“እረኛ ከሌለ በጎቹ ለአራዊት ይዳረጋሉ፤ የሕዝብ ግንኙነት ባለሙያዎች እውነትን ይዛችሁ ቤተ ክርስቲያንን ጠብቁ” ብፁዕ አቡነ ዲዮስቆሮስ

ጁፒተር ኢንተርናሽናል ሆቴል በጠዋቱ የክረምት አየር ውስጥ የቤተ ክርስቲያንን ድምፅ የሚያስተጋቡ ሙያተኞችን አስተናግዷል። መድረኩ “የሕዝብ ግንኙነት ስኬት ለቤተ ክርስቲያን አገልግሎት” በሚል ታላቅ ዓላማ የተዘጋጀ የሥልጠና መድረክ ነበር። በዚህ ጉባኤ ላይ አዳራሹን ፀጥታ ያሰፈነ፣ የባለሙያዎችን ልብ ያነቃቃና የቀጣይ ጉዟቸውን አቅጣጫ የቀየረ አንድ አባታዊ ድምፅ ተሰማ። እርሱም የቅዱስ ሲኖዶስ ዋና ጸሐፊና የራያ ሀገረ ስብከት ሊቀ ጳጳስ የብፁዕ አቡነ ዲዮስቆሮስ ድምፅ ነበር።

ብፁዕነታቸው ወደ መድረኩ ሲወጡ የያዙት መልዕክት ተራ ድርጅታዊ መመሪያ አልነበረም፤ ይልቁንም በቅዱሳት መጻሕፍትና በዘመኑ ተጨባጭ እውነት መካከል ድልድይ የሠራ ጥልቅ መንፈሳዊ ጥሪ እንጂ።“እረኛ ከሌለ በጎቹ ለአራዊት ይዳረጋሉ” በማለት ንግግራቸውን የጀመሩት ብፁዕነታቸው፣ በአዳራሹ ለተቀመጡት የሕዝብ ግንኙነት ባለሙያዎች ከባድ መንፈሳዊ አደራ አሰጠጧቸው። በጎቹ የተባሉት ምዕመናን መሆናቸውንና አራዊት የተባሉት ደግሞ በዚህ በዲጂታል ዘመን የሚፈበረኩ የሐሰት ወሬዎች፣ አሉባልታዎችና ቤተ ክርስቲያንን ለመክፈል የሚዶለቱ የተዛቡ ትረካዎች መሆናቸውን በምሳሌ አስረዱ።

በዚህ እይታ መሠረት የሕዝብ ግንኙነት ባለሙያ ማለት በቢሮ ውስጥ መግለጫ ብቻ የሚጽፍ ሠራተኛ ሳይሆን፣ ከመንጋው ፊት ቀድሞ በመቆም ተኩላዎችን የሚያባርር “የእውነት እረኛ” መሆኑን አብራሩ።

ብፁዕነታቸው በንግግራቸው መሃል በአጽንኦት እንደገለጹት፣ በእነዚህ ባለሙያዎች እጅ ላይ መገኘት ያለበት ብቸኛና ተፅዕኖ ፈጣሪ መሣሪያ “እውነት” ብቻ ነው። ዓለም በውሸትና በትረካ በሚናወጥበት በዚህ ዘመን፣ ቤተ ክርስቲያንን መጠበቅ የሚቻለው እውነትን በጽናት በመያዝ፣ የተዛቡ መረጃዎችን በጊዜው በማስተካከልና ትክክለኛውን መረጃ ለሕዝብ ተደራሽ በማድረግ እንደሆነ አሳሰቡ።

ንግግሩ ሲጠናቀቅ በአዳራሹ ውስጥ የነበረው ድባብ ተቀይሮ ነበር። ሥልጠናው ዕውቀት የሚገበይበት መድረክ ብቻ መሆኑ ቀርቶ፣ እያንዳንዱ ባለሙያ የወደቀችውን እውነት አንስቶ የቤተ ክርስቲያንን ክብር፣ ታሪክና አንድነት ለመጠበቅ ቃል የሚገባበት የታሪክ አጋጣሚ ሆነ። ብፁዕነታቸው የሰጡት አባታዊ መመሪያ ወቅቱንና ቴክኖሎጂውን የዋጀ አሠራርን በመከተል፣ የቤተ ክርስቲያንን ተቋማዊ መዋቅር ለማጠናከር የሚደረገውን ጉዞ አዲስ የብርሃን መስመር ያሳየ ሆኖ አልፏል።