫ ነው።
በመሆኑም ክርስትና ሃይማኖታችን እርሱን መሠረት አድርጎ የቆመበት ትንሣኤው ታሪክ ብቻ ሳይሆን ዛሬም በሕይወታችን ላይ የሚሠራ ኃይል፣ የጨለማው መጨረሻ፣ ከጥፋት መንገድ የወጣንበት የንጋቱ መጀመሪያ መሆኑ አያጠያይቅም።
የመልእክታችን መነሻ የሆነው ሐዋርያዊ ቃልም «አሮጌው ነገር አልፎ እነሆ ሁሉም አዲስ ሆኗል» የሚል ነው። የክርስቶስ ትንሣኤና የምሥራቹ ዜና እስኪሰማ ድረስ የሰው ልጅ ያሳለፈው የመከራ ዘመን የሚረሳ አይደለምና አዲስ የሆነው ነገር ከአሮጌው ጋር መነጻጸሩ የማይቀር ነው።
በክርስቶስ ቤዛነት የተደረገልን ድንቅ ነገር ለመረዳትም ከአለፈው መነሣት የግድ ነው። የሐሳብ ቅንነት የጠፋበት፣ የመንፈስ ድካም የነበረበት ያ! አሮጌው ነገር በክርስቶስ አልፎ ዛሬ አዲስ የትንሣኤ ሕይወት አግኝተናል። በዚህም ሰው ሆኖ ያዳነን፣ በትንሣኤው አዲስ ሕይወት የሰጠንን አምላክ እናመሰግናለን።
ብፁዕ ወቅዱስ አባታችን፤
ብፁዓን ሊቃነ ጳጳሳት፤
ክቡራንና ክቡራት በዚህ የእንኳን አደረሳችሁ መርሐ ግብር የተገኛችሁ የመንፈስ ቅዱስ ልጆቻችን፤
ክርስቶስ ላንቀላፉት ሁሉ በኩራት ሆኖ በመነሣቱ በሰው ልጅ ሕይወት የነበረው ሥቃይና መከራ አልፎ፤ ሁሉም ነገር አዲስ በሆነበት የምሕረት ዘመን፤ የአሮጌው ማንነት መገለጫ ስንፍና፣ በሥራ ሲሸነፍ፣ ጥላቻ በፍቅርና በልማት ሊተካ አልቻለም ባይነት፣ አይቻልም ማለት በትንሣኤ ሕይወት ውስጥ ቦታ የላቸውም። (1.ቆሮ 15÷20)
በዚህ የሕይወት ጉዞ የቅድስት ቤተ ክርስቲያናችን ሁለንተናዊ ተልዕኮና ራስን የመቻል ሁኔታ የተሟላ እንዲሆን የደከሙ፤ እነርሱ እየተራቡና እየተጠሙ የእኛ የልጆቻቸው ኑሮ እንዲሻሻል በመታመን አክብረው የሠሩ ቀደምት አባቶቻችንን የሚያስታውሱ በርካታ የልማት ሥራዎች በእግዚአብሔር ፈቃድ፣ በቅዱስነትዎ ጸሎትና አመራር ሰጪነት እየተከናወኑ ይገኛሉ።
ቀደም ሲል ተጀምረው ያልተጠናቀቁ የሕንፃ ግንባታዎችና በአዲስ መልክ የሚሠሩ ልዩ ልዩ ፕሮጀክቶች በታቀደላቸው ጊዜ ተጠናቅቀው መንፈሳዊና ማኅበራዊ አገልግሎት እንዲሰጡ ለማድረግ ተግተን በመሥራት ላይ እንገኛለን።
ከዚህም ጋር የተቋማት ማንነትና አሠራር የሚለካው በሚገለገሉባቸው ጽ/ቤቶች አያያዝና በሥራ አፈጻጸማቸው ስለሆነ የመንበረ ፓትርያርክ ጠቅላላ ቤተ ክህነት ይዞታን በማስከበር ጽዱና ውብ ሥፍራ የማድረግ ሥራው በመገባደድ ላይ ይገኛል።
ያለ አግባብ የተከማቹ ንብረቶችም ተገቢውን መፍትሔ እንዲያገኙ፤ የግቢው ጽዳትና ውበት እንዲጠበቅ የማድረግ ሥራ ብዙ ጊዜና ጉልበት የሚጠይቅ የነበረ ቢሆንም በሁሉም የቤተ ክህነታችን የሥራ ኃላፊዎችና ሠራተኞች ተሳትፎ በአግባቡ ተከናውኗል።
በመሆኑም ሥልጣነ ሞት የተሻረበትን የክርስቶስ ትንሣኤ ዛሬ በዚህ መልኩ ተሰብስበን በቅዱስነትዎ በራሄ የምናከብረው ከፍተኛ በሆነ የሥራ መነቃቃት ነው።
ብፁዕ ወቅዱስ አባታችን፤
ብፁዓን ሊቃነ ጳጳሳት፤
ክቡራንና ክቡራት፤
ትንሣኤ የሥጋ መነሣት ብቻ አይደለም በእግዚአብሔር ቤት ሊሠራ የሚገባውን ሥራ በመሥራት ለኃጢአት ሞቶ፣ በአዲስ ሕይወት መኖር ማለት ነው። ትንሣኤ ልዩነትን ይሻገራል፣ በቃል ብቻ ሳይሆን በተግባር የሚታይ አንድነትንም ይፈጥራል። ከኃጢአት መራቅን፣ በፍቅር መኖርንና በተስፋ መጓዝን ያጎናጽፋል። ሰው ብቻውን ሲሠራ ውጤቱ ውስን ነው፤ በጋራ መሥራት ግን እጅግ ከፍተኛ ዋጋ ያለው በትንሣኤው የተገኘ የሕይወት መርሕ ነው።
ቅድስት ቤተ ክርስቲያናችን ዛሬ ያለችበት ደረጃ ላይ እንዲሁ በቀላሉ አልደረሰችም። በትንሣኤው የተገኘው አንድነት የበጎ ሥራ ሁሉ መሠረት መሆኑን በተረዱት፣ ለክብረ ስማቸው ይህን መታሰቢያ ትተውልን ባለፉት አባቶቻችንና እናቶቻችን ከፍተኛ ጥረት ነው። ዛሬ እኛ እየገነባን ያለነው እነርሱ ባኖሩት መሠረት ላይ ነው።
በመሆኑም ጊዜው የሥራ ጊዜ ነውና አሁን ያለነው የቤተ ክርስቲያን አባቶችና ምዕመናን የእምነታችንን ታሪክ ከሥርዓተ አምልኮው ጋር የመጠበቅና የማስጠበቅ፣ ለመንፈሳዊና ማኅበራዊ ዕድገት ልማትን አስፋፍቶ የመሥራት ኃላፊነት አለብን።
ስለዚህ በአዲስ መንፈስና በአዲስ ሕይወት እየተመላለስን የትንሣኤውን ብርሃን በማውጅ ለሀገር ሰላም፣ ለቤተ ክርስቲያን አንድነትና ለሐዋርያዊ ተልዕኮ መስፋፋት ሁሉም የቤተ ክርስቲያናችን አገልግሎቶች ለጥንታዊ ታሪካችን በሚመጥን መልኩ ድርሻችንን ልንወጣ ይገባል።
በታላቁ ዐቢይ ጾም ለሃምሳ አምስት ቀናት ያለ ዕረፍት ስታገለግሉ ከርማችሁ ደከመን ሳትሉ በተቀደሰው ኦርቶዶክሳዊ ትውፊት መሠረት ቅዱስ አባታችንን እንኳን አደረሰዎት ለማለት የሁላችን ማዕከል ወደ ሆነው መንበረ ፓትርያርክ መጥታችሁ የበረከቱ ተካፋዮች የሆናችሁትን ሁሉ በቅድስት ቤተ ክርስቲያናችን ስም ከልብ እናመሰግናችኋለን።
በመጨረሻም ቅዱስ አባታችን በልጁ ሞት ይቅር ያለን አምላካችን እግዚአብሔር በጸሎት፣ በሐሳብ ካልተለየዎትና ሁልጊዜም ከማይለየዎት ሕዝበ ክርስቲያን ጋር በሰላም፣ በጤና ጠብቆ እንኳን ለ2018 ዓ/ም በዓለ ትንሣኤ በድጋሚ አደረሰዎ እያልኩ መልእክቴን በዚህ አጠቃልላለሁ።
የቅዱስነትዎ ቡራኬ አይለየን
አባ ሳዊሮስ
የመንበረ ፓትርያርክ ጠቅላላ ቤተ ክህነት ዋና ሥራ አስኪያጅ፤
የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ፤
የምስካዬ ኅዙናን ገዳም የበላይ ኃላፊ፤
ሚያዝያ 4 ቀን 2018 ዓ/ም
አዲስ አበባ ኢትዮጵያ

የቅዱስነታቸው አባታዊ መልዕክት እንደሚከተለው ይነበባል።
ቃለ በረከት ዘብፁዕ ወቅዱስ ኣቡነ ማትያስ ቀዳማዊ ፓትርያርክ ርእሰ ሊቃነ ጳጰሳት ዘኢትዮጵያ ሊቀ ጳጳስ ዘአኲስም ወዕጨጌ ዘመንበረ ተክለ ሃይማኖት፣ ዘተናገረ በበዓለ ትንሣኤሁ ለእግዚእነ ወኣምላክነ ወመድኃኒነ ኢየሱስ ክርስቶስ ዘዕሥራ ምእት ዓሠርቱ ወሰምንቱ ዓመተ ምሕረት፤
በስመ ኣብ ወወልድ ወመንፈስ ቅዱስ ኣሐዱ ኣምላክ ኣሜን፡-
በሀገራችን በኢትዮጵያ በገጠርና በከተማ የምትኖሩ፣
ከሀገር ውጭ በተለያዩ አህጉር የምትገኙ፣
የሀገራችንን ዳር ድንበር ለመጠበቅና ለማስከበር በየጠረፉ የቆማችሁ፣
በሕመም ምክንያት በየፀበሉና በየሆስፒታሉ ያላችሁ፣
እንዲሁም የሕግ ታራሚዎች ሆናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት በሙሉ፣
በቤዛዊ መሥዋዕትነቱ ከሞተ ኃጢኣት ታድጎ የትንሣኤ ሙታንን በር የከፈተልን ጌታችን ኢየሱስ ክርስቶስ እንኳን ለብርሃነ ትንሣኤው በሰላም ኣደረሰን ኣደረሳችሁ!
‹‹ወኣነ እሜጡ ነፍስየ ቤዛ ኣባግዕየ ከመ ካዕበ ኣንሥኣ፤
ዳግመኛ ኣነሣት ዘንድ ነፍሴን የበጎቼ ቤዛ ኣድርጌ እሰጣለሁ (ዮሓ 10÷17)
ጌታችን ኣምላካችንና መድኃኒታችን ኢየሱስ ክርስቶስ በሰብኣዊ ክዋኔው ሰው ቢሆንም በመለኮታዊ ክዋኔው የኣብና የመንፈስ ቅዱስ ቃል ወይም ወልደ እግዚአብሔር ነው፤
በመሆኑም በሰብኣዊ ክዋኔው መዋች ሲሆን በመለኮታዊ ክዋኔው ተነሽና ኣንሺ ነው፤ ከዚህ ኣንጻር ሥግው ቃል ሁለቱንም ተግባራት በኣንድ ኣካልና ክዋኔ የመፈጸም ሥልጣን ኣለው፤ ይህም በመሆኑ ራሴን የማኖርና የማንሣት ሥልጣን ኣለኝ በማለት እውነታውንና ምንነቱን ኣሳየ፤
ጌታችን ይህንን ኣስመልክቶ ከመሞቱና ከመነሣቱ በፊት ለቅዱሳን ሓዋርያት በተደጋጋሚ ኣስረድቶኣል፤ ስለሆነም የጌታችን ሞትና ትንሣኤ ድንገተኛና የግድ ሳይሆን ታውቆ ያደረና የውድ እንደሆነ ከዚህ እውነታ እንረዳለን፤
ጌታችን ይህንን ተግባር በውድ ፈቃዱ የፈጸመው በእግዚአብሔር ኣሰራር ከዚህ ውጭ የዓለም ድኅነት የሚከናወንበት ዕድል ስለሌለ ነው፤ በእግዚአብሔር ኣሰራር ኃጢኣትና በደል የሚሰረዘው በቤዛዊ መሥዋዕት ብቻ እንደሆነ ከብሉይ ኪዳን ጀምሮ በነበረው የቤዛዊ መሥዋዕት ኣቀራረብ የታወቀ ነው፤
በመሆኑም የሰውን ምልኣተ ኃጢኣት ሙሉ በሙሉ ሰርዞ ሰውን ከሞት ቅጣት ነጻ ለማውጣት ብቃት ያለው ቤዛዊ መሥዋዕት ወደ እግዚአብሔር መቅረብ ነበረበት፤ ይሁን እንጂ ለዚህ ዓይነቱ ቤዛዊ መሥዋዕት ብቁ የሆነ ከፍጡራን ወገን ስላልተገኘ ‹‹ለሊሁ መሥዋዕት፣ ወለሊሁ ሠዋዒ፣ ወለሊሁ ተወካፌ መሥዋዕት ማለትም›› ራሱ መሥዋዕት፣ ራሱ መሥዋዕት ኣቅራቢ ሊቀ ካህናት፣ ራሱ ተወካፌ መሥዋዕት ኣምላክ ሆኖ የቤዛነታችንን መሥዋዕት ራሱ በራሱ ለራሱ ኣቀረበ››፤
በዚህ ቤዛዊ መሥዋዕትም እኛን ከሞት ቅጣት ነጻ ኣደረገን፤ትንሣኤያችንንም በትንሣኤው ኣበሰረ፤ በክርስትና ሃይማኖት የሚገኝ ፍጹም ድኅነትና ነጻነት በዚህ ቤዛዊ መሥዋዕት ላይ የተመሠረተ ነው፤
የተወዳደችሁ የመንፈስ ቅዱስ ልጆቻችን
ምእመናንና ምእመናት!
ጌታችን በትንሣኤው ትንሣኤያችንን ሲያበስረን የትንሣኤ ሰዎች ሆነን በመንፈስና በሞራል በማደግ ብርሃናተ ዓለም ልንሆን እንጂ እንደገና የጨለማው ኃይል መሳሪያዎች ልንሆን ኣይደለም፤ የሞቱና የትንሣኤው ምስጢር በንጹሁ ኅሊናችን ካስተዋልነው ውስጣችን እሱን ለመቀበል የሚያዳግተው ኣይደለም፤
ከዚህ ኣንጻር በትንሣኤው ኣምነን ትንሣኤያችንን እየተጠባበቅን የምንገኝ ሕዝበ ክርስቲያን በቅን ኣስተሳሰብ፣በርቱዕ ኣእምሮና በኃይለ ሃይማኖት እየታገዝን ጨለማውን ዓለም ወደብርሃን ለመለወጥ መጣርና መትጋት ይጠበቅብናል፤
የጨለማው ዓለም መንፈስ ሊያጠፋን ካልሆነ በቀር እንደማይጠቅመን በተጨባጭ የምናውቀው ነው፤ወደድንም ጠላንም ያለን ብቸኛ ኣማራጭ ብርሃንን መከተል ነው፤ እሱም እግዚአብሔር ነው፤በብርሃን የሚመላለስ እንደማይጐዳ በእግዚአብሔር የሚኖርም ተጐድቶ ኣያውቅምና ነው፤
ዓለም እንደ ኣጠቃላይ በጨለማ ተውጦ ሲተረማመስ የሚታየው ከብርሃን ይልቅ ጨለማን ምርጫው ስላደረገ ነው፤ ስለሆነም የኛ ምርጫ ብርሃን የሆነውን እግዚአብሔር እንዲሆን የቤተ ክርስቲያን የዘወትር ጥሪ ነው፤
በመጨረሻም፡-
የትንሣኤ በዓላችንን ስናከብር ዓለም በክፋቱ ያጨለመባቸውን ወገኖች ጦማችው እንዳይውሉ ካለን ከፍለን የተራቡትን በማብላት፣ የተጠሙትን በማጠጣት፣ የታረዙትን በማልበስና የዕለቱ ደስታ ተካፋይ እንዲሆኑ በማድረግ ቀኑ ለሁላችንም ፍጹም ብርሃን ሆኖ ይውል ዘንድ ክርስቲያናዊ ግዴታችንን እንድንወጣ ጥሪያችንን በእግዚአብሑር ስም እናስተላልፋለን፤
መልካም የትንሣኤ በዓል ያድርግልን!!
“እግዚአብሔር ኢትዮጵያንና ሕዝቦችዋን ይባርክ”
“ወስብሐት ለእግዚአብሔር”
ኣሜን!!!
አባ ማትያስ ቀዳማዊ
ፓትርያርክ ርእሰ ሊቃነ ጳጰሳት ዘኢትዮጵያ ሊቀ ጳጳስ
ዘአኲስም ወዕጨጌ ዘመንበረ ተክለሃይማኖት፣
ሚያዝያ 4 ቀን 2018 ዓ.ም
አዲስ አበባ፣ ኢትዮጵያ

መጋቢት 30/7/2018 ዓ.ም
አዲስ አበባ-ኢትዮጵያ
ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅና የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ፣ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ የትንሳኤ በዓልን በማስመልከት በጥቁር አንበሳ እስፔሻላይዝድ ኦስፒታል በመገኘት በእመም ላይ ያሉ ሕሙማንን ጎብኝተው ማዕድ አጋሩ፣የቁሳቁስና የገንዘብ ድጋፋ አደረጉ።
ጉብኝቱ የተካሄደው የትንሳኤ በዓል መንፈሳዊ ትርጉምን በተግባር ለማሳየት ሲሆን፣ በበዓሉ ወቅት በሕክምና ላይ ያሉ ወገኖች እንዳይረሱ እና ከማህበረሰቡ ጋር እንደተገናኙ እንዲሰማቸው የሚያስችል መሆኑ ተገልጿል።ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ በጉብኝቱ ወቅት እንደገለጹት ሕሙማኑን በማበረታታት፣ የህክምና ባለሙያዎችን ማመስገንና መንፈሳዊ ድጋፍ ማድረግ የቤተክርስቲያን ተቀዳሚ ተግባሯ መሆኑን ገልጸዋል።
ብፁዕ አቡነ ሳዊሮስ የጠቅላይ ቤተክህነት
ዋና ሥራ አስኪያጅ በበኩላቸው የታመመውን መጠየቅና የታረዘውን ማልበስ ክርስቲያናዊ አስተምህሮ መሆኑን ገልጸው፣ ሕሙማኑ ፈጣን ፈውስ እንዲያገኙ እግዚአብሔርን በጸሎት ጠይቀዋል። የእንኳን አደረሳችሁ መልህክታቸውንም አስተላልፈዋል።ዶክተር ራኤል የጥቁር አንበሳ ሆስፒታል አመሰራረት እና የሚሰጡትን አገልግሎቶች በመግለጽ፣ “አባቶቻችን በተጣበበ ሰዓት በዚህ ስፍራ መገኘታቸው ለታካሚዎቻችን ተስፋ ሲሆን ለእኛ ደግሞ ታላቅ ማበረታቻ ነው” ብለዋል።
በዚሁ ጊዜ ለበዓል መዋያ የሚሆን 500,000 (አምስት መቶ ሺህ) ብር እና የተለያዩ የንጽሕና መጠበቂያ ቁሳቁሶች ድጋፍና ከማድረጋቸውም በላይ ለሕሙማኑ ማዕድ አጋርተዋል።
በጉብኝቱ ወቅት ከብፁዓን አባቶች ጋር ዶክተር አካለ ወልድ ተሰማ የኢትዮጵያ ኦርቶዶክስ ተዋሕዶ ቤተክርስቲያን መገናኛ ብዙሃን ሥራ አስኪያጅ፣ ሊቀ ስዩማን እስክንድር ገብረ ክርስቶስ የቤቶችና ሕንፃዎች አስተዳደር ዋና ሥራ አስኪያጅና የሕዝብ ግንኙነት መምሪያ ኃላፊ፣መጋቤ ካህናት አባ ሃብተጊዮርጊስ አስራት የገዳማት መምሪያ ኃላፊ እንዲሁም መላከ ኃይል አባ አፈወርቅ ዮሐንስ የሦስቱ ክፍላተ ከተማ ዋና ሥራ አስኪያጅ ተገኝተዋል።
የጥቁር አንበሳ ኦስፒታል አስተዳደር በተደረገው ጉብኝትና ድጋፍ ከፍተኛ ደስታ እንዳላቸው ገልጸው፣ ይህ ዓይነት ማህበራዊና መንፈሳዊ ድጋፍ ለሕሙማን ትልቅ ኃይል እንደሚሰጥ አመልክተዋል።
በመጨረሻምብፁዓን አባቶች እና የመንበረ ፓትሪያርክ ጠቅላይ ቤተክህነት ልዑካን በሕመምላይ የሚገኙትን ታማምዎችን ተዘዋውረው በመጠየቅና ለሁሉም ፀሎት በማድረግ ጉብኝቱ ፍጻሜውን አግኝቶአል ።