መልእክተ ብፁዕ ወቅዱስ ፓትርያርክ

በስመ አብ ወወልድ ወመንፈስ ቅዱስ አሐዱ አምላክ፤ አሜን።
«ወዘሰ ጸንዐ ወቆመ ምግባሩ ውእቱኬ ዘይነሥእ ዕሴቶ ፥
ሥራው ጸንቶ የተገኘለት ሰው ዋጋውን የሚቀበል እርሱ ነው።»
(1ኛ ቆሮንቶስ 3፥14)

ሐዋርያው ቅዱስ ጳውሎስ ለቆሮንቶስ ቤተ ክርስቲያን በጻፈው መልእክቱ በሐዋርያዊ ተልእኮ ውስጥ በትምህርተ ሃይማኖት የመትከል፥ በሥርዓት የመምራት፥ በፍቅር የመንከባከብ ልዩ ልዩ ጸጋ ያላቸው
ሥዩማን ሲኖሩ፤ የሥራው ባለቤት ግን እግዚአብሔር መሆኑን በሕንጻ ግንባታ እየመሰለ ሲያስተምር፤
በነቢያት፥ በሐዋርያትና በሊቃውንት ትምህርት በተገለጠው የክርስቶስ መሠረትነት ላይ ውሉደ
ክህነት አገልግሎታቸውን በታላቅ ጥንቃቄ ማከናወን እንደሚኖርባቸው ያስገነዝባል፡፡

የተጀመረ ሥራ ከፍጻሜ ሲደርስ ከውጥኑ አንሥቶ የመሳተፍ ዕድል የገጠማቸው ሰዎች በልቡናቸው ጥልቅ ስሜት ሊፈጠር እንደሚችል እሙን ነው።
እኛም ዛሬ ባርከን አገልግሎት የምናስጀምረው የቅዱስ
ሲኖዶስ፥ የስብከተ ወንጌልና ልዩ ልዩ የቤተ ክርስቲያን ጉባኤያትን ዘመኑን በዋጀ መልኩ ለማካሄድ የሚያስችሉ
አዳራሾች የተካተቱበት ግዙፍ ሕንጻ ዋጋው የሚመዘነው በተሠራበት ቁሳቁስ ብቻ ሳይሆን በተገነባበት ዓላማ
ጭምር ነውና፤ የቦታ አጠቃቀምንና ማራኪ ሥነ ሕንጻን በማዋሐድ ተገንብቶ የቤተ ክርስቲያናችን ሐዋርያዊ
አገልግሎት በሚፈለገው ልክ የሚጠናከርበትና ለቀጣዩ
ትውልድም የምናቆየው ዘመን ተሻጋሪ ሀብት እንደሆነ በመረዳት ከፍ ያለ መንፈሳዊ ደስታ ይሰማናል፡፡

የተወደዳችሁ የመንፈስ ቅዱስ ልጆቻችን!

የዚህ ሕንጻ ግንባታ ሐሳብ በብፁዕ ወቅዱስ አቡነ ጳውሎስ ፭ኛው የኢትዮጵያ ፓትርያርክ መዋዕለ ሕይወት ተነሥቶ የነበረ ቢሆንም፤ ፈቃደ አምላክ
ተጨምሮበት ዕቅዱን የማደራጀትና የግንባታ ተግባሩ በዘመነ ክህነታችን ተጀምሮ መጠናቀቁ የታሪካችን አንድ
ክፍል ሆኖ እንዲታወስ ስለሚያደርገው ለአምላካችን ለእግዚአብሔር ምስጋናችንን እናቀርባለን፡፡

ዓመታትን በወሰደው የሥራ ሂደትም ብዙዎች በዕውቀታቸው፥ በጉልበታቸው፥ በሓላፊነታቸውና በትጋታቸው የየራሳቸውን አሻራ በማሳረፋቸው የዛሬው ምሉእ ውጤት የተገኘው በእነዚህ ባለ ድርሻዎች ጥረት ሲሆን፤ በተለይም የግንባታው ንድፍ ይፋ ከተደረገበት ጊዜ
አንሥቶ በቅዱስ ሲኖዶስ ውሳኔ እየተመደቡ በጠቅላይ ሥራ አስኪያጅነትና በቅዱስ ሲኖዶስ ጸሓፊነት ያገለገሉ ብፁዓን አበው ሊቃነ ጳጳሳት የዚህ ወርቃማ ታሪክ አካል ከመሆናቸውም ባሻገር፤ በልዩ ጥራት ተጠናቆ ለምርቃት ይደርስ ዘንድ አሁን በሥራ ላይ የሚገኙት ብፁዕ ጠቅላይ ሥራ አስኪያጅና ብፁዕ የቅዱስ ሲኖዶስ
ዋና ጸሐፊ፥ እንዲሁም በየደረጃው የሚገኙ የቤተ ክርስቲያኒቱ የሥራ ሓላፊዎች የነበራቸው ሚና የጎላ
በመሆኑ፤ ሁሉንም የመንፈስ ቅዱስ ልጆቻችንን እንኳን ለዚህ ዕለት አደረሳችሁ! እንኳንም የድካማችሁን ፍሬ
ለማየት አበቃችሁ! ለማለት እንወዳለን፡፡

የተወደዳችሁ የመንፈስ ቅዱስ ልጆቻችን!

ዛሬ ይህንን ሕንጻ በምንመርቅበት ቅጽበት በመላው ዓለምና በሀገራችን መዓዝናት በረሀብ፥ በጦርነት፥ በተፈጥሮና ሰው ሠራሽ አደጋዎች ሕይወታቸውን
የሚያጡ፤ ከኖሩበት ቀዬም የሚፈናቀሉ ብዙዎች ናቸውና፤ የቤተ ክርስቲያን አገልግሎት በዚህ ዘመን ከምንጊዜውም
በላይ በእውነት፥ በፍቅር፥ በመተማመንና በመንፈሳዊ ሕብረት ላይ ተመሥርቶ፤ የተጨነቁትን የሰው ልጆች ተስፋቸው ስለሚለመልምበት ሁኔታ ማሰብ እንደሚገባ በዚሁ አጋጣሚ እናስታውሳለን፡፡

በመጨረሻም በአዲሱ ጽርሐ ተዋሕዶ የሚደረጉ ጉባኤያት ሃይማኖትን ለማጽናት፥ ለቤተ ክርስቲያን
አንድነት፥ ለሕዝባችን ደኅንነትና ለሀገር ሰላም አስተዋፅኦ የሚያበረክቱ፥ እንዲሁም የቤተ ክርስቲያናችን
ታሪክ ከነሙሉ ክብሩ ለትውልድ የሚሸጋገርባቸው ሊሆኑ ይገባል እያልን አባታዊ የአደራ መልእክታችንን
በእግዚአብሔር ስም እናስተላልፋለን፡፡

እግዚአብሔር አምላክ
ኢትዮጵያንና ሕዝቦችዋን
ይባርክ!
ወስብሐት ለእግዚአብሔር፤
አሜን።
አባ ማትያስ ቀዳማዊ

ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት
ጥቅምት ፩ ቀን ፳፻፲ወ፱ ዓ.ም.
አዲስ አበባ፥ ኢትዮጵያ