​ከተቋቋመ ገና ሦስት ዓመታትን ያስቆጠረው የመቱ ፈለገ ጥበብ መንፈሳዊ ኮሌጅ፤ ከተለያዩ አህጉረ ስብከቶች ተቀብሎ ሲያሰለጥናቸው እና ሲያስተምራቸው የቆያቸውን ፲፰ እጩ መምህራን ደቀ መዛሙርት በሐምሌ ፲፩ ቀን ፳፻፲፰ ዓ.ም. በደመቀ ሥነ ሥርዓት አስመርቋል።

ይህ ታሪካዊ የምረቃ በዓል የመቱ ፈለገ ጥበብ መንፈሳዊ ኮሌጅ የበላይ ኃላፊ፣ ፕሬዚዳንትና የኢሉ አባ ቦር እና የምዕራብ ወለጋ አህጉረ ስብከቶች ሊቀ ጳጳስ ብፁዕ አቡነ ኤዎስጣቴዎስ (ዶ/ር)፣ የቡኖ በደሌ እና የቄለም ወለጋ አህጉረ ስብከት ሊቀ ጳጳስ ብፁዕ አቡነ ኤፍሬም፣ የሀገረ ስብከቱ ዋና ሥራ አስኪያጅ ሊቀ ትጉሃን ብርሃኑ መንገሻ፣ ጥሪ የተደረገላቸው እንግዶችና የተመራቂ ቤተሰቦች በተገኙበት ተካሂዷል።

​በመርሐ ግብሩ ላይ በረከታቸው ይደርብንና ታላቁና ጸሎተኛው የቀድሞው የሀገረስብከቱ ሊቀ ጳጳስ ብፁዕ አቡነ ሚካኤል ኮሌጁ በአፋጣኝ እንዲከፈት መመሪያ በመስጠትና ጥብቅ ክትትል በማድረግ፣ በቅዱስ ሲኖዶስ ውሳኔ መሠረት መንሳዊ ኮሌጁ እንዲመሠረት ያደረጉት ጥረትና የነበራቸው አባታዊና መምህራዊ ምክር በታላቅ አክብሮት ተዘክሯል።

የኮሌጁ የበላይ ኃላፊና ፕሬዚዳንት ብፁዕ አቡነ ኤዎስጣቴዎስ (ዶ/ር) ለአዲሶቹ እጩ መምህራን ባስተላለፉት አባታዊ አደራና ቃለ ቡራኬ፤ “ዛሬ የተሰበሰብነው ትምህርት ያበቃበትን ቀን ለማክበር ወይም የዲፕሎማና የዲግሪ ወረቀት ለመስጠት ሳይሆን፣ የቅድስት ቤተ ክርስቲያናችንን ቀዳሚ ዓላማና የወንጌል አገልግሎት አደራ ለመቀበል ነው” ሲሉ ገልጸዋል።

ብፁዓን አበው ሊቃነ ጳጳሳትና የቤተ ክርስቲያኒቱ መሪዎችም ተመራቂዎቹ በሄዱበት ሁሉ ቅድስት ቤተ ክርስቲያንን በታማኝነትና በቅንነት እንዲያገለግሉ፣ የተማሩትን በሥራ እንዲገልጡና የተዘጉትን አብያተ ክርስቲያናት እንዲያስከፍቱ ጥብቅ አደራ አስተላልፈዋል።

​ተመራቂ ደቀ መዛሙርቱም በበኩላቸው ባስተላለፉት የጋራ መልእክት፤ በኮሌጁ የቆይታ ጊዜያቸው በመንፈሳዊ ዕውቀትና በሥነ ምግባር ታንጸው፣ በሚያምኑትና በማያምኑት ዘንድ የክርስቶስ ደቀ መዛሙርት በመሆን በሕይወታቸው ተነባቢ መጽሐፍ ሆነው መኖርንና ሐዋርያዊ ግዴታቸውን መወጣትን እንደተረዱ ገልጸዋል። አያይዘውም “ከዚህ በኋላ የፍጥረት ሁሉ መዳኛ የሆነውን ወንጌል ይዘን የምናስተምርበት፣ ጨለማውን ዓለም የምናበራበት፣ የታመመውን የምናክምበት እንዲሁም በቃልም ሆነ በሥራ የቅድስት ቤተ ክርስቲያንን ተልዕኮ የምንፈጽምበት ጊዜ ነው፤ ትምህርት አላለቀም፣ በማስተማር ውስጥ መማር በመማር ውስጥ ማስተማር ይቀጥላል፤ በቀጣይ ሕይወታችን በሁለት ወገን የተሳለ ሰይፍ፣ እንደ እባብ ልባም እንደ እርግብም የዋህ ሆነን አገልግሎታችንን እንፈጽማለን” ሲሉ ቃላቸውን አድሰዋል።

​በዕለቱ መርሐ ግብር ላይ በኮሌጁ ታሪክ ለመጀመሪያ ጊዜ የተዘጋጀችው “መጽሔተ ጥበብ ቁጥር ፩” የተሰኘችው መጽሔት ተመርቃ ለአገልግሎት የበቃች ሲሆን፤ በኮሌጁ የሚገኙ የአስተዳደር፣ የመምህራንና የድጋፍ ሰጪ አካላት ደቀ መዛሙርቱ በውጤታማነት እንዲመረቁ ላደረጉት ታላቅ አስተዋጽኦ ዕውቅና ተሰጥቷል። በሥነ ሥርዓቱ ማጠቃለያ ላይም ለኮሌጁ ዕድገት ከፍተኛ አስተዋጽኦ ላበረከቱ አካላት፣ ለደቀ መዛሙርቱና በከፍተኛ ውጤት ለተመረቁ ተመራቂዎች የምስክር ወረቀትና የክብር ሽልማት ተበርክቶላቸዋል።

​ዘገባው፦ የኢሉ አባ ቦር ሀገረ ስብከት ሚዲያ

‎

‎በአዲስ አበባ ሀገረ ስብከት ስር የሚገኘው ታላቁ ደብረ ደብረ ጽባሕ ቅዱስ ሚካኤል ቤተ ክርስቲያን በዛሬው ዕለት በብፁዕ ወቅዱስ ፓትርያርኩ ካቴድራል ተብሎ ተሰይሟል።

‎ቤተ ክርስቲያኑ ላለፉት ዓመታት ለአካባቢው ምዕመናን ታላቅ የመንፈሳዊ አገልግሎት ማእከል በመሆን ሲያገለግል የቆየ ሲሆን፣ የአገልግሎቱ ስፋት፣ የማኅበረሰቡ ቁጥር ማደግ፣ እንዲሁም የሕንጻውና የአደረጃጀቱ ታላቅነት አሁን ላይ የካቴድራልነት ማዕረግን ለመቀናጀት አብቅቶታል።

‎ብፁዕ ወቅዱስ ፓትርያርኩ በሥፍራው ተገኝተው ሕዝበ ክርስቲያኑን የባረኩ ሲሆን፣ የደብሩን አገልግሎት ወደ ላቀ ደረጃ የሚያሸጋግር ልዩ መመሪያና ቡራኬ ሰጥተዋል ።

‎በበዓሉ ላይ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ የራያ ሀገረ ስብከት ሊቀ ጳጳስ ፤ ብጹዕ አቡነ ሕርያቆስ የአዲስ አበባ ሀገረ ስበከት ሊቀ ጳጳስ ሀዲያ ስልጤ ሀገረ ስብከት ሊቀጳጳስ ፤ ብጹዕ አቡነ ሚካኤል የደቡብ ጎንደር ሀገረ ስብከት ሊቀጳጳስ የአዲስ አበባ ሀገረ ስበከት ዋና ሥራ አስኪያጅ ምህርት አባ ገብረመድኅን ንጉሤ ሊቃውንተ ቤተክርስቲያን መልአከ መንክራት ኃይሌ አብርሃ የካቴድራሉ አስተዳዳሪን ጨምሮ የገዳማት የገዳማትና አድባራት አስተዳዳሪዎች የሰንበት ትምህርት ቤት ወጣቶች እና ምዕመናን ተገኝተዋል።

‎ይህ የካቴድራልነት ስም መጠሪያ ብቻ ሳይሆን፣ የአገልግሎት ስፋትንና ለወጣቱ እንዲሁም ለታዳጊው ትውልድ የሚሰጠውን መንፈሳዊና ማኅበራዊ አገልግሎት ይበልጥ ለማጠናከር ትልቅ ኃላፊነት የሚጥል ነው ሲሉ ብፁዕ አቡነ ዲዮስቆሮስ የቅዱስ ሲኖዶስ ዋና ጸሐፊ የራያ ሀገረ ስብከት ሊቀ ጳጳስ ገልጸዋል።

‎ይህ ታሪካዊ ዕለት በደብሩ መዝገበ ታሪክ ላይ በደማቅ ቀለም የሚጻፍም ይሆናል ሲሉ የደብሩ አስተዳዳሪ መልአከ መንክራት ኃይሌ አብርሃ ገልጸዋል።

‎በዕለቱ አጠቃላይ ሪፖርት ያቀረቡት ዶክተር ቀሲስ ኢንጂነር ጌታቸዉ ፈለቀ የሕንጻ አሰሪ ኮሚቴ ሲሆን ቤተክርስቲያኑ አሁን ያለበት ደርጃ ላይ ለማድረስ 300 ሚሊዮን ብር መውጣቱን ጠቁመው ፤ ደብሩ ሰፊ የልማት ሥራዎችን በማፋጠን ላይ እንደሚገኝም ገልጸዋል ።

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/

ሕዝብ ግንኙነት መምሪያ

“የሕዝብ ግንኙነት ስኬት ለቤተ ክርስቲያን አገልግሎት” በሚል መሪ ቃል ለሀገር አቀፍ የአህጉረ ስብከት የሕዝብ ግንኙነት ኃላፊዎች በከፍተኛ ዝግጅት ሲሰጥ የሰነበተው ፫ኛው ዙር ሥልጠና በዛሬው ዕለት በወንጪ ቅዱስ ቂርቆስ ገዳም ጉብኝት ተጠናቋል።

የዚሁ ታሪካዊ ሥልጠና ማጠቃለያ ይሆን ዘንድ የአህጉረ ስብከት የሕዝብ ግንኙነት ኃላፊዎች በደቡብ ምዕራብ ሸዋ ሀገረ ስብከት በወንጪ ወረዳ በሚገኘው ታዋቂው የወንጪ ሐይቅ ቅዱስ ቂርቆስ አንድነት ገዳም ልዩ የጉብኝት መርሐ ግብር ተከናውኗል።

ይህ ታላቅ የጉብኝት እና የመስክ ውይይት መርሐ ግብር በወንጪ ቅዱስ ቂርቆስ ገዳም ሊከናወን የቻለበት ምክንያት የኢትዮጵያ ኦርቶዶክስ ተዋሕዶ ቤተ ክርስቲያን የመንበረ ፓትርያርክ ጠቅላይ ቤተ ክህነት ዋና ሥራ አስኪያጅ፣ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ የብፁዕ አቡነ ሳዊሮስ ሀገረ ስብከት በመሆኑና መርሐ ግብሩን በዚህ ታሪካዊ ሥፍራ ቢከናወን የሥልጠናውን ማጠቃለያ ይበልጥ ልዩና ታሪካዊ መርሐ ግብር ስለሚደርገው በልዩ ሁኔታ መመረጡ ተገልጧል።

ሠልጣኞቹ በጉብኝቱ ወቅት የወንጪ ሐይቅ ቅዱስ ቂርቆስ ገዳም በ፲፫ኛው መቶ ክፍለ ዘመን የተመሠረተና የታላቅ መንፈሳዊ ታሪክ ባለቤት መሆኑን የተረዱ ሲሆን አካባቢው በገበታ ለትውልድ መርሐ ግብር የቱሪስት መስህብ ሆኖ መሠራቱን ተከትሎ ወደ ሥፍራው ለጉብኝት የሚጓዙ ጎብኚዎች ጥንታዊውን የቅዱስ ቂርቆስ ገዳምን እንዲጎበኙ ለማድረግ ይቻል ዘንድ ጥንታዊ መሠረቱን ሳይለቅ በአዲስ መልክ እንዲሠራ ክቡር የኢፌዲሪ ጠ/ሚ ዐቢይ አህመድ በሰጡት ቀጥተኛ ትዕዛዝ የሚሠራ መሆኑን በጉብኝቱ ወቅት ተገልጿል።

በገዳሙ የሚከናወኑትን የልማት ሥራዎች በርካታ ብፁዓን አባቶች የጎበኙትና ለግንባታ ሥራው አስተዋጽኦ ያበረከቱ ሲሆን በገዳሙ ውስጥ በርካታ አህጉራዊና ሀገራዊ ፋይዳ ያላቸው ታላላቅ የልማት ሥራዎች በመከናወን ላይ እንደሚገኙም የሕዝብ ግንኙነት ኃላፊዎቹ ተመልክተዋል።

ሠልጣኞቹ በገዳሙ ባደረጉት ጉብኝት ወቅት የአብነት ትምህርት ቤት ግንባታ፣ የሙዚየም ግንባታ፣ የቤተ መቅደስ ግንባታ፣ የቤተልሔም ሕንጻ እንዲሁም አጠቃላይ የቅጥርና የመሠረተ ልማት ግንባታ ሂደቶች በፍጥነት በመገንባት ላይ መሆናቸውን ተመልክተዋል። በጉብኝቱ ወቅት ስለ ገዳሙ ጥንታዊ አመሠራረት፣ ስለ ነበረው ታሪክና አሁን ስላለው ሁለንተናዊ የዕድሳት ሂደት ሰፊና ጥልቅ ማብራሪያ የተሰጠ ሲሆን፣ ሠልጣኞቹም ካዩት ታላቅ መንፈሳዊ ቅርስና የልማት እንቅሰቃሴ በመነሳት የተሰማቸውን ከፍተኛ ደስታና አበረታች አስተያየት በስፋት ገልጸዋል።

ከዚሁ መንፈሳዊ የጉብኝት መርሐ ግብር ማጠቃለያ በኋላ፣ በኢትዮጵያ ኦርቶዶክስ ተዋሕዶ ቤተ ክርስቲያን የሕዝብ ግንኙነት መምሪያ ኃላፊ በሊቀ ሥዩማን እስክንድር ገብረ ክርስቶስ አማካኝነት ለሠልጣኞቹ የተሳትፎ የምስክር ወረቀት በታላቅ ሥነ ሥርዓት ተበርክቶላቸዋል።

የመምሪያው ኃላፊ ሊቀ ሥዩማን እስክንድር ለሠልጣኞቹ ባስተላለፉት ጥብቅ መመሪያ፤ ኃላፊዎቹ በሥልጠናው ወቅት ያገኙትን ከፍተኛ ዕውቀትና ክህሎት ወደየአህጉረ ስብከታቸው በሚመለሱበት ወቅት ያለምንም መዘግየት ወደ ተግባር እንዲቀይሩት አሳስበዋል። አያይዘውም ተሳታፊዎቹ የእውነት ጠበቃ በመሆን የቅድስት ቤተ ክርስቲያን እውነተኛ ድምፅ እንዲሆኑ፣ በተመደቡበት የኃላፊነት ቦታና አገልግሎት ሁሉ ሳይታክቱና ሳይሰለቹ በርትተው እንዲሠሩ፣ እንዲሁም ለሃይማኖታቸውና ለቤተ ክርስቲያናቸው በጽናት እንዲቆሙ በብርቱ ቃል አስገንዝበዋል።

በመጨረሻም የመምሪያው ኃላፊ ሊቀ ሥዩማን እስክንድር ገብረ ክርስቶስ ይህ አገር አቀፍ የሥልጠናና የጉብኝት መርሐ ግብር እጅግ የተሳካ፣ ፍሬያማና ውጤታማ ሆኖ ይጠናቀቅ ዘንድ ሙሉ የገንዘብ ወጪውን በመሸፈን የላቀ ክርስቲያናዊ አጋርነቱንና ታሪካዊ ድጋፉን ላሳየው ለአሐዱ ባንክ በኢትዮጵያ ኦርቶዶክስ ተዋሕዶ ቤተ ክርስቲያን ስም ከፍተኛ ምስጋናቸውንና አድናቆታቸውን አቅርበው መርሐ ግብሩ ተፈጽሟል።

ፎቶ Eotc tv

የቅድስት ልደታ ጤና ሳይንስ ኮሌጅ በተለያዩ የዲግሪ መርሐ ግብራት በጤና ሳይንስ እና ሌሎች ዘርፎች ያስተማራቸውን ተማሪዎቹን ብፁዕ አቡነ ሚካኤል የደቡብ ጎንደር ሀገረ ስብከት ሊቀ ጳጳስ፤ የደብሩ አስተዳዳሪ መልአከ ስብሐት አባ ገብረ ሥላሴ በተገኙበት አስመርቋል።

ኮሌጁ በዲግሪ 460 ፤ በቴክኒክና ሙያ ሥልጠና 343 በጠቅላላው 803 ተማሪዎችን ነው ያስመረቀው።

​ኮሌጁ እስካሁን ለ18 ጊዜ ተማሪዎችን ያስመረቀ ሲሆን ፤ በጤናና በቴክኒክ ዘርፎች ብቁ ባለሙያዎችን በማፍራት ላይ እንደሚገኝ የኮሌጁ ዲን ዶክተር እስጢፋኖስ ዮሐንስ ገልጸዋል ። ኮሌጁ ለተመራቂዎቹ ሥራ እና ማኅበራዊ አገልግሎቶችን ሲሰጥ መቆየቱ ነው የተገለጸው።

የኮሌጁ ዲን ዶክተር እስጢፋኖስ ዮሐንስ ኮሌጁ አሁንም በሚሰጠው ጥራት ያለው ትምህርት፣ የምርምር ሥራዎችንና የማኅበረሰብ አገልግሎት እየሰጠ በዘርፉ ተወዳዳሪና ተመራጭ ኮሌጅ በመሆን እየሠራ ነው ብለዋል።

ኮሌጁ በሬሚዲያል የትምህርት መርሐ ግብር ተማሪዎችን በማብቃት እና ከፍተኛ ውጤት እንዲያመጡ እና ወደ ከፍተኛ ትምህርት ተቋም መግባት የሚያስችላቸውን ውጤት እንዲያስመዘግቡ በማስቻል የበኩሉን ሚና መጫወቱንም ገልጸዋል።

በሥነ ሥርዓቱ ተመራቂዎች ቃለ መሐላ የፈጸሙ ሲሆን ሌሎች መርሐ ግብራት ተከናውነዋል።

በመጨረሻም በ ብፁዕ አቡነ ሚካኤል የደቡብ ጎንደር አህጉረ ስብከት ሊቀ ጳጳስ ተመራቂዎች በተማሩት ትምሕርት ወገናቸውን በትጋት እንዲያገለግሉ አደራ በማለት በጸሎተ ቡራኬ መርሐ ግብሩ ተፈጽሟል።

የቅድስት ልደታ ጤና ሳይንስ ኮሌጅ በብፁዕ ወቅዱስ አቡነ ጳውሎስ (ዶ/ር) ፓትርያርክ ርዕሰ ሊቃነ ጳጳሳት ዘኢትዮጵያ መልካም ፈቃድ በ1997 ዓ.ም በመቋቋመ የቤተክርስቲያናችን የትምሕርት ተቋም ነው።

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/

ብፁዕ አቡነ ሳሙኤል የልማትና ክርስቲያናዊ ተራድኦ ኮሚሽን የበላይ ሓላፊ ሊቀ ጳጳስ ሰባት ደራጃቸውን የጠበቁ ኮምፒወተሮች በስጦታ አበርክተዋል፡፡ ብፁዕነታቸው እንደተናገሩት መንበረ ፓትርያርክ ጠቅላይ ቤተክህነት ልዩ ልዩ ሥራዎች እየተሠሩ በመሆኑ ለዚያ የሚያግዙ አምስት ኮምፒውተሮች፣ለቅዱስ ሲኖዶስ ሁለት ኮምፒውተር በአጠቃላይ ሰባት ኮምፒውተሮች በስጦታ ማበርከታቸውን ገልጸዋል፡፡

ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ በርክክቡ ወቅት እንደተናገሩት “በጠቅላይ ቤተክህነት ብዙ ሥራ እየተሠራ ነው፡፡ ከልማት ሥራዎች በተጓዳኝ መጻሕፍቱ፣ የተለያዩ የታሪክ ሰነዶች ዲጂታል እየተደረጉ ነው፤ ሥራ ሲሠራ መተጋገዝ የሚያስፈልግ በመሆኑ፤ ብፁዕ አቡነ ሳሙኤል የልማትና ክርስቲያናዊ ተራድኦ ኮሚሽን የበላይ ሓላፊ ሊቀ ጳጳስ ስላደረጉልን እገዛ እናመሰግናለን በማለት ምስጋናቸውን አቅርበዋል፡፡

የመንበረ ፓትርያርክ ጠቅላይ ቤተ ክህነት የኢንፎርሜሽንና ኮሙኒኬሽን ቴክኖሎጂ መምሪያ ባለሙያ ዲያቆን ሙሉዓለም ዐሥራት እነዳብራሩት “ብፁዕ አቡነ ሳዊሮስ የጠቅላይ ቤተክህነት ዋና ሥራ አስኪያጅ፣ የደቡብ ምዕራብ ሸዋና የሸገር ከተማ አህጉረ ስብከት ሊቀ ጳጳስ በተለያዩ ዘርፎች ትኩረት በመስጠት ልማቶችን ያከናውኑ መሆናቸው ይታወቃል፡፡ በተለይም የቤተክርስቲያን መንፈሳዊና አስተዳደራዊ ጉዳዮችን የሚያጠናክሩ ከዚህም በተጨማሪ በኢንፎርሜሽን ቴክኖሎጂና ዲጂታል ከፍተኛ ለውጥ ማምጣት የሚችል ሥራዎች እየተሠሩ ነው ያሉት፡፡” ብለዋል፡፡ ባለሙያው አክለውም “ቤተክርስቲያን በርካታ የመረጃ ሀብት ያላት መሆኑን ጠቁመው፤ እነዚህ መረጃዎቿና ዕውቀቶቿ በአግባቡ ተደራጅተው ያሰተቀመጡ በመሆናቸው፤ እነዚህን መረጃዎች ማስተዳደር የሚቻልባቸው አሠራር ለመዘርጋት የኢንፎርሜሽን ቴክኖሎጂና የዲጂታል ሥራዎች ሽግግር አማካሪ ኮሚቴ አቋቁሞ በሥራ ላይ እንደሚገኝ አብራርተዋል፡፡

እነዚህ የኢንፎርሜሽን ቴክኖሎጂና የዲጂታል ሥራዎች ከፍተኛ በጀት የሚጠይቁ በመሆናቸው ብፁዕ አቡነ ሳሙኤል ደረጃቸውን የጠበቁ ኮምፒውተሮችን ድጋፍ አድርገውልናል፤ልማት ኮሚሽን ያደረገው ትብብርና እገዛ በጣም ትልቅ ነው፡፡ እንደዚህ ዓይነት ድጋፎች ማግኘታችን የጀመርነውን ሥራ በሚፈለገው ደረጃ ውጤት ለማምጣት የሚያግዙ ስለሆኑ ሌሎችም አካላት ይህን ዓላማ ቢያግዙ ቤተክርስቲያን አሁን ያለችበትን መንፈሳዊ አገልግሎት በተሻለና ዘመኑ በሚጠይቀው ደረጃ ለማገልገል ዕድል ይሰጣታል ሲሉ አስረድተዋል፡፡

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/