የመንበረ ፓትርያርክ ጠቅላይ ቤተ ክህነት የኢንፎርሜሽን ኮሙኒኬሽን ቴክኖሎጂ (ICT) መምሪያ የዲጂታል ሽግግርን ለማፋጠን የሚያስችል የሁለት ቀናት ሥልጠና መስጠት ጀመረ።

የመንበረ ፓትርያርክ ጠቅላይ ቤተ ክህነት የኢንፎርሜሽን ኮሙኒኬሽን ቴክኖሎጂ (ICT) መምሪያ ከአይሲቲና ዲጂታል ሽግግር አማካሪ ኮሚቴ ጋር በመተባበር ያዘጋጀውና ለሁለት ቀናት የሚቆየው ሥልጠና የመጀመሪያ ዙር መስከረም 29 ቀን 2019 ዓ.ም. መካሄድ ጀምሯል።

የአህጉረ ስብከት ዋና ሥራ አስኪያጆች፣ የአይሲቲ ዋና ክፍል ኃላፊዎችና ባለሙያዎች ላይ ያተኮረው ሥልጠና፤ በቅዱስ ሲኖዶስ የጸደቁትን የአይሲቲ ፖሊሲ፣ ስትራቴጂ፣ የመምሪያ ማቋቋሚያና የአማካሪ ኮሚቴውን አሠራር ማብራሪያ ለመስጠትና የሶፍትዌርን ምንነት ለቤተክርስቲያኗ ዘመናዊ አሠራር ካለው ፋይዳ ጋር ለማገናዘብ ያለመ ሥልጠና ነው።

በሥልጠናው መክፈቻ ላይ የተገኙት ንቡረ ዕድ ኤልያስ አብርሃ የመንበረ ፓትርያርክ ጠቅላይ ቤተ ክህነት የመንፈሳዊ ዘርፍ ምክትል ዋና ሥራ አስኪያጅ ባስተላለፉት መልእክት፦ “ጥበብን በአግባቡ ከተጠቀምንበት ቃለ እግዚአብሔርን እናስተምርበታለን፤ ለማኅበራዊና ለኢኮኖሚያዊ አገልግሎቶችም ይጠቅማል” በማለት ዘመኑ የዲጂታል ዘመን በመሆኑ ጊዜው የፈጠረውን ቴክኖሎጂ በተገቢው መንገድ መጠቀም እንደሚያስፈልግ አሳስበዋል።

በዕለቱ ረዳት ፕሮፌሰር ግርማ ባቱ የመንበረ ፓትርያርክ ጠቅላይ ቤተ ክህነት የማኅበራዊ እና ኢኮኖሚያዊ ዘርፍ ምክትል ዋና ሥራ አስኪያጅ በክብር እንግድነት ተገኝተዋል።

በመድረኩ ንግግር ያደረጉት መጋቤ ጥበብ ሙሉዓለም ዐሥራት የመንበረ ፓትርያርክ ጠቅላይ ቤተ ክህነት የኢንፎርሜሽን ኮሙኒኬሽን ቴክኖሎጂ (ICT) መምሪያ ኃላፊ እንደተናገሩት

ብፁዕ አቡነ ሳዊሮስ የመንበረ ፓትርያርክ ጠቅላይ ቤተ ክህነት ዋና ሥራ አስኪያጅ፣ የደቡብ ምዕራብ ሸዋ፣ የሸገር ከተማ እና የምስካየ ሕዙናን አህጉረ ስብከት ሊቀ ጳጳስ) ይህ የቴክኖሎጂ እንቅስቃሴ በቋሚነት ተቋቁሞ አዳዲስ የቴክኖሎጂ አሠራሮችን እንዲቀይስ፣ ተገቢው ክትትል እንዲደረግ እና ተፈጻሚ እንዲሆን በማድረግ ረገድ የላቀ ሚና እንደተጫወቱ ገልጸዋል ።

መጋቤ ጥበብ ዲ/ን ሙሉዓለም ዐሥራት አክለውም ብፁዕነታቸው

ኃላፊነቱን ከተረከቡ ጀምሮ በአይሲቲው ዘርፍ ዘመናዊ፣ ቀልጣፋና ውጤታማ የመልካም አስተዳደር ሥርዓት ለመዘርጋት በሰጡት መመሪያ መሠረት የቴክኖሎጂ ሥራዎች በጥንቃቄ ተጠብቀው እንዲቀጥሉ ተደርጓል ብለዋል።

አክለውም ለቅድስት ቤተክርስቲያን መንፈሳዊ አገልግሎትና አስተዳደራዊ ሥራዎች ፈተና እየሆኑ ባሉ አርቲፊሻል ኢንተለጀንስን (AI) እና የዲጂታል ሚዲያ ቴክኖሎጂዎች ዙሪያ የመነሻ ውይይቶች በማድረግ ለወደፊት በቅዱስ ሲኖዶስ ደረጃ ለሚጸድቁ ፖሊሲዎችና መመሪያዎች ግብአት የሚሆኑ ሐሳቦች እንደሚሰባሰቡ አስረድተዋል፡፡ አርቲፊሻል ኢንተለጀንስን (AI) በአግባቡ ከተጠቀምንበት ትልቅ ዕድል ሲሆን፣ ካልሆነ ግን ተጓዳኝ ችግሮች ስለሚመጡ አጠቃቀሙን በጥንቃቄ መረዳት ያስፈልጋል። በመሆኑም ከሥልጠናው በኋላ ሁሉም ባለሙያና ኃላፊ ወደ ተግባር በመቀየር የቤተክርስቲያኗን አገልግሎት የሰለጠነና ዘመናዊ ማድረግ እንደሚገባው አሳስበዋል።

በሥልጠናው የመጀመሪያው ዙር አቅራቢ የነበሩት ቀሲስ ዮሐንስ የአማካሪ ኮሜቴ ስብሰቢ”አይሲቲ ለቤተክርስቲያን አገልግሎት፤ ዲጂታል ለውጥ፣ የእውቀት አስተዳደር እና የተሻለ አገልግሎት” በሚል ርዕስ ሰፊ ማብራሪያ ሰጥተዋል።

ከሰዓት በኋላ “የሲስተም ሶፍትዌር ለቤተክርስቲያን አገልግሎት” በሚል ርዕስ በሁለተኛው አሰልጣኝ መምህር ማስረሻ ወርቁ አማካኝነት ሥልጠና ተሰጥቷል።

©የኢኦተቤ መገናኛ ብዙኀን አገልግሎት ሥርጭት ድርጅት/ EOTC Broadcasting Service Agency/